Mavingu 5 - Bhibhiliya Nya Guage

Guthava nyamayi nya liphuphulu

¹ Mwanangu, yingisa guti gwangu, demba ndzeve upwa sileletelo sangu,

² Khu kharato, u na kodza gu mana mano nya yadi, khu kanani gwago, gu na duga mapimo nya yadi.

³ Kholu sigundruni ga nyamayi nya liphuphulu gu dota wulombe, ni kanani gwaye gu duga magana nya gukwirige guvbindra mafura.

⁴ Aholu guhegisani, magana yaye ma gu vava kha nga nyongwa, ma vbira kha nga litshari li lodzidwego eno ni eno.

⁵ Migondro yaye ya gu hongola gufatunu, ni magimbilelo yaye ma gu mu yisa thowoni.

⁶ Kha khathali khu ndzila yi hongolago guvbanyani, dzindzila dzaye kha dzi mu yisi danga; gambe uye mune kha dzi woni.

⁷ Gasi olu, mwanangu, nyi yingise; u nga hambani ni silayelo sangu.

⁸ Gimbilela hwindzo ga nyamayi yoyo, u nga tshuki u bela ndrangani gwaye,

⁹ gasi u si ningeli lisima lago ga valombo, ambari matshigu yago ga vasongi,

¹⁰ gasi va nya mayigo va si ghanyi khu thomba yago, ni handro nya tshivba yago wu ghanyisa ndranga ya mumbe muthu.

¹¹ U na hegisa khu gulila, gikhati nyama yago ni mili wago wu na bani wu vbede tshivba.

¹² Gasi u ganela, khuwe: “Khu ginani nyi nga bomba gulaywa! Monyo wangu wu bomba gu kawukwa?

¹³ Kholu kha nya yingisa vahevbudzi vangu, ambari gu yingela sileletelo sa valayi vangu.

¹⁴ Gu di tshala vbadugwana guthegela mhangoni nya yikhongolo vbakari nya tshangano watshavbo nya vathu.”

¹⁵ Tshima lidora khu mati ya namboni gwago, ni mati ma gogago khu pusuni gwago.

¹⁶ Ina u na diga mati yago ma vbalagela vbavbandze ni sitsongwana sago si goga dzindzilani, gani?

¹⁷ Isoso si na khale sago basi, si nga manwi khu va nya mayigo.

¹⁸ Wu na katege nambo wago! U tangadziswa khu mwangadzi wa wudzahani wago,

¹⁹ gukhwatshi yisya nya guhaladzege, wumburi gufanane ni mbavala, mavele ya mwangadzi wago ma na gu nengedzise gikhati gyatshavbo, lihaladzo laye li na gutsakise gikhati gyatshavbo.

²⁰ Mwanangu, khu ginani u sengedzedwago khu nyamayi nya gibhayi? Khu ginani u wugarelana ni nyamayi nya liphuphulu?

²¹ Pfhumu Nungungulu gikhati gyatshavbo a gu khevisela dzindzila nya muthu a mu khedza gwadi ni magimbilelo yaye.

²² Muthu nya guvivbe a na modwa khu nandru waye, a hungwa khu ngodzi nya sighoho saye.

²³ A nafa khu gumba yingisa a mbembiswa khu wupemi waye.