Mitengo 20 - Bhibhiliya Nya Guage

Gufa ga Miriyamu

¹ Khu ngima nya guhegule, tshangano watshavbo wa na Israyeli, wu di vboha giwulani gya Zimi, Vathu va diya ghova Kadesi; Miriyamu a difa, va mu dzinga vbale.

Mosi a ngu pandra giwindri Meribha

² Vbale gu diri mwalo mati nya gusele, khu guralo, vathu vatshavbo va di tombana va wugela Mosi ni Aroni.

³ Vathu va di phela gu gu ganedzisana ni Mosi, khavo: “I tshukwana na hi fude gumogo ni vandriyathu mbeli ga Pfhumu Nungungulu.

⁴ Khu ginani u residego tshangano wa Pfhumu Nungungulu giwulani momu, gasi hi tafa umo, ethu ni sifuyo sathu?

⁵ Khu ginani u hi dusidego khu Egipito u hi resa wulanga wowu nya guvbise kharati? Wulanga nyamba buga mbewu, nyambana mihandro, nyambana vhinya, madimwa ambari mati nya gusele?”

⁶ Khavbo avbo, Mosi ni Aroni, va di khuga vbatshanganotunu, va hongola vbamwanyatunu nya Tshatsha nya Tshangano va ya thega vbavbatshi khu dzikhovbe dzawe; gungangamela ga Pfhumu Nungungulu gu di wonega vbakari gwawe.

⁷ Pfhumu Nungungulu a di ganela a embela Mosi, khuye:

⁸ Dzega ndronga u rana tshangano, uwe ni ndriyago Aroni, mu na ganela ni giwindri na mu gu wonwa khu vatshavbo, igyo gi na dusa mati; khu guralo, u na va dusela mati khu giwindrini, u ninga tshangano wu sela avo ni sifuyo sawe.

⁹ Khavbo avbo, Mosi a di dzega ndronga mbeli ga Pfhumu Nungungulu, kha nga idzo a nga leletedwago khidzo.

¹⁰ Mosi ni Aroni va di tombanisa Tshangano mbeli nya giwindri, a va embela, khuye: “Enu vawugeli nenu, olu yingisani. Ina hi ngu dzi kodza gu dusa mati giwindrini momu mu selani, gani?”

¹¹ Mosi a di khusa mandza yaye a veta giwindri nyondro mbili khu ndronga yaye. Khavbo avbo, ma di duga mati nya mangi; tshangano wu di sela gumogo ni sifuyo sawe.

¹² Pfhumu Nungungulu a di embela Mosi ni Aroni, khuye: “Kholu mu ngamba khodwa gwangu, gasi mu nyi agisa mbeli ga va na Israyeli, kha mu na bedza tshangano yoyu ga litigo nyi na gu va ninga.”

¹³ Aya khayo mati ya Meribha, avbo va na Israyeli va nga ganedzisanago ni Pfhumu Nungungulu, Uye a va yeyedzide wuwadi waye khu ayo.

Mosi a ngu tivisa gutsemakanya khu tigoni ga Edhomi

¹⁴ Mosi nari tigoni ga Kadesi, a di rumela myango ga mufumeli wa Edhomi gu ya mu embela, khavo: “Ndriyago Israyeli a ngu ganela, kharati: Uwe u ngu siti gwadi sigaradzo satshavbo hi si manidego.

¹⁵ Vababe vathu va relede tigoni ga Egipito, umo va nga ya vbanyago gikhati nya gulaphe ngudzu, aholu Vagipiti va hi tshaniside ethu gumogo ni vababe vathu.

¹⁶ Ethu hi lide ga Pfhumu Nungungulu; Uye pwide lito lathu, a hi rumela Ngilozi mweyo, gasi gu ta hi dusa khu Egipito. Olu, ethu hi womo Kadesi, ga lidhoropa li guromo vbafuvbi ni vbinganoni nya litigo lago.

¹⁷ “Hi dige hi tsemakanya khu tigoni gwago; kha hi na vbindra khu mahangeni, mwendro umo nya vhinya ambari gu sela mati ya milamboni; hi na gimbila khu ndzila; kha hi na phawuga nyambade mwendro nyamudye, kala hi tsemakanya tigoni gwago.”

¹⁸ Aholu, Edhomi a di hakha, khuye: “U nga vbindri khu tigoni gwathu nyi nga gu khinga nyi ta dwana nago khu matshari.”

¹⁹ Va na Israyeli va di hakha, khavo: “Hi na bela khu ndzila nya likondro, ha gu ta sela mati yanu eni gumogo ni mitshambi yangu, hi na livba tengo u na wunago; u nga kanakani khu gu hi diga hi vbindra.”

²⁰ Aholu uye a di va hakha, khuye: “Mu nga vbindri khavba.” Edhomi a di duga khu guvbiredza a mu khinga nari ni vathu nya vangi va somidego.

²¹ Avbo va na Israyeli va nga wonago gukhavo va ngu himbedzedwa khu Edhomi gu bela tigoni gwaye, avo va di bela khu yimbe ndzila.

Gufa ga Aroni

²² Va di khuga khu Kadesi gumogo ni tshangano watshavbo wa na Israyeli, va vboha gigomoni gya Hori.

²³ Pfhumu Nungungulu a di embela Mosi ni Aroni gigomoni gya Hori, mivbinganoni nya litigo la Edhomi, khuye:

²⁴ “Aroni a na ya lala gumogo ni vakokwe vaye, kholu kha na bela tigoni eli nyi ningidego sanana sa Israyeli, kholu mu ngamba yingisa lito langu matini ya Meribha.

²⁵ Dzega Aroni ni mwanaye Eleyazari, u gwela navo gigomoni gya Hori.

²⁶ Tshula dzingandzu dza Aroni u ambagisa mwanaye Eleyazari; kholu Aroni a na ya tshangana gumogo ni va na gyawe afela kamwe vbale.”

²⁷ Mosi a di gira kha nga idzo Pfhumu Nungungulu a nga mu leletelago: Va di gwela gigomoni gya Hori na va gu wonwa khu tshangano watshavbo.

²⁸ Mosi a di tshula dzingandzu dza Aroni a ambagisa mwanaye Eleyazari. Aroni a di fela vbale, tshokani nya gigomo. Mosi ni Eleyazari va di tshiga khu vbatshani nya gigomo.

²⁹ Tshangano watshavbo khu gu wona nya gukhavo Aroni fude, vatshavbo va na Israyeli va di lila Aroni gipimo nya magumararu matshigu.