Matewu 24 - Bhibhiliya Nya Guage

Jesu a gu tivisa gu pfhungumudwa nya Nyumba ya Nungungulu

¹ Jesu, na gu duga khu Nyumbani ga Nungungulu, vapizane vaye va di hidzimela gwaye gasi va mu yeyedza mavbahelo nya Nyumba ya Nungungulu.

² Aholu a di va hakha, khuye: “Mu ngu si wona satshavbo sesi? Khu lisine nyi ngu mi embeleni nya gukheni kha gi na tshala giwindri vbatshani nya giwindri gikwawe satshavbo si na pfhungumudwa.”

Guphela nya sisaniso

³ Na khade mugigomoni nya Miolivha, va di hidzimela vapizane vaye, vaya mu wudzisa, nari avo venga, khavo: “Hi embele, lini si na gu dugelelago satshavbo soso? Giwonegiso muni gi na gu tivisago guta gwago ni guhegisa nya litigo?”

⁴ Jesu a di va phindrula, khuye: “Dzi woneleni, gasi mu si kanganyiswi khu muthu.

⁵ Kholu va nata nya vangi khu lina langu, vata, khavo: ‘Eni kheni Kristo.’ Va na pengisa nya vangi.

⁶ Mu napwa na gu ganedwa khu dzinyimbi, ni ligwaha nya dzinyimbi, mu nga thurugini, kholu si na ni fanelo nya guphele khiso si girega, aholu khandri guhegisa.

⁷ Mayigo ma na wugelana; ni mifumo yakone yi na wugelana niyo; dzi na manega dzindzala, mitungu ni sirevareva malangani nya gutale.

⁸ Aholu satshavbo sesi a na bani ari guphela nya sitshaniso.

⁹ Khavbo avbo, va na mi yisa gusaniswani, va na mi songa; mu na zondrwa khu mayigo yatshavbo, khu kotani nya lina langu.

¹⁰ Avbovbo nya vangi va na thega, va zondrana ni gu ningelana khu gyawe.

¹¹ Va na tumbuluga vaprofeti nya vangi nya malipha, va na gu pengisago va nya gutala.

¹² Lihaladzo la va nya gutala li na dzidzila khu kotani nya guandre nya wulala;

¹³ aholu uye a na gu tsaramago kala mahegiso a na vbanyiswa.

¹⁴ Mahungu nya Yadi yaya nya Mufumo wa Nungungulu ma na huweledwa tigoni gwatshavbo gasi gu ninga wufakazi mayigoni gwatshavbo. Khu hwane nya ugo khavbo gu no tago guhegisa.

Tshanisa nya yikhongolo

¹⁵ “Khu kharato, mwa gu wona manyala nya guthavise, ma thudwago khu muprofeti Dhaniyeli na ma romo vbawulangatunu nya gukatege, uye a hevbulago a na si pimise gwadi,

¹⁶ avo va na gu bani varomo Judheya va na thavele sigomoni;

¹⁷ uye a na gu bani a romo vbatshani nya nyumba a nga tshigi gasi guta dzega gilogyo nyumbani gwaye;

¹⁸ uye a na gu bani a romo thembweni a nga bweleli hwane gasi guta dzega mwendra.

¹⁹ Gu na bani ari tshanisa ga va nya dzimimba ni va nya gumamisa khu matshigu yoyo!

²⁰ Lombelelani gasi gu thava gwanu gu si dugeleli vbagirametunu, mwendro khu litshigu nya Sabhadho,

²¹ kholu matshigu yoyo yi na manega tshanisa nya yikhongolo nya gu gima yi si gu manegi, gukhugela Nungungulu na vangide litigo kala matshigu ya muhuno. Gima kha yi na manega gambe.

²² Nari pwani kha nga rodzisa matshigu yoyo, mwalo a nga vbweta gu vbanyiswa. Aholu, khu kotani nya sihathwa saye, a na ma rodzisa.

²³ Khu kharato, va guta mi embelani, khavo: ‘Kha mu mu woni Oyu Kristo’, mwendro sawe, khavo: ‘Kha mu mu woni Wule’, mu nga khodwi,

²⁴ kholu va na dugelela Vakristo ni vaprofeti nya malipha, va na gu girago siliwugiso nya sikhongolo, gule nya gu, samba gwadi, ambari sihathwa si na pengiswa niso.

²⁵ Nya gu mi embelani matshigu na ma nga romo.

²⁶ Khu kharato, va gu mi embelani, khavo: ‘Womo giwulani’ mu ngayi; va gukhavo: ‘Womo nyumbani’, mu nga khodwi.

²⁷ Kholu, kha nga ndzadzi yi lasago, yi wenengedza litigo latshavbo, gukhugela Khugadambo kala Pfoladambo, kharato nugo gu na girega gikhati a na tago Mwamana wa Muthu.

²⁸ Kholu avbo gi na gu manegago girumbi, khavbo ma na talago makoti.

Siyeyedzo nya guwuye gwa Mwamana wa Muthu

²⁹ “Aholu hwane nya tshanisa yoyo, lidambo li na sivbala, ni ngima kha na wenengedza; dzinyeledzi dzi na thegela khu Ndzadzini, ni dzitshivba nya ndzadzi dzi na dzudzwa.

³⁰ Khavbo avbo, gu na wonega Ndzadzini giyeyedzo gya Mwamana wa Muthu, giyeyedzo gi na gu girago vathu vatshavbo nya mafu va lila khu gu wona Mwamana wa Muthu na guta vbakari nya lipfhi, na tade khu tshivba nya yikhongolo ni gidhumo.

³¹ A na rumela dzingilozi dza Nungungulu gu womba pundru nya gudzume ngudzu, gasi gu tombanisa sihathwa sa maphuvbo yatshavbo ya mana, gukhugela mahegiso kala mahegiso nya mafu.

Gihevbudzo nya nguyu

³² “Hevbulani khu gipimaniso nya nguyu: Wa gu thela matamo nya matenvura ni nyenvu, mu ngu dziti nya gukhenu yi ngu vboha nango nya maronga.

³³ Kharati nugo, mwa gu wona satshavbo soso, dzitini nya gukhenu uye womo vbafuvbi ni gu vboha vbamwanyatunu.

³⁴ Khu lisine nyi ngu mi embelani, kheni: Kha na vbindra mela yoyu na si si gu dugeleli satshavbo soso.

³⁵ Yi na vbindra ndzadzi ni mafu, aholu mahungu yangu gima kha ma na vbindra.

Khalani na mu dongide

³⁶ “Gasi litshigu ni gikhati, mwalo a si tigo, ambari dzingilozi dza Ndzadzini, ambari Mwamana; vbavbandze ga Babe basi.

³⁷ Kha nga idzo gu nga giregago khidzo matshiguni ya Nowa, kharato nugo gu na girega litshigu a na tago Mwamana wa Muthu.

³⁸ Na wu si gu dugi talo nya mati, vathu va di gu hodza ni gu sela; vama va di gu dzega, vanyamayi va di gu dzegwa, kala litshigu Nowa a nga belago litaroni.

³⁹ Kha va nga tugula gilo, kala gu vboha talo nya mati wu ngata va mwaladza vatshavbo. Kharato nugo gu na girega litshigu a na tago Mwamana wa Muthu.

⁴⁰ Litshigu lolo, va nata manwa vathu vavili thembweni: A na dzegwa moyo a gu tshidwa mumbe;

⁴¹ vanyamayi vavili va nata manwa na va gu tshindra: A na dzegwa moyo a gu tshidwa mumbe.

⁴² Khu kharato, khalani na mu dongide, kholu kha mu li ti litshigu yi tago Pfhumu yanu.

⁴³ Khalani na mu dziti nya gukhenu: Nari pwani mune ndranga a ngu giti gikhati yi na gu tago khigyo mbafa vbakari nya wutshigu a na gu ghadha, gasi a si phangedwi nyumba yaye.

⁴⁴ Khu kharato, enu nenu khalani na mu dongide, kholu Mwamana wa Muthu anata gikhati mu na gumba gi lindrela.

Sithumi nya guthembege niso nyamba thembega

⁴⁵ “Khu gevbini githumi nya guthembege, nya gugengele, gile gi na gu vegwago mbeli nya sithumi sikwawe khu pfhumu, gasi gu si ninga guhodza khu gikhati gi vbwetegago?

⁴⁶ Gi kategide githumi gile gi na guta manwago khu pfhumu yaye na gi nga gu vbanyisa guralo.

⁴⁷ Khu lisine nyi ngu mi embelani nya gukheni a na gi vega kha nga muthangeli nya silo saye satshavbo.

⁴⁸ Aholu, githumi gile gya gu bani giri ni monyo nya guvivbe, gi pimisa monyoni gwaye, kharati: ‘Pfhumu yangu yi ngu hwela,’

⁴⁹ gi gu phela gu vetelela vangana vaye, gi hodza, gi sela ni dzibewudzi.

⁵⁰ Pfhumu yaye yi na wuya litshigu ni gikhati gi si si lindreligo.

⁵¹ Githumi gile gi nata tsayiswa khu tshivba, bwelo khavbo, gi valedwa kha nga muthu nyamba tumbega; avbovbo gi na lila ni gu ketsa magwaha.