Mavingu 4 - Bhibhiliya Nya Guage

Sileletelo sa vavelegi giphaso nya guti

¹ Yingisani, vanavangu, sileletelo sa babe mu tule dzindzeve gasi mu kodze gupwisisa.

² Kholu gihevbudzo nyi mi ningago khyadi, khu guralo, mu nga tshuki mu hambana ni nayo wangu.

³ Eni neni nyi diri gyanana gya babe, nyi ngari dugwana ngudzu, nyiri eni basi gyanana nya gu godwe ngudzu khu mayi wangu,

⁴ uye a di nyi hevbudza, a nyi embela, khuye: Vegedza magana yangu monyoni gwago, u sayisa milayo yangu u na vbanya.

⁵ Dzi vbwetele guti, u dzi vbwetela mapimo, u nga divali ambari guhambana ni magana yangu.

⁶ U nga hambani ni guti, kholu gu na gu sayisa, gu gole, kholu gu na guvbanyisa.

⁷ Guti gilo nya guphele, gu gole, zama khu satshavbo u gu naso gasi u mane wugengeli.

⁸ Gu dandrise, ugo nugo wu na gu khusedza, wa gu gu gumbarela, ugo gu na gu dhumisa.

⁹ Gu na vega gihugu nya wumburi hungoni gwago, gu gu ambagisa hari nya wudhumo.

¹⁰ Yingisa, mwanangu, u hakha magana yangu, gasi u kodza guvbanya myaga nya gutale.

¹¹ Nyi gu hevbudzide khu dzindzila nya guti, nyi gu gimbidzisa khu sindzilana nya gululame.

¹² Wa gu gimbila khidzo, migondro yago kha yi na tshunganela, ambari wa gu tutuma khu na kwiriga u thega.

¹³ Vegedza gwadi sihevbudzo, u nga si digi si sayise, kholu khiso womi wago.

¹⁴ U nga gimbili khu sindzilana sa va nya guvivbedwa khu monyo, ambari gu longoloka ni sighohi.

¹⁵ Gimbilela hwindzo, u nga vbindreli vbafuvbi gwawe, ndreya u vbindrela wubambe gwawe.

¹⁶ Kholu kha va lali, na va si giri guvivba, kha va mani ligovbe, na va si gu thesi muthu.

¹⁷ Kholu, avo guhodza gwawe khu guvivba, va sela wadwa nya dzihanyi.

¹⁸ Aholu ndzila ya va nya gululama ya gu wenengedza kha nga wuronga nya gugye, wu wenengedzago kala gu gira safa nya mihani.

¹⁹ Aholu ndzila ya va nya guvivbedwa khu myonyo ya gu fanana ni gidema nya guthise, va gumba wona ni gilo gi va ghumulago.

²⁰ Mwanangu, yingisa magana yangu; u demba ndzeve upwa sileletelo sangu.

²¹ Maho yago ma nga hambani naso, si sayise ndrani nya monyo wago.

²² Kholu womi ga vale va si manago, si ngu vbanyisa mili wawe watshavbo.

²³ Guvbindra silo satshavbo, vegedza monyo wago, kholu khumo gu guromo guvbanya gwago.

²⁴ U nga tshuki u dusa sihonohono khu kanani gwago, hambana ni magana nya sihonohono.

²⁵ Maho yago ma na khedze mbeli basi, u si khwavbigi ndzilani gwago u khedza phuvbo.

²⁶ Khedza ndzila u gimbilago khiyo, dzindzila dzago dzatshavbo dzi na lulame!

²⁷ U nga ndreyi uya nyamudye mwendro nyambade, dusa ngondro wago guvivbani.