Mitengo 22 - Bhibhiliya Nya Guage

III. GIPANDRE GYA NA MOWABHI Bhalaki a ngu rumela myango ga Bhalahama

¹ Va na Israyeli va di khuga va ya ghova mikovani ya Mowabhi, tshatugo wa Joridhani wu khedzanago ni Jeriko.

² Bhalaki, mwamana wa Kipori, a di wona iso si nga girwa khu va na Israyeli ga Vaamori.

³ Mowabhi a di khala hwanga mbeli ga vathu vale nya vangi ngudzu; khavbo avbo, Mowabhi a di ndrendremela khu gu thava va na Israyeli kholu va diri vangi.

⁴ Mowabhi a di embela madhota ya Madhiyani, khuye: “Khu githugedza gidzemo gegi gi na ta vbiyela tigoni gwathu kha nga idzo mombe yi vbiyelago khidzo mwasi wa khabini!” Khu hwane, Bhalaki, mwamana wa Kipori, a diri mufumeli wa Vamowabhi khu gikhati gyogyo.

⁵ A di rumela myango ga Bhalahama, mwamana wa Bheyori, tigoni ga Petori, gu khadego vbafuvbi ni tsongo wa Ewufrate, tigoni ga vathu vaye, gasi gu ya mu rana, a mu embela, khuye: “Wona gukhuwe vomo vathu va dugidego khu tigoni ga Egipito; olu va phorodzide litigo leli, va ti vbaha khu mbeli gwangu.

⁶ Gasi olu, hi ngu gu lomba gukhethu u ta khu guvbiredza u ta yuyutela vathu vava, kholu va na ni tshivba gu nyi vbindra. Khu guralo, eni kha nyi na dzi kodza gu va pala, ni gu va tutumisa tigoni momu, kholu nyi ngu dziti gukheni uwe, uye u mu kategisago, kategide, ni oyu u mu valago a vadwe.”

⁷ Vasingalagadzi va Mowabhi ni vasingalagadzi va Madhiyani, va di hongola na va pharide tengo nya gulivbe wuprofeti waye. Avbo va nga vbohago vbafuvbi ni Bhalahama, va di ya mu embeledzela magana yatshavbo ya Bhalaki.

⁸ Aholu uye a di va embela, khuye: “Khalani avba wutshigu wowu nyi na ta mi ningani phindrulo nya idzo Pfhumu Nungungulu a na gu nyi embelago khidzo.” Khavbo avbo, vasingalagadzi va Mowabhi va di khala ni Bhalahama.

⁹ Aholu Nungungulu a di hidzimela ga Bhalahama aya mu embela, khuye: “Gasi khu vamani vama vava u gu navo avba?”

¹⁰ Bhalahama a di hakha Nungungulu, khuye: “Bhalaki, mwamana wa Kipori, mufumeli wa Mowabhi, a di rumela gu ta nyi embela, khuye:

¹¹ Wona nya gukhuwe lomo lifumbu li dugelago khu tigoni ga Egipito, olu va phorodzide litigo leli. Khu guralo, delu, u ta va yuyutela. A gudzina saye eni nyi na kodza gu va dwanisa ni gu va tutumisa.”

¹² Aholu Nungungulu a di embela Bhalahama, khuye: “U nga hongoli navo; gambe u nga yuyuteli vathu vovo, kholu va kategide.”

¹³ Bhalahama a di wuga na gu ngari dzimindru ngudzu a embela vasingalagadzi va Bhalaki, khuye: “Bwelelani tigoni gwanu, kholu Pfhumu Nungungulu kha nyi dzumedzisi gukhuye nyi hongole nanu.”

¹⁴ Vasingalagadzi va Mowabhi ma di bwelela, vaya ga Bhalaki, va ya mu embela, khavo: Bhalahama kha dzumela gu wuya ni ethu.

¹⁵ Bhalaki a di engedza gambe gu rumela vambe vasingalagadzi nya mangi ni guthavisega ngudzu guvbindra vale nya guhegule.

¹⁶ Va diya ga Bhalahama, va ya mu embela, khavo: Bhalaki, mwamana wa Kipori, a ngu ganela kharati, khuye: “Nyi ngu gu lomba u nga bombi guta eno gwangu,

¹⁷ kholu nyi na gu fenengedza khu wudhumo nya wukhongolo ngudzu ni gu gira satshavbo esi u na nyi rumago. Khu guralo, nyi ngu gu lomba, delu u ta nyi yuyutelela vathu vava.”

¹⁸ Bhalahama a di embela sithumi sa Bhalaki, khuye: “Ambari nari pwani Bhalaki a di nyi ninga nyumba yaye na yi tade khu ndralama ni parata, gima kha nyi na hambanisa sileletelo sa Pfhumu Nungungulu wangu, khu gu gira gilo nya gikhongolo ambari nya gidugwana.

¹⁹ Gasi olu, nyi ngu mu lomba khalani avba gambe wutshigu wowu, nya gu vbweta gu ya ganela ni Pfhumu Nungungulu, kala nyiti iso a vbwetago gu nyi embela gambe.”

²⁰ Pfhumu Nungungulu a dita ga Bhalahama ni wutshigu a ta mu embela, khuye: “Kha nga vama vovo va dzudego gu ta gu rana, khuga u hongole navo; aholu u na ya gira basi igyo nyi na gu rumago.”

Ngilozi ya Pfhumu Nungungulu ni buru ya Bhalahama

²¹ Khu guralo, Bhalahama a di khuga ni dzimindru ngudzu, a ghabhata buru yaye a hongola gumogo ni vasingalagadzi va Mowabhi.

²² Khu guralo, Nungungulu a di goroga ngudzu naye kholu a nga hongolago; Ngilozi ya Pfhumu Nungungulu yi di mu khinga yi ema khu ndzilani yi mu himbedzela. Uye a di khilede vbatshani nya buru yaye na gu bangaladzwa khu sithumi saye sa sivili.

²³ Buru yi di wona Ngilozi ya Pfhumu Nungungulu na yi emide vbakari nya ndzila na yi homode litshari yi phara mandzani; khavbo avbo, buru yi di ndreya yi bela khabini. Bhalahama a di veta buru gasi yi wuye ndzilani.

²⁴ Aholu Ngilozi ya Pfhumu Nungungulu yi di ema nyaluphye khu vbakari nya ndzila nya guhonge vbakari nya lithembwe nya vhinya, na yi bhiyidwe eno ni eno.

²⁵ Buru yi di engedza yi wona Ngilozi ya Pfhumu Nungungulu, yi di ya kwekela vbalibhiyotunu, Bhalahama a manywa litundru; a di engedza a yi veta.

²⁶ Ngilozi ya Pfhumu Nungungulu yi di thanga nyaluphye yi ya ema khu wulanga nya gukhume ngudzu, wu nga bani wu si dzumeli gu ndreyela nyamudye mwendro nyambade.

²⁷ Avbo buru yi nga wonago Ngilozi ya Pfhumu Nungungulu yi di thega vbavbatshi; Bhalahama a di goroga ngudzu, a yi veta khu ndronga.

²⁸ Khavbo avbo, Pfhumu Nungungulu a di tula likana nya buru, yi embela Bhalahama, khiyo: “Gasi nyi di gu ghohela ginani, olu u nyi vetidego dzinyondro dzedzi dza dzitharu?”

²⁹ Bhalahama a di embela buru, khuye: “Gasi wa gu hagana kheni khu ginani? Naripwani nyi diri ni litshari mandzani olu kamwe na nyi gu songa!”

³⁰ Buru yi di hakha, khiyo: “Gasi khandri nyi buru yago, u nyi khilelago matshigu yatshavbo kala muhuno, gani? Ina nyi ngu tshuka nyi gira nya nga esi, gani?” Uye a di hakha, khuye: “Ahihi.”

³¹ Khavbo avbo, Pfhumu Nungungulu a di tula maho ya Bhalahama, uye a di wona Ngilozi ya Pfhumu Nungungulu na yi emide ndzilani, na yi homode litshari yi phara mandzani; uye a di khidzima a yi khozela na tsitside khu khovbe mafuni.

³² Ngilozi ya Pfhumu Nungungulu yi mu embela, khiyo: “Khu ginani u vetidego nyondro tharu buru yago? Kheni nyi dzudego guta gu himbedzela, kholu ndzila yeyi yi ngu hambana ni eni.

³³ Buru yi nyi wonide nyondro tharu yi ndreya avbo gwangu, naripwani kha ya nga ndreya, a gu dzina saye olu nyi na gu songide iyo yi tshala yi vbanya.”

³⁴ Bhalahama a di hakha Ngilozi ya Pfhumu Nungungulu, khuye: “Nyi ghohide, aholu kha nya nga dziti gukheni u emide ndzilani, khu mbeli gwangu; khu satshavbo soso sa gu bani si vivbide mahoni gwago, nyi na bwelela gaya.”

³⁵ Aholu Ngilozi ya Pfhumu Nungungulu yi di hakha Bhalahama, khiyo: “Indra ni vama vava aholu indra u ya ganela basi igyo nyi na gu rumago gu ya ganela.” Bhalahama a di simama a hongola ni vasingalagadzi va Bhalaki.

Bhalahama ni Bhalaki

³⁶ Avbo Bhalaki a ngapwago gupwani Bhalahama vbohide, a di mu khinga dhoropani nya gupwani Mowabhi, li nga bani li khade vbafuvbi ni vbinganoni ga Arinoni, mahegiso nya litigo.

³⁷ Bhalaki a di wudzisa Bhalahama, khuye: “Ina khwa nga pwa olu nyi nga bani nyi rumede vathu gu ta gu rana, khu ginani u nga mbata? Ina eni kha nyi dzi kodzi gu gu girela wudhumo nya wukhongolo, gani?”

³⁸ Bhalahama a di hakha Bhalaki, khuye: “Kheni oyu, nyi womo avba, nago! Olu, nyi ngu dzi kodza gu gu embela nya gukari, gani? Nyi na gu embela esi Nungungulu a si vegidego kanani gwangu; khiso basi nyi na gu embelago!”

³⁹ Bhalahama a di longoloka ni Bhalaki va vboha Kiriyati-Huzoti.

⁴⁰ Bhalaki a di songa dzimombe ni dzinvuta, a rumela gipandre ga Bhalahama ni ga vasingalagadzi a ngatago nawo.

⁴¹ Na gu ngari dzimindru ngudzu, Bhalaki a di ya dzega Bhalahama a gwela naye Bhamoti-Bhahali, Bhalahama a di ya wona khu vbale mahegiso nya lizumbo nya vathu va na Israyeli.