Mitengo 36 - Bhibhiliya Nya Guage

Thomba yi lumbago vanyamayi

¹ Vathangeli nya dzindranga dza situgulwana sa Gileyadhi, mwamana wa Makiri, mwamana wa Manasi, nya linyangwa la sanana sa Josefe, va di hidzimela ga Mosi ni ga vathangeli nya lisima nya sanana sa Israyeli va ya ganela, khavo:

² “Pfhumu Nungungulu rumide uwe, mune wangu, gukhuye u kabanisele litigo khu gu lola dzisolo li khala thomba ya sanana sa na Israyeli; gambe Pfhumu Nungungulu a gu leletede uwe, mune wangu, khuye u ningele thomba ya Selofeyadi, ndriyathu, ga sanana saye nya vanyamahegyane.

³ Aholu va gu dzegwa khu vama va mambe mahundzu nya gukari nya sanana sa Israyeli, thomba yawe yi na duswa eno nya dzithomba dza vababe vathu, yi ya engedzedwa ga thomba nya lihundzu la iyo va na dzegwago iyo; khu kharato gu na vbungudwa thomba yathu.

⁴ Avbo wu na vbohago Mwaga nya Gunengele nya sanana sa na Israyeli, thomba yawe yi na ya patwa ga dzithomba nya lihundzu a lumbago ilo, yi duswa ga thomba ya vababe vathu.”

⁵ Khavbo avbo, Mosi khu guruma ga Pfhumu Nungungulu, a di hakha va na Israyeli, khuye: “Lihundzu nya sanana sa Josefe la gu ganela lisine.

⁶ Upwani esi Pfhumu Nungungulu a rumidego mayelano khu vanyamahegyane va Selofeyadi, wari, khuye: Va ngu dzi kodza gu dzegwa khu wevbini va mu golago; aholu va na dzegwe omu nya dzindranga nya lihundzu la vababe vawe.

⁷ Khu kharato, thomba ya va na Israyeli kha yi na dzumedziswa gu duga khu ga lihundzu, yi bela ga limbe lihundzu. Sanana sa na Israyeli, moyo ni moyo a na namarele ga thomba ya vababe vaye.

⁸ Watshavbo ni wevbini nyamahegyane a gu ni thomba vbakari nya mahundzu ya va na Israyeli, fanede gu dzegwa khu wevbini mwama a lumbago lihundzu la vababe vaye, gasi gu moyo ni moyo wa va na Israyeli a si hambani ni thomba nya linyangwa laye.

⁹ Khu guralo, ni mweyo thomba yi nga khugi khu ga limbe lihundzu yi hongola ga limbe nya guhambane, kholu, lihundzu ni lihundzu nya sanana sa Israyeli gu vbwetega li sayise thomba yaye.”

¹⁰ Vanyamahegyane va Selofeyadi va di gira kha nga edzi Pfhumu Nungungulu a nga leletelago khidzo Mosi;

¹¹ Mahala, Tiriza, Hogila, Milika ni Nowa, vanyamahegyane va Selofeyadi va di dzegwa khu sanana sa vababedugwane vawe.

¹² Va di dzegwa mapangoni ya sanana sa Manasi, mwamana wa Josefe; khu guralo, thomba yawe yi di khala umo nya lihundzu nya linyangwa la vababe vawe.

¹³ Eyi khiyo milayo ni sileletelo esi Pfhumu Nungungulu a si vegidego ga va na Israyeli, khu ga Mosi, mikovani ga Mowabhi, vbafuvbi ni tsongo wa Joridhani, wu khedzanidego ni Jeriko.