Mitengo 17 - Bhibhiliya Nya Guage

Ndronga ya Aroni yi ngu thela senge

¹ Pfhumu Nungungulu a di embela Mosi, khuye:

² “Ganela ga sanana sa Israyeli, va gu resela dzindronga dzawe, edzi dzi na dugago khu ga vathangeli va dugelago khu ga lihundzu la vababe vawe, va resa gwago, dzi na enedza likhumi na dzimbili dzindronga; u na lova lina la muthu ni muthu avbo nya ndronga yaye.

³ Aholu lina la Aroni u na li lova avbo nya ndronga ya Levhi; kholu muthangeli ni muthangeli nya linyumba la vababe vawe a na bani nari ni ndronga.

⁴ U na dzi vega ndrani nya Tshatsha nya Tshangano vbafuvbi ni Ngasa nya Gidzumeledzwano avbo nyi tshanganago nanu.

⁵ Ndronga ya muthu nyi na muhathago, yi na thela wenge; khu magirelo yoyo, nyi na degudza va na Israyeli va khalago khu gu mi lemba.”

⁶ Khavbo avbo, Mosi a di ganela ga va na Israyeli magana yaya. Vathangeli vawe vatshavbo va di resa dzindronga dzawe, moyo ni moyo a ningela ndronga yaye, gukhedza khu dzinyumba dza vababe vawe, dzatshavbo dzi diri likhumi na dzimbili dzindronga. Ndronga ya Aroni yi diri mweyo nya idzo.

⁷ Khu guralo, Mosi a di vega dzindronga dzedzi mbeli ga Pfhumu Nungungulu, umo nya Tshatsha nya Gidzumeledzwano.

⁸ Khu litshigu li landrelago, Mosi a di bela umo nya Tshatsha nya Gidzumeledzwano. Khavbo avbo, a di ya wona ndronga ya Aroni na yiri ni wenge, eyi a gu ya linyangwa la na Levhi; kholu yi di nyugide bwelo khavbo yi thela senge, na yiri ni mihandro yi vidzidwego.

⁹ Khavbo avbo, Mosi a di dzega dzindronga dzatshavbo mbeli ga Pfhumu Nungungulu a dzi yisa ga va na Israyeli vatshavbo. Avo va di ta dzi wona, muthu ni muthu a dzega ndronga yaye.

¹⁰ Pfhumu Nungungulu a di embela Mosi, khuye: “Bweledza ndronga ya Aroni ndrani nya Tshatsha nya Gidzumeledzwano, gasi yi khala giwoniso ga sanana sa avo nyamba yingisa; khu guralo, u na vbedza milembo yatshavbo yawe va nyi girelago, gasi va sifi.”

¹¹ Mosi a di gira kharato; kha nga idzo a nga leletedwago khidzo khu Pfhumu Nungungulu, a gu gira kharato.

¹² Khavbo avbo, va na Israyeli va di ganela ga Mosi va mu embela, khavo: “A gu bani nari kharato hi vbede, hi fude! Hi na bani hi fude ethu hatshavbo!

¹³ Watshavbo wule a na gu hidzimelago vbafuvbi nya Tshatsha wa Pfhumu Nungungulu a nafa; gu yeyedza gupwani hatshavbotu hi na vbela, gani?”