Mitengo 10 - Bhibhiliya Nya Guage

Mipundru mivili nya parata

¹ Pfhumu Nungungulu a di engedza a ganela ga Mosi, khuye:

² “Gira mipundru mivili nya parata; u na yi gira khu parata nya gupfhudwe, u na yi thumisa gu tombanisa khiyo mitshangano ni gu tivisa gukhuga nya mazumbo.

³ Ya gu wombwa ya mivili, tshangano watshavbo wu na ta tombana gwago vbamwanyatunu nya Tshatsha nya Tshangano.

⁴ Aholu wa gu wombwa moyo basi, khavbovbo gu na ta tshangana avbo gwago, manganagana ni vathangeli vatshavbo nya sikwata nya likhumi mazana (1.000) ya na Israyeli.

⁵ Avbo wu na gu wombwago pundru, khavbo avbo avo va zumbidego khu Khugadambo va na khuga va gimbila.

⁶ Aholu mwa gu womba pundru khu gikhati nya wuvili, va na khuga avo va ghovidego lizumboni khu phuvbo ga Marandzi; wu na wombwa pundru khu wughoveloni, gasi va khuga.

⁷ Aholu mwa gu vbweta gu tombanisa tshangano, mu na womba mipundru, aholu khu mambe mawombelo.

⁸ Avo va yelago gu womba mipundru yeyi, khu vaphasi nya mhamba nya livelego la Aroni. Nayo yoyu khwa gu kala gupindruga, wu na simama kala ga sanana sanu.

⁹ Mwa gu soma nyimbi tigoni gwanu guya dwana ni valala vanu vatago va ta mi dhumela, gu vbweta mu womba mipundru yi dzuma ngudzu. Khu guralo, Eni Pfhumu Nungungulu, nyi na mi alakanyani nyi mi vbulugisa ga valala vanu.

¹⁰ Gutsakani gwanu gambe, matshigu nya mibuzo nya yikhongolo ni litshigu nya guphele nya ngima, avbo mu girago miphaso nya guvbiswe numo nya miphaso nya gubonge, mu na womba mipundru. Isoso si na bani siri gialakanyiso, gasi Nungungulu wanu a mi dundrugani. Eni kheni Pfhumu Nungungulu wanu.”

II. KHU SINAYI KALA VBINGANONI WA MOWABHI Va na Israyeli va ngu khuga khu giwulani ga Sinayi

¹¹ Khu mwaga nya wuvili, khu litshigu nya magumavili nya ngima nya wuvili, lipfhi li di khuga khu vbatshani nya Tshatsha nya Tshangano.

¹² Va na Israyeli va di khuga va phara ndzila va hongola, va diga giwula gya Sinayi. Lipfhi li diya ema giwulani ga Parani.

¹³ Gu diri gikhati nya guhegule va nga khugago, khu gu yingisa sileletelo sa Pfhumu Nungungulu, a nga leletelago Mosi.

¹⁴ Guhegula gu di thanga mbeli lihundzu la Judha khu sikwata na vari ni ngavbya yawe na va gu thangedwa khu Nasoni, mwamana wa Aminadhabhi.

¹⁵ Nataniyeli, mwamana wa Sowari, a diri muthangeli nya lihundzu la va na Isakari.

¹⁶ Avbo nya gikwata nya lihundzu la Zabhuloni, va di thangedwa khu Eliyabhi, mwamana wa Heloni.

¹⁷ Va di tshula Tshatsha nya Wulanga nya Guage, va na Gerisoni ni va na Merari khavo va nga rwala Tshatsha.

¹⁸ Khu hwane gu di khuga ngavbya ya lizumboni la na Rubheni, khu sikwata sawe; na va gu thangedwa khu Elizuri, mwamana wa Sedhewuri.

¹⁹ Gikwala nya lihundzu la na Simiyoni, va di thangedwa khu Selumiyeli, mwamana wa Surisadhayi.

²⁰ Gasi gikwata nya lihundzu la na Gadhi, va di thangedwa khu Eliyasafi, mwamana wa Dheweli.

²¹ Khu hwane gu di khuga va na Khowati, va rwala sombo nya guage; avo va thangidego va diri ni fanelo nya guvbiredzele gu tsitsa tshatsha gasi va na Khowati va tago khu hwane, vata wu mana na wu tsitsidwe.

²² Khu gulandrela, gu di khuga situgulwana nya lihundzu la na Efrayimi, khu sikwata sawe na va pharide ngavbya nya lihundzu lawe, na va gu thangedwa khu Elisama, mwamana wa Amiyudhi.

²³ Avbo nya gikwata nya lihundzu la na Manasi, va di thangedwa khu Gamaliyeli, mwamana wa Pedhasuri.

²⁴ Gikwata nya lihundzu la na Bhejami, va di thangedwa khu Abhidhani, mwamana wa Gidheyoni.

²⁵ Khu hwane gu khuga ngavbya ya lizumboni la va na Dhani, gasi gu sega mazumbo yatshavbo, na va gu thangedwa khu Ayezeri, mwamana wa Amisadhayi.

²⁶ Gikwata nya lihundzu la na Aseri, gi di thangedwa khu Pagiyeli, mwamana wa Okarani.

²⁷ Ayira, mwamana wa Enani, a di thangela gikwata nya lihundzu la na Nafitali.

²⁸ Aya khayo makhugelo ya sanana sa Israyeli, gukhedza khu sikwata sawe, avbo va nga bani va gu khuga.

Mosi a ngu lomba Obhabhi gu hongola naye

²⁹ Khavbo avbo, Mosi a di embela Obhabhi, mwamana wa Reweli, nya Mumedhiyani, sade wa Mosi, khuye: “Olu ethu hi ngu hongola ga wulanga, Pfhumu Nungungulu a ganedego, khuye: Nyi na mi ningani; hongole hatshavbo hi na ya gu phara gwadi; kholu Pfhumu Nungungulu tumbiside silo nya sadi ga va na Israyeli.”

³⁰ Uye a di hakha, khuye: “Eni kha nyi na hongola; aholu nyi na hongola tigoni gwangu ni gwa gilongoni gyangu.”

³¹ Mosi a di ganela, khuye: “U nga hi digi, nya gu gu lomba, kha nga olu u yitigo mipfhuka yathu giwulani momu, uwe u na khala maho yathu.

³² Kholu uwe wa gu longoloka ni ethu, esi nya sadi a na gu hi girelago Pfhumu Nungungulu, ethu nethu hi na gu girela.”

³³ Khu guralo, va di khuga khu gigomoni gya Pfhumu Nungungulu, va dzega pfhuka nya matshigu mararu; Ngasa nya Gidzumeledzwano gya Pfhumu Nungungulu, yi di thanga mbeli gwawe, pfhuka nya matshigu mararu gasi gu vbweta wulanga nya guhefemule avbo.

³⁴ Vbamihanitunu lipfhi la Pfhumu Nungungulu li diri vbatshani gwawe, gukhugani gwawe khu lizumboni.

³⁵ Sikhati yi khugago Ngasa, Mosi a di ganela, khuye: “Khuga Pfhumu Nungungulu U phalalegisa valala vago, vatshavbo vale va gu zondrago va na tutume mbeli gwago.”

³⁶ Gikhati va rulago Ngasa a di ganela, khuye: “Wuya Pfhumu Nungungulu, vbakari ga mazanazana ya va na Israyeli!”