Mitengo 24 - Bhibhiliya Nya Guage

Bhalahama a ngu kategisa Israyeli nyondro nya wuraru

¹ Bhalahama khu gu wona gukhuye Pfhumu Nungungulu, a ngu salalegiswa khu gu kategisa Israyeli, kha nga vbweta gambe guya wudzisa kha nga dzimbe dzinyondro, aholu a di thendregedza khovbe yaye a khedzisa giwulani.

² Bhalahama, a di khusa maho a wona va na Israyeli na va ghovide khu dzinyangwa dzawe. Khavbo avbo, Liphuvbo la Nungungulu li di tshiga vbatshani gwaye.

³ A di ganela wuprofeti waye, khuye: Magana ga Bhalahama, mwamana wa Bheyori, magana ya muthu nya guwone misihalo;

⁴ magana ya uye a yingisago mahungu ya Nungungulu, ya oyu a wonago Nungungulu nya Tshivba Yatshavbo, uye a dzi nogisago, aholu na ma tulegide maho yaye.

⁵ Idzo yi mburidego khidzo mitshatsha yago, uwe Jakobe, ni wulanga u khalago, uwe Israyeli!

⁶ Ya gu anama kha nga mikova, kha nga lithembwe nya senge vbafuvbi ni tsongo! Pfhumu Nungungulu a si yade kha nga misimbo nya gihengebulo, kha nga sedhari vbafuvbi ni mati nya gutale!

⁷ Khu sifefeni gwawe gu na khulunga mati, ni wulime wawe wu na naganiswa khu mati nya gutale. Mufumeli wawe a na khusega guvbindra Agagi, ni mufumo waye wu na bani wuri ni tshivba.

⁸ Nungungulu duside Israyeli khu Egipito, a mu ningide tshivba nya gufanane ni nyari, Uye a na vbedza mayigo ya valala vaye, a na pandrelela marambo yawe a va hekha khu sighalala sawe.

⁹ Uye varamide a vandramela kha nga nghala nya matune, a godza nghala nya ngadzi. Khu mani a na gu mu tiyelago? Va na kategiswe avo va gu kategisago, va vadwa avo va gu valago.

¹⁰ Khavbo avbo, Bhalaki a di khondra khu likhulo a wugela Bhalahama, a phuphuta mandza; Bhalaki a di embela Bhalahama, khuye: “Eni nyi gu ranede guta vala valala vangu; aholu olu uwe u va kategiside guraru!

¹¹ Gasi olu, bwelela gaya gwago. Eni nyi di gu tumbiside gukheni nyi na gu ninga wuzundzo nya wukhongolo; aholu Pfhumu Nungungulu a gu himbedzede gu mana wuzundzo wowo.”

¹² Bhalahama a di phindrula Bhalaki, khuye: “Ina kha nya embela myango yago u nga yi rumelago gwangu, kheni:”

¹³ Ambari nari gupwani Bhalaki a gu nyi ninga nyumba yaye na yi tade khu parata ni ndralama, eni kha nyi dzi kodzi gu hambanisa guruma ga Pfhumu Nungungulu, gasi gu gira nya sadi mwendro gu gira nyamba sadi, khu gugola gwangu. Iso Pfhumu Nungungulu a nyi embelago khiso basi nyi na gu ganelago.

¹⁴ Olu nyi ngu bwelela tigoni gwangu; aholu delu nyita gu embela iso si na girwago khu vathu vava omu tigoni gwago khu matshigu ma nga gutago.

Wuprofeti wa Bhalahama. Nyeledzi ya Jakobe

¹⁵ Bhalahama a di gira wuprofeti waye, a ganela, khuye: Magana ya Bhalahama, mwamana wa Bheyori, magana ya muthu nya gowone misihalo;

¹⁶ magana ya muthu a yingisago mahungu ya Nungungulu, oyu a gu pimago guti gwa Uye a Khusegidego Ngudzu, uye a wonago Nungungulu nya Tshivba Yatshavbo, uye a dzi nogisago aholu na ma tulegide maho yaye.

¹⁷ Eni nyi ngu mu wona, aholu khandri olu, nyi na mu khedza, aholu nasiri khu vbafuvbi; gu na duga nyeledzi khavbo ga Jakobe ni ndronga nya wufumu khavbo ga Israyeli. Yi na khungumula mihungo ya va na Mowabhi, yi mbembisa sanana satshavbo sa Seti.

¹⁸ Edhomi a na fumedwa khuye, ambari nala waye Seyiri, a na fumedwa khuye, Israyeli a na yeyedza tshivba yaye.

¹⁹ Khu ga Jakobe gu na duga mufumeli, a na mbembisa avo vatshadego madhoropani.

²⁰ Avbo Bhalahama a nga wonago Amaleki a di mu profeta, khuye: “Amaleki khuye nya guphele ga mayigo yatshavbo. Aholu khu mahegiso a na mbembiswa.”

²¹ Avbo Bhalahama a nga wonago Vakheni, a di ganela wuprofeti waye, khuye: Nyumba yago yi tiyide, ni gihaga gyago gi vbahidwe musiwindrini!

²² Aholu gihaga gyogyo gi na vbiswa, Asuri a na gu vbagela a gu yisa wugumbitunu.

²³ Bhalahama a di engedza a lola, khuye: Libango ga uye a na tshalago, gikhati Nungungulu a na girago esi!

²⁴ Valala va nata khu mataro khu Kitimi; va nata khozisa Asuri, va mbembisa gambe Ebheri; aholu avo navo va na mbembiswa.

²⁵ Khavbo avbo, Bhalahama a di khuga a bwelela tigoni gwaye, Bhalaki nuye a bwelela khu yaye ndzila.