Matewu 26 - Bhibhiliya Nya Guage

Gikungo nya gusonge Jesu

¹ Na vbedzide gu ganela mahungu yaya yatshavbo, Jesu a di embela vapizane vaye, khuye:

² “Kha nga mu dzitigo, gu tshade matshigu mavili gasi gu hodzwa Phasika. Mwamana wa Muthu a na ningedwa gasi a khokhothedwa.”

³ Khavbo avbo, vakhongolo nya vaphasi nya mhamba ni madhota va di gira tshangano ndrangani ga Khayifasi, a nga bani ari uye khongolo nya vaphasi vatshavbo.

⁴ Avbovbo, va di hevbula mano nya gumole khayo Jesu va mu songa.

⁵ Aholu va di khavo: “Hi nga mu moli vbakari nya buzo nya Phasika, hi nga wusa ligwaha vbakari nya vathu.”

Jesu a ngu todzwa mafura Bhetaniya

⁶ Jesu, na romo Bhetaniya, ndrangani ga Simoni, a nga bani na gu ranwa “Nya Sokono,”

⁷ na va khade vbamezatunu, a di vboha nyamayi moyo ni gingotwana nya mafura nya gunungele ngudzu, ma nga bani ma rengwa khu dzitsapawu nya dzingi, ata mu thela yatshavbo hungoni.

⁸ Vapizane, na va wonide esi, va di sola, khavo: “Ma gu haganisedwa ginani mafura yale!

⁹ Nari pwani ma di rengisidwe khu tengo nya wungi, na phaside sisiwana khu dzitsapawu dzakone.”

¹⁰ Aholu Jesu, na tugude mahingigedzo yawe, a di khuye: “Khu ginani mu garadzago nyamayi yoyu? Uye a nyi girede thumo nya wadi.

¹¹ Sisiwana mu na bani muri naso gikhati gyatshavbo; gasi eni kha nyi na pindruga nanu.

¹² Nyamayi yoyu, khu mafura a nyi todzidego, dongisede gudzingwa gwangu.

¹³ Khu lisine nyi ngu mi embelani: Tigoni gwatshavbo, omu gu na ganedwago Ivhangeli yeyi, nyamayi yoyu a na khumbugwa khu kotani nya esi a ngari gu girago.”

Judha a ngu ningela Jesu

¹⁴ Khavbo avbo, Judha Sikarioti, moyo nya vale nya likhumi na vavili, a di ya ga vakhongolo nya vaphasi nya mhamba, aya bhula navo, khuye:

¹⁵ “Kharini mu na gu nyi livbago nya gu mi ningani Jesu?” Avo va di mu ninga magumararu singerengere nya silivha.

¹⁶ Gukhugela avbovbo, uye a di gevisela gikhati nya gyadi nya gu mu ningele khigyo.

Phasika ya Pfhumu

¹⁷ Litshigu nya guphele nya buzo nya sibaba nyambana mela, vapizane va diya ga Jesu, vaya, khavo: “Khu hayini u vbwetago gukhuwe hi dongisele avbo Phasika?”

¹⁸ A di va hakha, khuye: “Indrani dhoropani, ndrangani ga muthu nya gukari muya mu tivisa, khenu: Muhevbudzi wari, khuye: Gikhati gyangu gi vbohide. Nya guvbweta gu hodza Phasika ndrangani gwago ni vapizane vangu.”

¹⁹ Vapizane va di gira kha nga idzo Jesu a nga va leletela khidzo. Va di ya dongisela Phasika.

²⁰ Na li hwide, Jesu a di khala vbamezatunu ni vapizane vaye vatshavbo nya likhumi na vavili.

²¹ Na va gu hodza, a di khuye: “Khu lisine nyi ngu mi embelani, kheni: Moyo wanu a na nyi ningela.”

²² Va di tedwa khu wusiwana nya wukhongolo, muthu ni muthu a di mu wudzisa, khu gipandre gyaye, khuye: “Kheni, gani, Pfhumu?”

²³ Uye a di va hakha, khuye: “Uye nyi bagago gumogo naye mbiyani, khuye a na gu nyi ningelago.

²⁴ Khu lisine Mwamana wa Muthu, a na hongola, kha nga idzo yi ganelago khidzo Milowo, aholu libango khya wule a na gu mu ningelago. Dari tshukwana ga muthu yoyo, na sa velegwa!”

²⁵ Judha, wule a nga mu ningela, a di wudzisa, khuye: “A na ba nari eni, gani, Muhevbudzi?” Jesu a di mu hakha, khuye: “Khidzo u ganedego.”

Gilalelo gya Pfhumu

²⁶ Vbakari nya gilalelo, Jesu a di dzega gibaba, na gi kategiside, a di gi kabanisa, a gi ningela ga vapizane vaye, khuye: “Dzegani mu hodza. Egi givili gyangu.”

²⁷ Khavbo avbo, a di dzega gikombe, na gi kategiside, a di gi ningela ga vapizane vaye, khuye: “Selani, mu tshiyelana mwatshavbo.

²⁸ Kholu owu novba wangu, novba nya gidzumeledzwano giphya wu na vbaladzedwago va nya gutala, gasi gutsetseledwa sighoho.

²⁹ Nyi ngu mi embelani, kheni: Gukhugela olu, kha nyi na sela gambe wadwa nya dziuvha kala litshigu nyi na wu selago nanu nyaluphye mufumoni wa Babe wangu.”

Jesu a ngu tivisa Pedro khuye a na mu danga

³⁰ Na va embidelede nombelo nya ndzimo, va di duga va gu hongola gigomoni nya Miolivha.

³¹ Khavbo avbo, Jesu a di va embela, khuye: “Wutshigu wa muhuno mwatshavbo, mu na phalalega mu nyi diga nyenga kholu gu lovidwe, pwani: ‘Nyi na bayisa muhavisi, nyi kodza gu phalalegisa dzinvuta.’

³² Aholu, hwane nya gu bani nyi wugide, nyi na mu hegudzani gu vboha Galileya.”

³³ Pedro a di khusa lito, khuye: “Ambari va gu phalalega vatshavbo, eni gima kha nyi na gu diga wenga.”

³⁴ Jesu a di mu hakha, khuye: “Khu lisine, nyi ngu gu embela: Wutshigu wa muhuno u na nyi danga nyondro tharu, ni khonge nasi gu embi.”

³⁵ Pedro a di khuye: “Ambari gu lomba gufa nago, kha nyi na gu danga.” Vapizane vatshavbo va di ganela navo kharato.

Nombelo wa Jesu Getsemani

³⁶ Khavbo avbo, Jesu a di hongola navo wulanga nya gupwani Getsemani, avbo a nga embelago vapizane vaye, khuye: “Khalani avba, nyi nga guya vbale nya lombelela.”

³⁷ Na dzegide Pedro, ni sanana sa sivili sa Zebhedhewu, a di phela gusaniseka ni gu tala khu rerema.

³⁸ Khavbo avbo, a di va embela, khuye: “Hefemulo wangu wu tade khu gusaniseka nya lufu; khalani avba gasi gu nyi bangaladza.”

³⁹ Na leyide vbadugwana, a di khidzima a gu kuha vbavbatshi khu khovbe, a lomba, khuye: “Baba, gwa gu kodzega, nyi ndreyisele gikombe gegi nya wuvi gi vbindre avbo gwangu. Ambari ulo, gu nga giregi guhaladza gwangu; aholu, guhaladza gwago.”

⁴⁰ Na wide avbo va nga bani varomo vapizane, a dita va mana na va lade, a di embela Pedro, khuye: “Kha mwa dzi kodza gu khala na mu khendzugide wora mweyo basi, gasi gu nyi bangaladza?

⁴¹ Lirelani na mu gu lombelela, gasi mu si thegeli gusengwani. Hefemulo tade khu tshivba, aholu givili gi mwalo tshivba.”

⁴² A di hongola nyaluphye aya lombelela, khuye: “Baba, gwa gu kodzega, nyi vbulugise ga gikombe gegi. Aholu, gu na girege guhaladza gwago!”

⁴³ Na wide avbo va nga bani varomo vapizane, a di ta va mana gambe na va lade, kholu va di tade khu ligovbe.

⁴⁴ A di va tshiya a bwelela nya wuraru aya lombelela, a bweledzela magana ya mamowo.

⁴⁵ Guhegisani, a di wuya avbo va nga bani varomo vapizane, a ta va embela, khuye: “Olu lalani, mu hefemula. Gi vbohide gikhati. Mwamana wa Muthu a na ningedwa mandzani nya sighohi.

⁴⁶ Wugani hi hongola. A ngu vboha uye a vbwetago gu nyi ningela.”

Gumodwa ga Jesu

⁴⁷ Na nga guganela, a di bela moyo nya vale nya likhumi na vavili, nari ni libutho nya likhongolo nya vathu, va nga rumedwago khu vakhongolo nya vaphasi ni madhota, na vari ni matshari ni sighomba.

⁴⁸ Muningeli a di va ningide giyeyedzo gegi: “Wule nyi na gu mu bhejarigo, khuye kamwe; mu moleni.”

⁴⁹ A di mu yela khu guvbiredza, aya mu losa, khu besu, khuye: “Sewe, Muhevbudzi!” A mu bhejari.

⁵⁰ Jesu a di mu wudzisa, khuye: “Ama sawena uwe, ginani u dzudego uta gira?” Khavbo avbo, va diya mu mola.

⁵¹ Moyo nya vale nya likhumi na vavili va nga bani vari ni Jesu a di homola litshari a bayisa khilo githumi gya khongolo nya vaphasi, a gu gi pila ndzeve.

⁵² Aholu Jesu a di mu kawuka, khuye: “Vega litshari wulangani gwaye, kholu vatshavbo va thumisago litshari, va nafa khu litshari.

⁵³ Wa gu pimisa nya gukhuwe nya gu tandrwa khu gu lomba ga Babe wangu gu a nyi rumela nugunugu likhumi na sivili sikwata nya dzingilozi, ni gu vbindrisa, gani?

⁵⁴ Yi di vbweta gu tadzisega kharini Milowo yi gu khiyo satshavbo gu vbwetega si girege kharati?”

⁵⁵ Khavbo avbo, a di thendregedza a khedza gikwata gile nya vathu, khuye: “Mu di donga matshari ni sighomba gasi guta nyi mola, gukhwatshi nyi mbafa! Matshigu yatshavbo nyi diromo Nyumbani gwa Nungungulu aholu mwalo a nga nyi mola!

⁵⁶ Aholu satshavbo sesi sa gu girega, gasi gu tadzisega Milowo ya vaprofeti.” Khavbo avbo, vapizane vatshavbo va di mu tshiya enga, va gu thava.

Jesu phathani nya Vajudha

⁵⁷ Avo va nga mola Jesu, va di mu dzega va gu hongola naye ndrangani ga Khayifasi, Muphasi nya Khongolo, iyo va nga bani va tshanganide vahevbudzi nya nayo ni madhota.

⁵⁸ Pedro a di mu landrisela khu hwindzo kala gu vboha ndrangani ga Muphasi nya Khongolo. Na vbohide, a di ya khala avbo si nga bani si khade sithumi, na gufela gu wona mavbelelo nya satshavbo sile.

⁵⁹ Vakhongolo nya vaphasi ni phatha watshavbo va di zama gu mu singedza malipha, gasi gu kodza gu mu ninga nandru, va mu songa;

⁶⁰ aholu kha va dzi kodza gilo, ambari olu va nga duga nya vangi va nga zama gu mu singedza. Guhegisani va di dugelela vavili va nga mu singedzago, khavo:

⁶¹ “Hi mu pwide na gukhuye: ‘Nyi ngu dzi kodza gupfhungumula Nyumba ya Nungungulu, nyi yi vbahedza khu matshigu mararu.’ ”

⁶² Khavbo avbo, khongolo nya vaphasi vatshavbo a di khuga a mu wudzisa, khuye: “Khu phindruli gilo? Wari khuwe ginani khu ketso yeyi?”

⁶³ Aholu Jesu a di hodza gikhukhu a degula. Khavbo avbo, Muphasi nya Khongolo a di mu embela, khuye: “Nyi ngu gu ruma khu lina la Nungungulu a vbanyago: Nga nyi embela: Ina kamwe uwe khuwe Kristo, Mwamana wa Nungungulu, gani?”

⁶⁴ Jesu a di mu hakha, khuye: “U ganede. Ambari ulo nyi ngu mi embelani: Tshigu mwedo mu na wona Mwamana wa Muthu na khade nyamudye ga Nungungulu nya tshivba tyatshavbo, na guta khu mapfhini ya Ndzadzini.”

⁶⁵ Khavbo avbo, Muphasi nya Khongolo a di pferula dzingandzu dzaye, na gukhuye: “Hembulude Nungungulu! Wufakazi muni hi wu vbwetago gambe? Mu ngari gu mupwa ni guhembulula Nungungulu.

⁶⁶ Mwari khenu ginani?” Avo va di khavo: “A ngu yela gu songwa.”

⁶⁷ Khavbo avbo, va di mu hetshela khovbeni ni gu mu veta mipama. Vambe va di mu veta sibhakela, na va gukhavo:

⁶⁸ “A ma Kristo wa gu bani uri muprofeti, nga tumba, khu mani a nga gu veta.”

Pedro a ngu danga Jesu

⁶⁹ Gikhati gyogyo, Pedro, na khade vbavbandze, a di vbohedwa khu nyamahegyane a nga bani ari githumi gya ndrangani mule, a mu embela, khuye: “Uwe nuwe u diri ni Jesu, Mugalilewu.”

⁷⁰ Aholu, Pedro a di danga mahoni nya vathu vatshavbo, khuye: “Kha nyi si ti iso u si thulago.”

⁷¹ Na gu hongola mwanyatunu, a di wonwa khu mumbe nyamahegyane nya githumi nuye, a nga embelago avo a nga bani ari navo, khuye: “Oyu nuye a diri ni Jesu, Munazarenu.”

⁷² Pedro a di danga nyaluphye, a sambanya, khuye: “Kha nyi mu ti muthu yoyo.”

⁷³ Khavbo avbo, a di hidzimeledwa khavo va nga bani varomo vbale, va mu embela, khavo: “Khu lisine uwe u moyo wawe, kholu ni maganelelo yago ma ngu gu thuledza.”

⁷⁴ Khavbo avbo, a di phela gu vbenyavbenya ni gu sambanya, khuye: “Kha nyi muti muthu yoyo.” Gikhati gyogyo khonge wu di dzegela gu emba.

⁷⁵ Khavbo avbo, Pedro a di dundruga mahungu ya Jesu, nya gukhayo: “Uwe u na nyi danga nyondro tharu khonge nasi gu embi.” A di duga vbavbandze aya lila khu wuvi waye watshavbo.