Mavingu 17 - Bhibhiliya Nya Guage

¹ I tshukhwana gu hodza ligogo mugurulani, guvbindra gu hodza dzinyama nya gunone avbo gu tadego khu mayunga.

² Githumi nya gugengele, gi na fumela mwamana a thesago dzitshoni nyehe waye, gi na kabana thomba gumogo ni vandriyaye.

³ Parata ya gu lingwa khu nilo ni ndralama ya gu nyiviligiswa khu lidhingiso, aholu myonyo ya vathu ya gu lingwa khu Pfhumu Nungungulu.

⁴ Muthu nya guvivbedwe khu monyo, a gu yingisa magana nya guvivbe, ni muthu nya malipha a gu yingisela magana nya milembo.

⁵ Uye a nyenyago gisiwana, a gu vala Muvangi waye, ni uye a tsakiswago khu gu wona vambe vari mhangoni, kha na vbuluga.

⁶ Gihugu nya wufumu gya sikhosane, khu vatugulu, ni wudhumo wa sanana khu vavelegi.

⁷ Magana nya gu dzi khusedze kha ma faneli gu duswa khu gipumbu, kha nga gambe magana nya malipha ma si faneligo gu duswa khu linganagana.

⁸ Gu rengeledwa, muthu a gu gu wona kha nga gilo nya lisima, na gu tumba gukhuye ni evbini a belago a na dugelela.

⁹ Uye a sihago gighoho a gu vbweta lihaladzo, gasi uye a gi hivelago a gu hambanisa wupari.

¹⁰ Muthu nya mapimo a gu kawukwa a gu vbiredza gupwa, guvbindra gu veta lizana dzindronga hwamboni nya gipumbu.

¹¹ Muthu nya guvivbedwe khu monyo a gu gola mayunga, khu guralo a na rumedwa muthu nya gigaha.

¹² I tshukwana gutshangana ni gikankanka nya ngadzi gi wandredwego sanana saye, guvbindra gutshangana ni gipumbu gi thumago wuphuguphugu wagyo.

¹³ Uye a bweledzelago wuwadi khu guvivba, libango gima kha la na duga ndrangani gwaye.

¹⁴ Guphela nya guganedzisane gukhwatshi guphusuga nya mati nya tsongo wa guphela gutala; khu guralo, khuga u hongole na mu si gu pheli mayunga.

¹⁵ Uye a emelago muthu nya gighohi, khuye gambe a konago muthu nya gululame; satshavbo si vivbide mahoni ga Pfhumu Nungungulu.

¹⁶ Dza gu phasa ginani dzitsapawu gu manwa khu gipumbu gasi gurenga guti, na giri mwalo mapimo?

¹⁷ Iyo yi gu pari yi ngu gu gola gikhati gyatshavbo, nuri gikhatini nya wuvi, ya gu khala ndriyago.

¹⁸ Muthu nyambana mapimo a dzi ningelago gu khala thembedzi nya milandru ya vakwawe, a gu dzi rwega nandru abune.

¹⁹ Uye a golago mayunga, a gu gola gighoho, ni uye nya guganele ngudzu a gu dzi vangela libango.

²⁰ Muthu nyambana mapimo gima kha mani gurula, ni muthu nya mapongowongo a gu thegedwa khu mhango.

²¹ Gyanana nyamba yingisa, wusiwana ga babe waye, ni babe wakone kha hodzi si relela.

²² Gutenga nya monyo rendre wu vbanyisago, aholu hefemulo wu khuvekidego, gu bangisa marambo.

²³ Muthu nya guvivbedwe khu monyo a gu dzumela gu rengeledwa gusihalani, gasi a si lamuli khu lisine.

²⁴ Muthu nya mapimo a gu dzi garadza khu gu vbweta guti, gasi maho nya gipumbu ma gu legalega tigoni gwatshavbo.

²⁵ Gyanana nyamba yingisa i tshanisa ga babe waye, ni wuvi ga mayi waye.

²⁶ Gu tsayisa muthu nyambana nandru si vivbide, ambari gu veta muthu a lulamidego khu kotani nya wuwadi waye.

²⁷ Muthu nya gugengele kha ganeli nya muganele, ni muthu nya mapimo a gu dzi rudzisa.

²⁸ Gipumbu gya gu degula higyo kape, gukhwatshi muthu nya guti, gya gu sega likana gukhwatshi muthu nya mapimo.