Mitengo 7 - Bhibhiliya Nya Guage

Miningelo ya Vathangeli gasi gu agisa giluvelo

¹ Litshigu Mosi a nga vbedzago gu emisa Wulanga nya Guage, a di wu todza khu mafura, a wu agisa ni sombo saye satshavbo; a emisa gambe giluvelo a gi agisa gumogo ni sombo saye satshavbo; na gu thumisa mafura nya gikategiso gikhati gyatshavbo.

² Khavbo avbo, dzi di hidzimela dzindruna dza Israyeli, a gu avo vathangeli nya dzinyumba dza vababe vawe, avo va nga phasedzelago gu gira gilovela nya vathu.

³ Va di ya ningela miningelo yawe ga Pfhumu Nungungulu, a gu eyi: Livbandre na mweyo dzikareta na dzi fenengedzidwe, likhumi na dzimbili dzimombe; gu nonedza gupwani vathangeli vavili va di ningela kareta mweyo, muthangeli moyo ni moyo a di ningela mombe mweyo, va si yisa mbeli nya Tshatsha.

⁴ Khavbo avbo, Pfhumu Nungungulu a di embela Mosi, khuye:

⁵ “Hakha miningelo yoyo, mu na phasedzela thumo nya wukhozeli wa Tshatshani nya Tshangano, u na yi ningela ga va na Levhi, gukhedza khu thumo wa moyo ni moyo.”

⁶ Mosi a di hakha dzikareta ni dzimombe a dzi ningela ga va na Levhi.

⁷ A di dzega dzikareta dzimbili ni dzimombe dzina a dzi ningela ga sanana sa Gerisoni, gukhedza khu thumo wawe.

⁸ Dzikareta dzina ni livbandre na dzitharu dzimombe a di dzi ningela ga sanana sa Merari gukhedza khu thumo wawe, owu wu thangedwago khu Itamari, mwamana wa Aroni, muphasi nya mhamba.

⁹ Aholu va na Khowati kha nga va ninga gilo, kholu va diri ni thumo nya gusayise sombo nya agiswe, va nga yela gu si rwala magatani gwawe.

Miningelo gasi gu agisa giluvelo

¹⁰ Khu litshigu gi todzidwego mafura giluvelo, vathangeli va di dusa mihengo yawe nya guagise giluvelo, va yi vega mbeli gwa igyo.

¹¹ Khavbo avbo, Pfhumu Nungungulu a di ganela ga Mosi, khuye: “Muthangeli ni muthangeli a nata khu litshigu laye ata bikela ningelo waye nya guagise giluvelo.”

¹² Khu guralo, uye a nga bikela ningelo waye khu litshigu nya guhegule khu Nasoni, mwamana wa Aminadhabhi, nya lihundzu la na Judha.

¹³ A di ningela mbiya mweyo nya parata, nya gulemele lizana ni magumararu dzisekeli, ginamelo gimwegyo nya parata na giri ni livbandre na mavili magumi dzisekeli mayelano khu sekeli ya wulangani nya guage; satshavbo na si tade khu wuguvbi nya wadi, na wu sugidwe khu mafura, gasi gu gira ningelo nya guhodze;

¹⁴ ni gimbiyana gimwegyo nya ndralama nya gulemele likhumi dzisekeli, na gi tade khu libani;

¹⁵ ni gimombyana gimwegyo, ginvutana gimwegyo ni gihambana gimwegyo nya mwaga moyo, gasi gu gira phaso nya guvbiswe;

¹⁶ ni nyamabhongwe moyo, gasi gu gira ningelo nya gutsetseledwe sighoho.

¹⁷ Gasi gu gira ningelo nya phaso nya gurule, a di dusa dzimombe dzimbili, livbandre dzinvuta, livbandre vanyamabhongwe ni livbandre dzihamba nya mwaga moyo; khuwo owu ningelo a nga girago Nasoni, mwamana wa Aminadhabhi.

¹⁸ Nataniyeli, mwamana wa Sowari, muthangeli nya lihundzu la va na Isakari, a dita ningela hengo waye khu litshigu nya wuvili.

¹⁹ Kha nga ningelo waye, uye a di ningela mbiya mweyo nya parata na yiri ni pimo nya lizana ni magumararu dzisekeli, ginamelo gimwegyo na giri ni livbandre na mavili magumi dzisekeli, mayelano khu sekeli ya Wulangani nya Guage; satshavbo na si tade khu wuguvbi nya wadi nya gusugwe khu mafura, gasi gu gira ningelo nya guhodze;

²⁰ ni gimbiyana gimwegyo nya ndralama nya likhumi dzisekeli, na gi tade khu libani;

²¹ ni gimombyana gimwegyo, ginvutana gimwegyo ni hamba mweyo, gasi gu gira phaso nya guvbiswe;

²² ni mabhongwe moyo, gasi gu gira ningelo nya gutsetseledwe sighoho.

²³ Gasi gugira ningelo nya phaso nya gurule, a di dusa dzimombe dzimbili, livbandre dzihamba, livbandre vanyamabhongwe, livbandre dzinvutana nya mwaga moyo; owu khuwo ningelo wa Nataniyeli, mwamana wa Sowari.

²⁴ Khu litshigu nya wuraru, Eliyabhi, mwamana wa Heloni, muthangeli nya lihundzu la Zebhuloni, a dita gira nuye ningelo waye.

²⁵ A di ningela mbiya mweyo nya parata nya lizana ni magumararu dzisekeli, ginamelo nya parata nya livbandre na mavili magumi dzisekeli, mayelano khu pimo wa Wulangani nya Guage; satshavbo na si tade khu wuguvbi nya wadi, na wu sugidwe khu mafura, gasi gu gira ningelo nya guhodze;

²⁶ ni gimbiyana gimwegyo nya ndralama, na gi tade khu libani;

²⁷ Gimombyana gimwegyo, hamba mweyo, ginvutana nya tanga nya mwaga moyo, gasi gu gira phaselo nya guvbiswe;

²⁸ nyamabhongwe moyo nya gugire khuye phaso nya gutsetseledwe sighoho.

²⁹ Gasi gu gira ningelo nya phaso nya gurule, a di dusa dzimombe dzimbili, livbandre dzihamba, livbandre vanyamabhongwe ni livbandre dzinvutana nya mwaga moyo; owu khuwo ningelo wa Eliyabhi, mwamana wa Heloni.

³⁰ Khu litshigu nya wu na, a di bela Elizuri, mwamana wa Sedhewuri, muthangeli nya lihundzu la na Rubheni, ata gira ningelo waye.

³¹ A di ningela mbiya mweyo nya parata, nya pimo nya lizana ni magumararu dzisekeli, ginamelo gimwegyo nya parata nya livbandre na mavili magumi dzisekeli, mayelano ni pimo wa Wulangani nya Guage; satshavbo na si tade khu wuguvbi nya wadi, na wu sugidwe khu mafura, gasi gu gira ningelo nya guhodze;

³² ni gimbiyana nya ndralama nya pimo nya likhumi dzisekeli na gi tade khu libani;

³³ gimombyana gimwegyo, hamba mweyo, nvutana mweyo nya mwaga moyo, gasi gu gira phaso nya guvbiswe;

³⁴ nyamabhongwe moyo gasi gu gira khuwo phaso nya gutsetseledwe sighoho.

³⁵ Gasi gu gira phaso nya gurule, Elizuri a di ningela dzimombe dzimbili, livbandre dzihamba, livbandre vanyamabhongwe, livbandre dzinvutana nya mwaga moyo. Owu khuwo ningelo wa Elizuri, mwamana wa Sedhewuri.

³⁶ Khu litshigu nya livbandre, Selumiyeli, mwamana wa Surisadhayi, muthangeli nya lihundzu la na Simiyoni a di gira ningelo waye.

³⁷ Uye a di ningela mbiya mweyo nya parata, nya pimo nya lizana ni magumararu dzisekeli, ginamelo gimwegyo nya parata nya pimo nya livbandre na mavili magumi dzisekeli, mayelano ni pimo nya sekeli ya Wulangani nya Guage; satshavbo na si tade khu wuguvbi nya wadi, nya gusugwe khu mafura, gasi gu gira ningelo nya guhodze;

³⁸ ni gimbiyana nya ndralama nya pimo nya likhumi dzisekeli, na gi tade khu libani;

³⁹ gimombyana gimwegyo, hamba mweyo, nvutana mweyo nya mwaga moyo, gasi gu gira phaso nya guvbiswe;

⁴⁰ ni nyamabhongwe moyo gasi gu gira phaso nya gutsetseledwe sighoho.

⁴¹ Gasi gu gira phaso nya gurule, uye a di ningela dzimombe dzimbili, livbandre dzihamba, livbandre vanyamabhongwe ni livbandre dzinvutana nya mwaga moyo; owu khuwo ningelo wa Selumiyeli, mwamana wa Surisadhayi.

⁴² Khu litshigu nya livbandre na limwedo, Eliyasafi, mwamana wa Dheweli, muthangeli nya lihundzu la va na Gadhi, a dita gira ningelo waye.

⁴³ Uye a di ningela mbiya mweyo nya parata, nya lizana ni magumararu (130) dzisekeli, ginamelo gimwegyo nya parata nya livbandre na mavili magumi dzisekeli, mayelano khu sekeli ya Wulangani nya Guage; satshavbo na si tade khu wuguvbi nya wadi, na wu sugidwe khu mafura, gasi gu gira ningelo nya guhodze;

⁴⁴ ni gimbiyana gimwegyo nya ndralama nya pimo nya likhumi dzisekeli, na gi tade khu libani;

⁴⁵ ni gimombyana gimwegyo, hamba mweyo, nvutana mweyo nya mwaga moyo, gasi gu gira phaso nya guvbiswe;

⁴⁶ ni nyamabhongwe moyo nya gugire ningelo nya gutsetseledwe khuwo sighoho.

⁴⁷ Gasi gu gira phaso nya gurule, a di ningela dzimombe dzimbili, livbandre dzihamba, livbandre vanyamabhongwe ni livbandre dzinvutana nya mwaga moyo. Owu khuwo ningelo wa Eliyasafi, mwamana wa Dheweli.

⁴⁸ Khu litshigu nya livbandre na mavili, Elisama, mwamana wa Amiyudhi, muthangeli nya lihundzu la va na Efrayimi, a dita bikela ningelo waye.

⁴⁹ A di ningela mbiya mweyo nya parata, nya pimo nya lizana ni magumararu dzisekeli, ginamelo gimwegyo nya parata nya livbandre na mavili magumi dzisekeli, mayelano khu sekeli ya Wulangani nya Guage; satshavbo na si tade khu wuguvbi nya wadi, wu sugidwego khu mafura, gasi gu gira ningelo nya guhodze;

⁵⁰ ni gimbiyana gimwegyo nya ndralama nya likhumi dzisekeli, na gi tade khu libani;

⁵¹ ni gimombyana gimwegyo, hamba mweyo, ni ginvutana gimwegyo nya mwaga moyo, gasi gu gira phaselo nya guvbiswe;

⁵² ni nyamabhongwe moyo, gasi gu gira ningelo nya gutsetseledwe sighoho.

⁵³ Gasi gu gira phaso nya gurule, Elisama a di ningela dzimombe dzimbili, livbandre dzihamba, livbandre vanyamabhongwe ni livbandre dzinvutana nya mwaga moyo. Owu khuwo ningelo wa Elisama, mwamana wa Amiyudhi.

⁵⁴ Khu litshigu nya livbandre na mararu, Gamaliyeli, mwamana wa Pedhasuri, muthangeli nya lihundzu la na Manasi, a di bela ata gira ningelo waye;

⁵⁵ uye a di ningela mbiya mweyo nya parata, yi gu ni pimo nya lizana ni magumararu (130) dzisekeli, ginamelo gimwegyo nya parata, na giri ni pimo nya livbandre na mavili magumi dzisekeli, mayelano khu pimo nya sekeli ya Wulangani nya Guage; satshavbo na si tade khu wuguvbi nya wadi, na wu sugidwe khu mafura, gasi gu gira ningelo nya guhodze;

⁵⁶ ni gimbiyana nya ndralama nya likhumi dzisekeli, nya gutale khu libani;

⁵⁷ ni gimombyana gimwegyo, hamba mweyo ni ginvutana gimwegyo nya mwaga moyo, gasi gu gira ningelo nya guvbiswe;

⁵⁸ ni nyamabhongwe moyo, gasi gu gira ningelo nya gutsetseledwe sighoho.

⁵⁹ Gasi gu gira phaso nya gurule, Gamaliyeli a di ningela dzimombe dzimbili, livbandre dzihamba, livbandre dzinvutana nya mwaga moyo. Owu khuwo ningelo wa Gamaliyeli, mwamana wa Pedhasuri.

⁶⁰ Khu litshigu nya livbandre na mana, Abhidhani, mwamana wa Gidheyoni, muthangeli nya lihundzu la na Bhejami, a dita gira ningelo waye.

⁶¹ A di ningela mbiya mweyo nya parata, yiri ni pimo nya lizana ni magumararu (130) dzisekeli, ginamelo gimwegyo nya parata, nya livbandre na mavili magumi dzisekeli, mayelano khu pimo nya sekeli ya Wulangani nya Guage; satshavbo na si tade khu wuguvbi nya wadi, nya gusugwe khu mafura, gasi gu gira ningelo nya guhodze;

⁶² ni gimbiyana nya ndralama, nya pimo nya likhumi dzisekeli, nya gutale khu libani;

⁶³ ni gimombyana gimwegyo, hamba mweyo ni ginvutana gimwegyo nya mwaga moyo, gasi gu gira ningelo nya guvbiswe;

⁶⁴ ni nyamabhongwe moyo, gasi gu gira ningelo nya gutsetseledwe sighoho.

⁶⁵ Gasi gu gira phaso nya gurule, Abhidhani a di ningela, dzimombe dzimbili, livbandre dzihamba, livbandre vanyamabhongwe ni livbandre dzinvutana nya mwaga moyo. Owu khuwo ningelo wa Abhidhani, mwamana wa Gidheyoni.

⁶⁶ Khu litshigu nya likhumi, a dita bela Ayezeri, mwamana wa Amisadhayi, muthangeli nya lihundzu la na Dhani, a ta gira ningelo waye.

⁶⁷ Uye a di ningela, mbiya mweyo nya parata, na yiri ni pimo nya lizana ni magumararu (130) dzisekeli, ginamelo gimwegyo nya parata nya gulemele livbandre na mavili magumi dzisekeli, mayelano khu sekeli ya Wulangani nya Guage; satshavbo na si tade khu wuguvbi nya wadi, na wu sugidwe khu mafura, gasi gu gira ningelo nya guhodze;

⁶⁸ ni gimbiyana gimwegyo nya ndralama nya likhumi dzisekeli, nya gutale khu libani;

⁶⁹ ni gimombyana gimwegyo, hamba mweyo ni ginvutana gimwegyo nya mwaga moyo, gasi gu gira phaso nya guvbiswe;

⁷⁰ ni nyamabhongwe moyo, gasi gu gira phaso nya gutsetseledwe sighoho.

⁷¹ Gasi gu gira phaso nya gurule, Ayezeri a di ningela dzimombe dzimbili, livbandre dzihamba, livbandre vanyamabhongwe ni livbandre dzinvutana nya mwaga moyo. Owu khuwo ningelo wa Ayezeri, mwamana wa Amisadhayi.

⁷² Khu litshigu nya likhumi na limwedo, Pagiyeli, mwamana wa Okarani, muthangeli nya lihundzu la na Aseri a dita gira ningelo waye.

⁷³ Uye a di ningela mbiya mweyo nya parata, nya lizana ni magumararu (130) dzisekeli, ginamelo gimwegyo nya parata, nya livbandre na mavili magumi dzisekeli, mayelano khu pimo nya sekeli ya Wulangani nya Guage; satshavbo na si tade khu wuguvbi nya wadi, wu sugidwego khu mafura, gasi gu gira ningelo nya guhodze;

⁷⁴ ni gimbiyana nya ndralama, gi gu ni pimo nya likhumi dzisekeli, na gi tade khu libani;

⁷⁵ ni gimombyana gimwegyo, hamba mweyo ni ginvutana gimwegyo nya mwaga moyo, gasi gu gira phaso nya guvbiswe;

⁷⁶ ni nyamabhongwe moyo, gasi gu gira phaso nya gutsetseledwe sighoho.

⁷⁷ Gasi gu gira phaso nya gurule, Pagiyeli a di ningela dzimombe dzimbili, livbandre dzihamba, livbandre vanyamabhongwe ni livbandre dzinvutana nya mwaga moyo. Owu khuwo ningelo wa Pagiyeli, mwamana wa Okarani.

⁷⁸ Khu litshigu nya likhumi na mavili, Ayira, mwamana wa Enani, muthangeli nya lihundzu la na Nafitali a di gira ningelo waye.

⁷⁹ A di ningela mbiya mweyo nya parata, nya pimo nya lizana ni magumararu (130) dzisekeli, ginamelo gimwegyo nya parata, nya pimo nya livbandre na mavili magumi dzisekeli, mayelano khu pimo nya sekeli ya Wulangani nya Guage; satshavbo na si tade khu wuguvbi nya wadi, nya gusugwe khu mafura, gasi gu gira ningelo nya guhodze;

⁸⁰ ni gimbiyana nya ndralama nya pimo nya likhumi dzisekeli, nya gutale khu libani;

⁸¹ ni gimombyana gimwegyo, hamba mweyo ni ginvutana gimwegyo nya mwaga moyo, gasi gu gira phaso nya guvbiswe;

⁸² ni nyamabhongwe moyo, gasi gu gira phaso nya gutsetseledwe sighoho.

⁸³ Gasi gu gira phaso nya gurule, Ayira a di ningela dzimombe dzimbili, livbandre dzihamba, livbandre vanyamabhongwe ni livbandre dzinvutana nya mwaga moyo. Owu khuwo ningelo wa Ayira, mwamana wa Enani.

⁸⁴ Ogu khugo guagiswa nya giluvelo gu nga girwago khu vathangeli va na Israyeli, litshigu gu nga todzwa mafura giluvelo gasi gu gi agisa. Vathangeli va na Israyeli va di ningela likhumi na dzimbili dzimbiya nya parata, likhumi na sivili sinamelo nya parata ni likhumi na sivili simbiyana nya ndralama.

⁸⁵ Mbiya ni mbiya nya parata yi di gu lemela lizana ni magumararu (130) dzisekeli, ginamelo ni ginamelo gi di gu lemela livbandre na mavili magumi dzisekeli; satshavbo si enedza tengo nya magumavili na mana mazana (2.400) dzisekeli, mayelano ni pimo wa Wulangani nya Guage;

⁸⁶ avbo nya likhumi na sivili simbiyana nya gutale khu libani, gimbiyana ni gimbiyana gi di gu lemela likhumi dzisekeli, mayelano ni pimo wa Wulangani nya Guage; ndralama yatshavbo nya simbiyana yi di enedza pimo nya lizana ni magumavili (120) dzisekeli;

⁸⁷ sifuyo satshavbo va nga girago khiso phaselo nya guvbiswe si diri likhumi na sivili simombyana, likhumi na dzimbili dzihamba, likhumi na sivili sinvutana nya mwaga moyo nya guvelegwe, gumogo ni miningelo yaye nya guhodze, ni likhumi na vavili vanyamabhongwe nya gugire phaso nya guditshedzwe sighoho.

⁸⁸ Sifuyo satshavbo nya phaso nya gurule, magumavili na sina simombyana ni livbandre na limwedo magumi dzihamba, livbandre na limwedo magumi vanyamabhongwe ni livbandre na limwedo magumi sinvutana nya mwaga moyo nya guvelegwe; eyi khiyo mihengo nya guagise giluvelo hwane nya gu bani gi todzidwe mafura.

⁸⁹ Avbo Mosi a nga bani a gu bela Tshatshani nya Tshangano gasi gu ganela ni Pfhumu Nungungulu, a dipwa Pfhumu Nungungulu na gu ganela naye, lito laye na li gu duga khu vbatshani nya Ngasa nya Gidzumeledzwano, khu vbakari nya dzikerubhimi dzimbili. Uye nuye a di ganela naye.