Mitengo 27 - Bhibhiliya Nya Guage

Thomba ya vanyamayi

¹ Khavbo avbo, va di hidzimela vanyamahegyane va Selofeyadi, mwamana wa Heferi, mwamana wa Gileyadhi, mwamana wa Makiri, mwamana wa Manasi, vbakari nya linyangwa la Manasi, mwamana wa Josefe. Malina ya vanyamahegyane vawe khaya: Mahalati, Nowa, Hogila, Milika ni Tiriza.

² Va di ya ema mbeli ga Mosi ni muphasi nya mhamba Eleyazari, ni mbeli ga vathangeli nya tshangano, vbamwanyatunu nya Tshatsha nya Tshangano,

³ va ganela, khavo: “Babe wathu fude giwulani, aholu a diri mwalo vbakari nya avo nya tsawa wa Kore va nga wugelago Pfhumu Nungungulu. Aholu uye fude khu kotani nya sighoho saye, nyamba tshiya sanana nya sikhwathana.

⁴ Khu ginani lina la babe wathu li na futwago umo nya linyangwa laye khu kotani nyamba tshiya sanana nya vama? Hi ningeni nethu gipandre nya thomba ya babe wathu vbakari ga va ndriyaye.”

⁵ Khu guralo, Mosi a di yisa mahungu yawe mbeli ga Pfhumu Nungungulu.

⁶ Khavbo avbo, Pfhumu Nungungulu a di hakha Mosi, khuye:

⁷ Ina kamwe! Vanyamahegyane va Selofeyadi va na ni lisine. U na va ninga gipandre gyawe nya thomba vbakari ga vandruye vababe vawe, u na va kabanisa thomba ya babe wawe.

⁸ Khu hwane, u na ganela ga va na Israyeli, khuwe: Mwama nya gukari a gufa nyamba tshiya sanana nya sikhwathana, ningelani thomba yaye ga gyanana gyaye nya gyagadzyana.

⁹ A gumba tshiya ambari ni gyanana nya nyamahegyane, avbovbo thomba yaye yi ningeleni vandriyaye.

¹⁰ A gu bani nari mwalo gambe vandruye, thomba yaye yi ningeleni ga vandruye vababe waye.

¹¹ Babe waye a gu bani nari mwalo vandruye, ningelani thomba yaye ga uye a tshadego nya nongo waye nya lisine a gu wa linyangwa laye. Isoso si na bani siri nayo nya lisine ga va na Israyeli kha nga edzi a nga rumago khidzo Pfhumu Nungungulu ga Mosi.

Nungungulu a ngu tivisa gufa ga Mosi

¹² Pfhumu Nungungulu a di embela Mosi, khuye: “Gwela gigomoni momu ga Abharimi, u khedza litigo nyi ningidego va na Israyeli.

¹³ Hwane nya gu nu li wonide, uwe nuwe u na ya patana ni vakokwe vago, kha nga edzi a giridego ndriyago Aroni.

¹⁴ Kholu, enu mwa vavili mu hambaniside sileletelo sangu giwulani ga Zimi, gikhati tshangano wu nyi wugedego tigoni ga Meribha, enu kha mwa nyi agisa mbeli gwawe khu gu va nonedza tshivba yangu nya yikhongolo. Ayoyo khu mati ya Meribha, tigoni ga Kadesi giwulani gya Zimi.”

¹⁵ Khavbo avbo, Mosi a di embela Pfhumu Nungungulu, khuye:

¹⁶ “Pfhumu Nungungulu, Uwe U gu Nungungulu u ningago guvbanya sivangwa satshavbo, hatha mwama nya gukari gasi gu khala muthangeli nya tshangano yoyu,

¹⁷ muthangeli a na thangago mbeli gwawe, gasi vathu vago va si gimbili kha nga tshambi nyambana muhavisi.”

Guhathwa ga Josuwa

¹⁸ Pfhumu Nungungulu a di hakha Mosi, khuye: “Rana Josuwa, mwamana wa Nuni, a hidzimela avbo gwago, mwama a gu ni Liphuvbo, u ta mu handzega mandza.

¹⁹ Khu guralo, u na mu emisa mbeli ga muphasi nya mhamba Eleyazari ni ga tshangano watshavbo, gambe u na mu wumbela na va gu mu wona.

²⁰ Mu ninge gipandre nya thumo wago, gasi tshangano watshavbo wa na Israyeli wu kodze gu mu yingisa.

²¹ Uye a na ya ema mbeli ga muphasi nya mhamba, Eleyazari; muphasi nya mhamba a na wudzisa khu uye ga Pfhumu Nungungulu khu gulola solo nya guage, khu guleleta nya Urimi; khuye a na ningago lito nya gu va duga, khuye gambe a na ningago lito gukhuye va bele, uye gumogo ni va na Israyeli ni tshangano watshavbo.”

²² Mosi a di gira kha nga idzo a nga rumwago khidzo khu Pfhumu Nungungulu. A di rana Josuwa aya mu emisa mbeli ga muphasi nya mhamba Eleyazari ni tshangano watshavbo.

²³ A di mu handzega mandza, a mu wumbela gu khala muthangeli kha nga edzi Pfhumu Nungungulu a nga rumago khidzo khu ga Mosi.