Mitengo 30 - Bhibhiliya Nya Guage

Sisambanyo ni situmbiso

¹ Mosi a di embeledzela vathangeli nya mahundzu ya va na Israyeli, khuye: Pfhumu Nungungulu a nyi leletede magana yaya, khuye:

² Muthu nya gukari a gu gira gifungo ga Pfhumu Nungungulu, mwendro gu gira gisambanyo, ni gu dzi hunga khu monyo waye, a nga tshuki a ndreyisa gifungo gyaye, fanede gu gira satshavbo a ganedego khu monyo waye.

³ Nyamayi a gu gira gifungo ga Pfhumu Nungungulu khu gu sambanya, mwendro gu funga khu lito laye na ngari nyumbani ga babe waye, na ngari mbiri,

⁴ babe waye a gupwa gufunga gwaye, ni lito nya gusambanye gwaye, a si mu himbedzeli; gusambanya gwatshavbo gwaye gu na tiyiswa, ni magana yatshavbo a fungidego khayo ma na tiya.

⁵ Aholu, babe waye a gu mu himbedzela khu litshigu lolo a nga mu pwago na gu sambanya, ni magana yatshavbo a fungidego, kha ma na tiyiswa; Pfhumu Nungungulu a na mu tsetselela, kholu babe waye a mu himbedzede.

⁶ Aholu a gu bani na lowodwe, na dzi hungide khu gifungo gyaye, mwendro khu lito li dugelago kanani gwaye,

⁷ a gu pwidwa khu mwama waye na gu sambanya khu litshigu lolo a si mu himbedzeli, gifungo gyaye gi na tiya, ni magana yaye yatshavbo a fungidego khayo, ma na tiya.

⁸ Aholu mwama waye a gu dzegela gu mu himbedzela khu litshigu lolo a mupwago, uye a na bani na tshulegide ga gisambanyo gyaye, ni magana yatshavbo ma dugidego khu kanani gwaye, a dzi hungidego khayo. Khu guralo, Pfhumu Nungungulu, a na mu tsetselela.

⁹ Aholu, a gu bani nari gisambanyo gya noni mwendro gya nyamayi a hudwego khu mwama waye, magana yatshavbo a dzi hungidego khayo, ma na tiyiswa avbo gwaye.

¹⁰ Aholu, a gu bani a dzi hungide nari nyumbani ga mwama waye, mwendro khu gusambanya gwaye,

¹¹ mwama waye a gu mupwa na gu sambanya a si mu himbedzeli; gisambanyo gyaye gi na tiyiswa, ni magana a dzi hungidego khayo ma na tiya.

¹² Aholu, mwama waye a gu dzegela gu mu himbedzela khu litshigu lolo a nga mupwago na gu sambanya, yatshavbo magana nya gusambanye gwaye nayo nya gu dzi hunge gwaye, ma dugidego khu kanani gwaye, kha ma na tiya gilo, kholu mwama waye a mu himbedzede; khu guralo, Pfhumu Nungungulu a na mu tsetselela.

¹³ Magana yatshavbo yaye nya gifungo, ni gusambanya gwaye gwatshavbo a dzi hungidego khugo gasi gu dzi nogisa hefemuloni gwaye, si na tiyiswa mwendro gu ganedzwa khu mwama waye.

¹⁴ Aholu mwama waye a gu mupwa a si mu himbedzeli, a vbindrisa matshigu, kharalo a gu yeyedza gu dzumela gusambanya ni magana yatshavbo a dzi hungidego khayo mwangadzi waye; tiyiside gifungo gyogyo, kholu degude khu litshigu a nga mupwago na gu funga.

¹⁵ Aholu, mwama waye a gu mu ganedza na li vbindride litshigu a nga mupwago na gu funga, uye a na rwala nandru wa mwangadzi waye.”

¹⁶ Eyi khu milayo Pfhumu Nungungulu a leletedego Mosi mayelano khu mwama ni gifungo gya mwangadzi waye, ni babe ni gifungo gya nyamahegyane waye na ngari ndrangani ga babe waye.