Mitengo 13 - Bhibhiliya Nya Guage

Mosi a ngu rumela vasoli tigoni ga Khanani

¹ Pfhumu Nungungulu a di embela Mosi, khuye:

² “Rumela vama va ya sola litigo la Khanani, nyi vbwetago gu li ningela ga sanana sa Israyeli; ga lihundzu ni lihundzu la vababe vawe mu na rumela mwama moyo, nya muthangeli vbakari gwawe.”

³ Mosi a di va rumela kha nga guleletela ga Pfhumu Nungungulu, vama vale nya vathangeli va na Israyeli, nari khu giwulani ga Parani.

⁴ Malina yawe a diri aya: Ga lihundzu la Rubheni, Samuwa, mwamana wa Sakuri;

⁵ ga lihundzu la Simiyoni, Safati, mwamana wa Hori;

⁶ ga lihundzu la Judha, Kalebi, mwamana wa Jefone;

⁷ ga lihundzu la Isakari, Jigeyali, mwamana wa Josefe;

⁸ ga lihundzu la Efrayimi, Hoseya, mwamana wa Nuni;

⁹ ga lihundzu la Bhejami, Pilati mwamana wa Rafu;

¹⁰ ga lihundzu la Zebhuloni, Ghadhiyeli, mwamana wa Sodi;

¹¹ ga lihundzu la Josefe, khu nyumbani ga Manasi, Gadhi mwamana wa Susi;

¹² ga lihundzu la Dhani, Amiyeli, mwamana wa Gemali;

¹³ ga lihundzu la Aseri, Seturi, mwamana wa Migeli;

¹⁴ ga lihundzu la Nafitali, Nahabhi, mwamana wa Vapisi;

¹⁵ ga lihundzu la Gadhi, Geweli, mwamana wa Maki.

¹⁶ Aya khu malina nya vama va rumedwego khu Mosi gasi gu ya holelela litigo la Khanani, Mosi a di riya Hoseya, mwamana wa Nuni lina nya gukhuye khu Josuwa.

¹⁷ Mosi a di va rumela gu ya sola litigo la Khanani, a va embela, khuye: “Gwelani khu phuvbo ga Negebhi mu hongola kala sigomotunu.

¹⁸ Mu wona litigo muni ilolo, vathu muni va vbanyago umomo, va na ni tshivba mwendro va mwalo nayo, vangi mwendro vadugwana.

¹⁹ Mu wona gambe mafu va vbanyago umo, khyadi mwendro khandri yadi; ni madhoropa va vbanyago umo, mwendro ma na ni mazumbo mwendro ma bhiyidwe.

²⁰ Mu wona gambe ni mafu yakone, ma nonide mwendro kha ma nona, misimbo yomo mwendro yi mwalo. Tiyani longo, mu nga thavi, mu na ya wuya ni mihandro nya litigo lolo; kholu nango yakone a diri iyo nya guphele guvidzwa dziuvha.”

²¹ Khu guralo, va di gwela va ya sola litigo; gukhugela giwulani ga Sine kala Reyobhi, khu ndzila yi yago Hamati.

²² Va di gwela khu Negebhi va vboha Hebroni, avbo va nga bani va romo Ayimani, Sesayi ni Talimayi, livelego la Anaki. Lidhoropa la Hebroni khilo li nga phela gu vbahwa, livbandre na mivili myaga na li si gu vbahwi la Sowani ga Egipito.

²³ Va di vboha kovani wa Esikoli, avbo va nga ya pila litamo na liri ni gitsatsa nya gikhongolo nya dziuvha, va gi rwala khu pingwi nari vama vavili; va di resa gambe ni maroma ni dzindzawa.

²⁴ Wulanga wowo va di wu rana khavo Kova wa Esikoli khu kota nya gitsatsa nya dziuvha va nga pilago vbale va na Israyeli.

Mawonelo ya vasoli nya litigo la Khanani

²⁵ Guvbelani nya magumana matshigu, va di bwelela khu gusolani nya litigo.

²⁶ Va di wuya ga Mosi, ni Aroni gumogo ni tshangano watshavbo wa na Israyeli giwulani ga Parani, tigoni gwa Kadesi. Va ta va embeledzela esi va nga ya si wona ni wufakazi watshavbo, va gu va nonedza mihandro nya litigo.

²⁷ Va di ta embeledzela Mosi, va ganela, khavo: “Hi hongode ga litigo eli u hi rumedego; khu lisine litigo li gogago mahwe ni wulombe, mihandro yakone kheyi.

²⁸ Aholu, vathu va vbanyago tigoni momo va na ni tshivba ngudzu, va na ni madhoropa nya makhongolo ngudzu ma bhiyidwego, iyoyo hi wonide gambe situgulwana sa Anaki.

²⁹ Amaleki a vbahide tigoni gwa Negebhi, Vahiti, Vajebhusi, Vaamori va vbahide gigomoni; Vakhanani va vbahide vbafuvbi ni yiphwa khu dzibambe nya tsongo wa Joridhani.”

³⁰ Aholu Kalebi a di degudza vathu, kholu va di gu gorogela Mosi; a ganela, khuye: “Hongoleni, hi na ya dzega litigo lolo, kholu khu lisine hi na ya va pala.”

³¹ Aholu vathu vale a nga hongola navo, va di ganela, khavo: “Gima kha hi na nga dzi kodza gu va pala, kholu avo va na ni tshivba ngudzu guvbindra ethu.”

³² Khu guralo, va di sawutela guvivba khu litigo lile va li sodego, mbeli ga va na Israyeli, va ganela, khavo: “Litigo leli hi li tsemakanyidego hi li holelela, litigo li songago vavbanyi valo; vathu vatshavbo hi va wonidego va laphide ngudzu.

³³ Gambe iyoyo hi wonide sidandrangulu nya sanana sa Anaki, nya lifumbu nya vadandrangulu; guwonani gwathu, hi di fanana ni dzimbera mbeli gwawe, avo navo va di hi fananisa ni dzimbera.”