Mavingu 23 - Bhibhiliya Nya Guage

¹ Wa guvbweta gu hodza ni mufumeli, guhegula vbweta gu wona khu mani a guromo mbeli gwago;

² u nga hodzi khu makolo, ambari nu gupwa ngudzu ndzala.

³ U nga dogoreli gu hodza silo nya gutshambe, kholu a gu dzina saye guhodza gu kanganyisago.

⁴ U nga dzi garadzi khu gu vbweta gu ghanya, mapimo yago, ma nga dzi vegiseli ngudzu umomo.

⁵ U nga vegi maho yago ga thomba u si yeligo gu yi mana, kholu iyo yi na mana mambapi kha nga lighama, yi vbuvba yiya damboni.

⁶ U nga hodzi guhodza ga muthu nya ligungo, ambari gu dogorela manonwa yaye;

⁷ kholu uye a gu pimisa basi guluza. Khu monyoni gwaye a gu ganela, khuye: “Hodza u sele!” Aholu kha ganeli khu gutiyisa.

⁸ U na gosa iso u hodzidego, u haganisela kharato magana yago nya yadi.

⁹ U nga dzi garadzi khu gubhula ni gipumbu, kholu igyo kha gi na khathala khu magana yago nya wugengeli.

¹⁰ U nga tshuki u vbindrugedza mivbingano yi pandridwego gale, ambari gu dzegela dzikhulungu wulime wawe;

¹¹ kholu muphodzeli wawe a na ni tshivba, a na dzi emela a dzi vhikela.

¹² Dzi garadze khu gu yingisa sileletelo, demba ndzeve u yingisa magana nya guti.

¹³ U nga digi gutsayisa gyanana gyago, kholu wa gu gi pitsa khu lipitso, kha gi na nga fa.

¹⁴ Wa gu gi tsayisa khu lipitso, u na bani u vbulugiside hefemulo waye gu bela phalani nya vafi.

¹⁵ Mwanangu, wa gu bani nuri ni monyo nya mapimo, monyo wangu neni wu na nengela.

¹⁶ Wa gu dusa magana nya yadi khu kanani gwago, monyo wangu wu na nengela ngudzu.

¹⁷ Monyo wago wu nga dogoreli sighohi, aholu uwe thava Nungungulu gikhati gyatshavbo.

¹⁸ Khu guralo khu matshigu matago, u na mana mavbanyelo nya yadi, gitumbo gyago kha gi na vbela.

¹⁹ Mwanangu, yingisa, gasi u kodze gu mana guti, zama gulandra ndzila nya gululame.

²⁰ U nga hengeli gumogo ni dzibewudzi, ambari ni va nya limidzo nya nyama.

²¹ Kholu bewudzi ni muthu nya limidzo, va na thega wusiwanani, ligovbe lawe li na va ambagisa siziva.

²² Yingisa babe wago a nga gu velegago; u nga kanyisi mayi wago a gu gumba.

²³ Renga lisine, u nga li rengisi; renga guti, sihevbulo ni mapimo.

²⁴ Uye a velegidego gyanana nya mapimo a na nengela ngudzu, ni uye a velegidego gyanana nya guti, a na tsaka khigyo.

²⁵ Va ninge gutsaka gogo vavelegi vago, a na ghiye uye a gu worisidego lihani.

²⁶ Nyivbe monyo wago, mwanangu, maho yago ma na landrise dzindzila nyi gu yeyedzago.

²⁷ Wona gukhuwe gibhayi ni liphuphulu sa gu fanana ni liphala nya guete ni nambo wu hongidego.

²⁸ Va gu varamela kha nga mbafa, va gira vama nya vangi va si tumbegi.

²⁹ Khu mani a gu ni libango? Khu mani a gu ni mhango? Khu mani a gu ni gutshaniseka? Khu mani a guromo mayungani? Khu mani a gu ni wuvi? Khu mani a gu ni dzimbanga vbavbandze nya nandru? Gasi khu mani a fuvidego maho?

³⁰ Khavo avovo va pfhalago khu gusela wadwa, va golago gudhivanisela wadwa nya guvave.

³¹ U nga khedzi gufuvila nya wadwa, idzo wu ngangamelago khidzo gikombeni, wa gu wu sela wu tshamba, wu relela wabune.

³² Guhegisani wa gu hodza kha nga nyoga, wu paya kha nga mamba.

³³ Maho yago ma na wona silo nya guvivbe, ni mapimo yago ma na pimisa silo nyamba yela.

³⁴ U na dzipwa gukhwatshi vbakari nya mati u ladego, mwendro gukhwatshi u di lala vbatshani dzitshokhani nya ningwati.

³⁵ Gambe u na ganela, khuwe: Va nyi vetide aholu kha nyapwa guvbisa! Va nyi vetide aholu kha ga pwala; Nyi na wuga lini gasi nyi dusa bhabhalaza.