Mitengo 33 - Bhibhiliya Nya Guage

Liendro nya gukhugele Egipito kala Mowabhi

¹ Aya khu magimbilelo va gimbidego khayo va na Israyeli gukhugela guduga gwawe khu Egipito, gukhedza khu mabutho yawe na va gu thangedwa khu Mosi ni Aroni.

² Mosi a di lova makhugelo yawe ni magimbilelo yawe umo va zumbidego, kha nga idzo a leletedego khidzo Pfhumu Nungungulu, gasi magimbilelo yawe mayelano nidzo va khugidego khidzo khaya:

³ Va khugide khu Ramesi khu litshigu nya likhumi na livbandre nya ngima nya guhegule, a gu eli li handzamedzago litshigu nya Phasika, va na Israyeli, va di duga khu tshivba nya yikhongolo na va gu wonwa khu Vagipiti.

⁴ Vagipiti va di gu dzinga avo Pfhumu Nungungulu a nga va songago vbakari gwawe, sanana sawe satshavbo nya matiwula; kholu Pfhumu Nungungulu a di wugela vanungungulu vawe, a gu wonegisa gulamula gwaye.

⁵ Va na Israyeli va di khuga khu Ramesi vaya zumba tigoni ga Sukoti.

⁶ Va khuga khu Sukoti vaya zumba tigoni ga Etani, gu manegelago mahegiso nya giwula.

⁷ Va khuga khu Etani, va bwelela Pi-Hayiroti, gu nga bani gu khedzana ni Bhahali-Zefoni, vaya zumba mbeli ga Migidholi.

⁸ Va khuga khu Pi-Hayiroti, va tsemakanya yiphwa khu vbakari ni vbakari va bela giwulani, va gimbila matshigu mararu giwulani ga Etani, vaya zumba tigoni ga Mara.

⁹ Va di khuga khu Mara va vboha Elimi, avbo gu nga bani gu romo likhumi na sivili sifefe nya mati, ni livbandre na mavili magumi migindru; khu guralo, va diya zumba avbovbo.

¹⁰ Va di khuga khu Elimi, vaya zumba vbafuvbi ni Yiphwa nya Gufuvile;

¹¹ va di khuga, va diga Yiphwani nya Gufuvile, vaya zumba giwulani ga Sine;

¹² va khuga khu giwulani gya Sine, vaya zumba Dhofika;

¹³ va khuga khu Dhofika vaya zumba Alusi;

¹⁴ va khuga khu Alusi vaya zumba Refidhimi; avbo gu nga bani guri mwalo mati nya gusele vathu;

¹⁵ va khuga khu Refidhimi vaya zumba giwulani gya Sinayi;

¹⁶ va khuga khu giwulani gya Sinayi, vaya zumba Kibhiroti-Hatahavani;

¹⁷ va khuga khu Kibhiroti-Hatahavani, vaya zumba Hazeroti;

¹⁸ va khuga khu Hazeroti, vaya zumba Retima;

¹⁹ va khuga khu Retima, vaya zumba Rimoni-Peresi;

²⁰ va khuga khu Rimoni-Peresi, vaya zumba Libina;

²¹ va khuga khu Libina, vaya zumba Risa;

²² va khuga khu Risa, vaya zumba Keyelata;

²³ va khuga khu Keyelata, vaya zumba gigomoni gya Seferi;

²⁴ va khuga khu gigomoni gya Seferi, vaya zumba Haradha;

²⁵ va khuga khu Haradha, vaya zumba Makeloti;

²⁶ va khuga khu Makeloti, vaya zumba Tahati;

²⁷ va khuga khu Tahati, vaya zumba Tera;

²⁸ va khuga khu Tera, vaya zumba Mitika;

²⁹ va khuga khu Mitika, vaya zumba Hasimona;

³⁰ va khuga khu Hasimona, vaya zumba Moseroti;

³¹ va khuga khu Moseroti, vaya zumba Bhene-Jahakani;

³² va khuga khu Bhene-Jahakani, vaya zumba Hori-Hagidigadhi;

³³ va khuga khu Hori-Hagidigadhi, vaya zumba Jotibatani;

³⁴ va khuga khu Jotibatani, vaya zumba Abhirona;

³⁵ va khuga khu Abhirona, vaya zumba Eziyoni-Gebheri;

³⁶ va khuga khu Eziyoni-Gebheri, vaya zumba giwulani gya Zimi, a gu tigoni ga Kadesi;

³⁷ va khuga khu Kadesi, vaya zumba gigomoni gya Hori, mahegiso nya litigo la Edhomi.

Gufa ga Aroni

³⁸ Muphasi nya mhamba Aroni a di gwela gigomoni ga Hori, kha nga guruma ga Pfhumu Nungungulu, a yafa avbovbo, na gu vbindride magumana myaga hwane nya guduge va na Israyeli khu tigoni ga Egipito, esi si giregide khu litshigu nya guhegule nya ngima nya livbandre.

³⁹ Gikhati a fudego Aroni gigomoni gya Hori, a diri ni tanga nya lizana ni magumavili na miraru (123) myaga.

⁴⁰ Khavbo avbo, Aradhi, mufumeli wa Vakhanani a nga bani a vbanya Negebhe, Marandzi nya litigo la Khanani, a dipwa gupwani va na Israyeli va nguta.

⁴¹ Khu guralo, va di khuga khu gigomoni gya Hori, vaya zumba Zalimuna;

⁴² va di khuga khu Zalimuna, vaya zumba Punoni;

⁴³ va khuga khu Punoni, vaya zumba Obhoti;

⁴⁴ va khuga khu Obhoti, vaya zumba Ye-Abharimi vbinganoni ga Mowabhi;

⁴⁵ va khuga khu Ye-Abharimi, vaya zumba Dhibhoni-Ghadhi;

⁴⁶ va khuga khu Dhibhoni-Ghadhi, vaya zumba Alimoni-Dhibhalatayimi;

⁴⁷ va khuga khu Alimoni-Dhibhalatayimi, vaya zumba sigomoni sa Abharimi, si khedzanidego ni Nebhu;

⁴⁸ va khuga khu sigomoni sa Abharimi, vaya zumba kovani wa Mowabhi, vbafuvbi ni Joridhani, a khedzanidego ni Jeriko;

⁴⁹ va di ya zumba vbafuvbi ni Joridhani gukhugela Bheti-Jesimoti kala Abheli-Sitimi, mapanini ga Mowabhi.

Nungungulu a ngu rumela gu tutumisa Vakhanani

⁵⁰ Pfhumu Nungungulu a di embela Mosi, panini ga Mowabhi, vbafuvbi ni tsongo wa Joridhani tigoni ga Jeriko, khuye:

⁵¹ “Embela va na Israyeli, khuwe: Gikhati mu tshatugago tsongo wa Joridhani gasi gu bela tigoni ga Khanani,

⁵² gu vbwetega mu tutumisa mbeli gwanu vavbahi vatshavbo va tigoni momo, mu phalalegisela sifananiso satshavbo nya vanungungulu vawe nya gugirwe khu simbi mu khungumulela malanga yawe yatshavbo nya gukhugege.

⁵³ Wandrani litigo, mu vbaha umo, kholu Eni nyi mi ningide li khala thomba yanu.

⁵⁴ Mu na kabanisela litigo khu gu lola dzisolo vbakari nya dzindranga dzanu; mu na ningela thomba nya yingi ga avo va gu vangi, mu ninga nya yidugwane ga avo va gu vadugwana, muthu ni muthu a na hakha esi si mu lumbago kha nga edzi solo yi lolago khidzo, gukhedza khu mahundzu ya vababe vanu.

⁵⁵ Aholu mwa gumba tutumisa mbeli gwanu vavbahi vatshavbo va tigoni, vale mu na va digago va khala vbakari gwanu, va na khala kha nga dzitshingano mahoni gwanu, ni miba nya renge musiwununi gwanu; va na mi thusedzela ga litigo mu na li dzegago.

⁵⁶ Khu guralo, Eni nyi na gira gwanu iso nyi nga vbweta gu gira gwawe.”