Mavingu 25 - Bhibhiliya Nya Guage

V. Mambe Mavingu ya Solomoni

¹ Aya gambe mavingu ya Solomoni, ma lovidwego khu vathu va Ezekhiya, mufumeli wa Judha.

² Wudhumo wa Nungungulu khu gu siha silo nya gukari, aholu wudhumo wa vafumeli, khu gu zama gu tugula misiholo.

³ Kha nga ndzadzini gu khugegidego, ni mafu ma etidego, kharato nugo nyonyoni ga vafumeli kha gu holeledwi.

⁴ Dusa manyelo nya parata, muwumbi a na gira khayo khali.

⁵ Gwa gu duswa sighohi mbeli ga mufumeli, gululama gwa gu tiyiswa vbagikhalotunu gwaye nya wufumu.

⁶ U nga dzi zundzi mbeli ga mufumeli, ambari gu lomba gu khala wulangani ga vathu nya guthavisege;

⁷ kholu gutshambide guranwa khu mufumeli gupwani: “Hidzimela eno,” guvbindra gupoyidwa mbeli ga mufumeli nya litigo.

⁸ Wa gu wona silo, u nga vbiredzeli guya ketsari, kholu muakelane wago a gu danga, u na khuwe ginani?

⁹ Lamulana ni muakelane wago, aholu u nga tugudzisi misihalo ya vakwanu;

¹⁰ Kholu oyu a gupwago, a na gu thela dzitshoni, noda yago yi si tshugi.

¹¹ Mahungu ma ganedwago khu gikhati gyaye, kha nga sifananiso nya makandzu nya ndralama ma tshavedwego somboni nya parata.

¹² Mulayi a layago khu wugengeli, ga muthu a yingisago, a gu fanana ni phera nya ndralama, mwendro wulungu nya ndralama yi hutidwego.

¹³ Mwango wu tumbegago ga avo va mu rumago, wa gu fanana ni thondrwane gikhati nya guvbwere, kholu, a ngu pepemedzisa mihefemulo ya vamune vaye.

¹⁴ Muthu a dzi zundzago khu miningelo a ngamba mi dusa, a gu fanana ni mapfhi ni phuvbo yi si wisigo ndzadzi.

¹⁵ Gutimisela gu ngu khongotela linganagana, ni lidimi nya gutiye, li ngu kodza gupandra sikongolo.

¹⁶ Wa gu mana wulombe, hodza basi pimo wu gu ninganago, kholu u nga kodwa khuwo u bwelo khavbo u wu gosa.

¹⁷ U nga tadzi migondro ndrangani ga muakelane wago, kholu, a nga garala khuwe, a phela gu gu venga.

¹⁸ Muthu a fakazago malipha, a wugela muakelane waye, a gu fanana ni litshari, gighomba ni giholoma nya gulodzwe si songago.

¹⁹ Gutumba mukanganyisi gikhatini nya sigaradzo, gu fanana ni likwaha nya gupandrege mwendro gugimbila khu litundru nya guhase.

²⁰ Uye a embelelago ndzimo ga muthu a gu ni wuvi, a gu fanana ni gu tshula libhadzi litshigu nya girame, mwendro gu mu thela ginageri vbagilondratunu.

²¹ Nala wago a gupwa ndzala, mu ninge guhodza a hodze, a gupwa lidora, mu ninge mati a sele.

²² Kholu wa gu gira kharato, uwe u na wungedzela magala nya gudzure hungoni gwaye, Pfhumu Nungungulu a na gu ninga tshatshazelo.

²³ Phuvbo nya ronga gu resa ndzadzi, kharato, muthu nya milembo guthuvigisa siwombo.

²⁴ I tshukwana gu khala vbalangwetunu nya nyumba, guvbindra gu khala khu ndrangani gakone, ni nyamayi nya siregera.

²⁵ Mahungu nya yadi ma dugelago tigoni ga hwindzo, ma gu fanana ni mati nya gudzidzile ma tshimago lidora.

²⁶ Muthu nya gululame a ndrendremelago mbeli ga muthu nya guvivbedwe khu monyo, a gu fanana ni nambo wu wunvudzwago, mwendro mati ma tadego khu ndzilo.

²⁷ Guhodza ngudzu wulombe khandri gwadi, kharato nugo wuzundzo nya gu dzi vbwetele, khandri wuzundzo.

²⁸ Muthu a gumba kodza gutimisela, a gu fanana ni lidhoropa likhokhola laye li khungumugidego.