Mavingu 3 - Bhibhiliya Nya Guage

Gululeka nya guti

¹ Mwanangu, u nga divali nayo wangu, aholu vega monyoni gwago sirumo sangu,

² kholu si na gu engedzela matshigu yago nya guvbanye, si andrisa ni gu rudzisa womi wago.

³ Wuhindzi ni gutumbega u nga hambani naso! Si hungelele thamoni gwago, u si lova monyoni gwago!

⁴ Khu guralo, u na mana gukatega ni mapimo nya yadi mbeli ga Nungungulu ni ga vathu.

⁵ Tumba Pfhumu Nungungulu khu monyo wago watshavbo, u nga tumbi basi wugengeli wago!

⁶ Alakanya Uye dzindzilani gwago gwatshavbo, Uye a na lulamisa dzindzila dzago.

⁷ U nga dzi giri gigengeli mbeli Gwaye, thava Pfhumu Nungungulu, u hambana ni silo nya guvivbe.

⁸ Esi si na vbanyisa givili gyago, si tiyisa marambo yago.

⁹ Rungudza Pfhumu Nungungulu khu silo u gu naso, ni mihandro nya guhegule ya mahangeni gwago.

¹⁰ Sisangala sago si na tala khu mavbila, ni miphongolo yago yi na tala khu wadwa.

¹¹ Mwanangu, u nga bombi gu kawukwa khu Pfhumu Nungungulu, a gu gu tsayisa, u nga gorogi.

¹² Kholu Pfhumu a gu kawuka uye a mu golago, kha nga babe a vbwetago wuwadi ga gyanana gyaye.

¹³ Kategide muthu wule a manidego guti ni mapimo

¹⁴ kholu guti gu ngu phasa guvbindra parata, ni mihandro yaye ya guvbindra ndralama nya guhutwe.

¹⁵ Guti gu na ni lisima guvbindra sombo nya gukhedzige, gimwalo igyo u yelago gu gi gola nya gufanane ni ugo.

¹⁶ Gulapha nya matshigu nya guvbanye; gomo mandzani gwaye ga nyamudye; khu mandzani gwaye ga nyambade, yomo thomba ni wuzundzo.

¹⁷ Dzindzila nya guti, dza gutsakisa basi, ni sindzilana saye satshavbo, khya gurula.

¹⁸ Guti Simbo wu ningago womi ga vale va gu manelago, va kategide vatshavbo va gu sayisago.

¹⁹ Khu guti, Pfhumu Nungungulu a di vanga siseketelo nya litigo, a emisa damboni khu gupimisa.

²⁰ Khu guti gwaye ya gu tulega milondrwa nya guete, mapfhi ma thesa thondrwane.

²¹ Mwanangu, silo sesi si nga hambani ni maho yago; vegedza guti nya lisine li tiyidego.

²² Kholu si na khala womi nya hefemulo wago; si mburisa gwadi thamoni gwago.

²³ Khu guralo, u na gimbila ndzilani gwago u na tiyide, nyamba tshunganiswa khu gilo.

²⁴ Wa gu lala, khu na thava gilo, u na lala ligovbe nya gutangale.

²⁵ Khu na thurugiswa khu mhango nya githugedza u pilega hwambo, ambari khu mhango yi na dugelelago ga va nya guvivbedwa khu monyo.

²⁶ Kholu Pfhumu Nungungulu a na khala uye muvhikeli wago, a na sayisa migondro yago gasi yi si modwi khu naphwi.

²⁷ U nga bombi gu ninga giphaso ga oyu hamugago gya gu bani giri mandzani gwago.

²⁸ U nga embeli ndriyago, khuwe: “Wuya mindru nyi nata gu ninga gilogyo,” nu dzi kodza gu mu phasa muhuno.

²⁹ U nga lugeli makungo nya guvivbe muakelane wago, kholu uye a gu vbanya nago na gu tumba.

³⁰ U nga vbenyelani ni muthu mahala, na sa gu ghohela gilo.

³¹ U nga tsakeli muthu nya gigaha, ambari gu dogorela mavbanyelo yaye.

³² Kholu Pfhumu Nungungulu kha goli va nya guvivbedwa khu myonyo, aholu a gu tsakiswa khu va nya gululama.

³³ Pfhumu Nungungulu a gu vala dzindranga dza va nya guvivbedwa khu myonyo, aholu a kategisa dzindranga dza va nya gululama.

³⁴ Uye a na vala va tseketseli, a ninga tshivba avo va dzi nogisago.

³⁵ Wuzundzo thomba ya va nya guti, aholu sipumbu si na hakha tshatshazelo nya dzitshoni.