Mavingu 18 - Bhibhiliya Nya Guage

¹ Uye a dzi hambanisago ni vakwawe, a gu vbweta gu dzi tsakisa uye mune wurumba, a si dzumeli satshavbo iso si gu ni fanelo.

² Gipumbu kha gi dzi garadzi khu gu vbweta mapimo, gya gu tsakiswa khu wupumbu waye.

³ Gumbana githawo gwa gu dugela ga muthu nya guvivbedwe khu monyo; ni silo nya dzitshoni sa gu girwa khu vathu nya vamadhadhavale.

⁴ Magana ma dugago khu kanani ga muthu gu fanana ni mati nya guete, ni mabhulo ya muthu nya mapimo gifefe nya guti ni tsongo wu khulungago.

⁵ Guvhikela muthu a ghohidego, khu gufela gu rwega nandru muthu nya gululame gu vivbide.

⁶ Magana ya muthu nya gipumbu ma gu wusa mayunga, likana laye la gu mu ranela dzimboma.

⁷ Gipumbu gya gu dzi wusela libango khu magana yaye, ni likana laye lizinga nya hefemulo waye.

⁸ Magana ya muthu nya milembo ma gu lombela kha nga sikiri, ma gu vbiredza gu midzwa ma relela kala mahembeni.

⁹ Muthu a khalago wugara ni thumo waye, a gu fanana ni muthu a golago gupfhungumula basi.

¹⁰ Lina la Pfhumu Nungungulu likhokhola li tiyidego va sihalago avbo vathu nya gululame.

¹¹ Lidhoropa nya likhokhola la muthu nya gufume khu thomba yaye, uye a gu alakanya khuye libhiyo li mu vhikelago.

¹² Monyo nya muthu, wu si gu thegedwi khu mhango, wa gu dzi khusedza ngudzu, aholu wuzundzo gu wu mana khu gu dzi nogisa.

¹³ Uye a vbiredzelago gu hakha na si gu yingisi, a gu yeyedza wupumbu ni gu dzi thela dzitshoni.

¹⁴ Liphuvbo la muthu li ngu kodza gu mu tiyisedza madwalini gwaye, aholu khu mani a kodzago gu phasa muthu a khuvekidego?

¹⁵ Muthu nya mapimo a ngu gola guti, a gu tsakela gu mana sihevbudzo ga vathu nya mapimo.

¹⁶ Avo va ningelago dzisagwati va gu tula dzindzila, dzi kodzago gu vboha kala ga vakhongolo nya vathu.

¹⁷ Gulamudwatunu uye a phelago khuye gu hakha a gu dzipwa nari ni lisine, khu hwane a ta konwa khuye a ketsaranago naye.

¹⁸ Gulolwa dzisolo gu ngu vbedza mayunga, gu lamula mahungu ya va nya dzitshivba.

¹⁹ Guphasa ndriyago a gorogidego, gu lemede ngudzu guvbindra gupfhungumula lidhoropa li bhiyidwego khu likhokhola; mayunga ma gu fanana ni sikwinyaro nya likhokhola.

²⁰ Muthu ni muthu a gu hakha handro nya magana yaye, a na khura khiso si dugago khu kanani gwaye.

²¹ Gufa ni guvbanya gomo tshivbani nya lidimi la muthu, uye a li thumisago a na havela mihandro yaye.

²² Uye a manago nyamayi a manide litsako, a manide makategwa ya Pfhumu Nungungulu.

²³ Gisiwana gya gu ganela khu gu dzi thesa vbavbatshi, aholu gitetema gya gu phindrula khu dzihanyi.

²⁴ Uye a vbwetago dzipari nya dzingi a gu dzi vbwetela libango, aholu dzomo dzipari dzi tumbegago guvbindra ndriyago.