Mitengo 25 - Bhibhiliya Nya Guage

Gukhozela Bhahali-Peyori ni gukhathala ga Fineya

¹ Avbo va na Israyeli va nga bani va vbahide tigoni ga Sitimi, vathu va di bhaya ni vanyamahegyane va na Mowabhi.

² Avo va di ndrindredzela vathu umo nya miphaso ya vanungungulu vawe; khu guralo, vathu va na Israyeli va di hodza dzimhamba dzodzo, va wuya va khidzimela vanungungulu vawe, va va girela miphaso.

³ Va na Israyeli va diya dzi tshanganisa ni Bhahali-Peyori, khu guralo Pfhumu Nungungulu a di wugela va na Israyeli.

⁴ Khavbo avbo, Pfhumu Nungungulu a di embela Mosi, khuye: “Tombanisa vathangeli vatshavbo nya vathu va na Israyeli, u va tshwedzisa mbeli ga Pfhumu Nungungulu, mulihanini, vafa na va gu wonwa khu vatshavbo va na Israyeli, mwendro saye Pfhumu Nungungulu a na bosa likhulo laye.”

⁵ Khavbo avbo, Mosi a di embela valamuli va Israyeli, khuye: Muthu ni muthu a na songe vathu vaye va nga dzi tshanganisago ni Bhahali-Peyori.

⁶ Khu guralo, gu dita moyo nya sanana sa Israyeli, a resa ga vandriyaye nyamayi moyo nya Mumedhiyani, na gu wonwa khu Mosi gumogo ni tshangano watshavbo wa va na Israyeli, avbo tshangano watshavbo wu nga bani wu gu lila vbamwanyatunu nya Tshatsha nya Tshangano.

⁷ Khu guralo, Fineya, mwamana wa Eleyazari, mwamana wa muphasi nya mhamba Aroni, na mu wone a di khuga vbatshanganotunu, a dzega litshari laye,

⁸ a di landra mwama yoyu tshatshani gwaye aya va paya va vavili gumogo khu vbagirumbutunu, Muisrayeli ni nyamayi wule. Khu guralo, wu di vbela tungu vbakari ga va na Israyeli.

⁹ Vathu va fudego khu tungu wowo va diri tengo nya magumavili na mana magumi mazana (24.000).

¹⁰ Khu guralo, Pfhumu Nungungulu a di ganela ga Mosi, khuye:

¹¹ “Fineya mwamana wa Eleyazari, mwamana wa muphasi nya mhamba Aroni, ndreyiside hwindzo likhulo langu ga va na Israyeli, kholu a simamide gu yeyedza githawo avbo gwangu vbakari gwawe; khu guralo, kha nya mbembisa va na Israyeli khu likhulo langu.

¹² Khu guralo, u na mu embela, khuwe: Nyi ngu gira naye gidzumeledzwano nya gurule.

¹³ Gi na khala avbo gwaye; ni ga situgulwana saye, gidzumeledzwano nya wuphasi nya mhamba kala gupindruga, kholu simamide gu yeyedza githawo ga Nungungulu waye, a girela gutsetseledwa nya sighoho sa na Israyeli.”

¹⁴ Lina la Muisrayeli yoyu a nga songwago ni nyamayi nya Mumedhiyani a diri uye Zimiri, mwamana wa Salu, muthangeli nya lihundzu la na Simiyoni.

¹⁵ Lina la nyamayi nya Mumedhiyani yoyu a songidwego, a diri uye Kosibi, nyamahegyane wa Suri, muthangeli nya lihundzu la na Medhiyani.

¹⁶ Pfhumu Nungungulu a di engedza a embela Mosi, khuye:

¹⁷ “Dhumelani Vamedhiyani mu va mbembisa;

¹⁸ Kholu avo va mu sengedzede khu mano yawe, kha nga olu va mu kanganyisidego khu mahungu ya Peyori ni ya Kosibi, nyamahegyane wa muthangeli wa Vamedhiyani, uye a songidwego khu litshigu lile nya tungu, owu wu manegidego khu kotani ya Peyori.”