Matewu 22 - Bhibhiliya Nya Guage

Gipimaniso nya dzegano wa mwamana wa mufumeli

¹ Khavbo avbo, Jesu a di engedza gambe gu va embela khu sipimaniso, khuye:

² “Mufumo wa Ndzadzini wu ngu fanana ni mufumeli moyo a nga dongiselago buzo nya dzegano wa mwamana waye.

³ A di ruma sithumi saye guya rana vathu a nga bani a va rambide, aholu avo va di bomba.

⁴ A di ruma nyaluphye simbe sithumi, a si embela, khuye: ‘Indrani muya va tivisa, khenu: Guhodza gu vidzidwe; nyi songetede dzimombe dzangu ni sifuyo nya gunone; satshavbo si dongisedwe. Deluni buzotunu.’

⁵ Aholu avo kha va nga thela kota. Mumbe a di ya petoni gwaye, mumbe a di ya thumisa wugwewo waye.

⁶ Gasi vambe va di wugela sithumi sile, va si songa.

⁷ Mufumeli wule a di garadzega ngudzu, a gu rumela masotshwa maya songa sighevenga sile, gumogo ni gu si vbisela lidhoropa lawe.

⁸ Khavbo avbo, a di embela sithumi saye, khuye: ‘Guhodza gu vidzidwe aholu avo nyi nga bani nyi va rambide kha va yedwa khu guta.

⁹ Khu kharato, indrani mahandzakanyani nya dzindzila mu gimbila mu gu rana vathu vatshavbo mu na va manago.’

¹⁰ Sithumi, na si phalalegide ni dzindzila, si di rana vatshavbo si nga va manago: Nya vadi navo nyamba vadi, kala gu tadza nyumba nya buzo khu vathu.

¹¹ Na bede mufumeli gasi guta wona avo va nga rambwago, a di wona moyo a nga bani a sa ambala gipani nya buzo nya dzegano.

¹² A di mu wudzisa, khuye: ‘Ama sawu, u bede kharini omu nyambana gipani nya buzo nya dzegano?’ Uye a di degula, nyamba hakha gilo.

¹³ Khavbo avbo, mufumeli a di embela sithumi saye, khuye: ‘Mu hungeni mawogo ni mawundru, mu mu dzudzuga vbavbandze, mugidemani. Avbovbo a na ya lila ni gu ketsa magwaha.’

¹⁴ Khu lisine vangi va ranidwego, gani olu vadugwana va hathidwego.”

Gukhupha ga Sezari

¹⁵ Khavbo avbo, Vafarisi va di gira gikungo, gasi gu hevbula mano nya gu mu ganedzise, na va gu lindrela gukhavo a na hoheta likana limwedo, va kodza gu mu mola.

¹⁶ Va di rumela vapizane vawe, gumogo ni va na Herodhi, gasi guya mu wudzisa, khavo: “Muhevbudzi, hi ngu dziti nya gukhethu u muthu nya lisine, ni gukhethu u ngu hevbudza ndzila ya Nungungulu kha nga idzo li lombago khidzo lisine; khu thavi muthu, kholu khu khedzi giemo nya muthu.

¹⁷ Nga hi embela, na: Khu mawonelo yago, hi na ni fanelo mwendro hi mwalo nya gulivbe khupho ga Sezari?”

¹⁸ Jesu, na gu guti guvivba nya mahingigedzo yawe, a di va hakha, khuye: “Vapfhadzi! Mwa gu nyi lingela ginani?

¹⁹ Nga nyi yeyedzani dzitsapawu dzakone mu livbago khidzo khupho.” Va di mu ninga tsapawu mweyo.

²⁰ A di va wudzisa, khuye: “Gasi mufananiso yoyu ni lina leli khya mani?”

²¹ Va di hakha, khavo: “Khya Sezari.” Khavbo avbo, a di va embela, khuye “Ina kha, ningani ga Sezari iso si gu sa Sezari, ni ga Nungungulu iso si gu sa Nungungulu.”

²² Na va pwide phindrulo yeyi, va di liwuga ngudzu, va gu mu diga va hongola.

Guwuga nya vafi

²³ Litshigu lolo la limwedo, vasadhusi, a gu tsawa nya vale va gukhavo gu mwalo guwuga ga va nya gufa, va di hidzimela gwaye vaya mu wudzisa, khavo:

²⁴ “Muhevbudzi, Mosi a hi rumide, khuye: ‘A gufa mwama nyamba tshiya sanana, ndriyaye a na hambele namu waye nya noni, gasi gu wusa livelego la ndriyaye.’

²⁵ Va diromo livbandre na vavili vandruye. Koma wakone a di koka ndranga, afa nyamba tshiya sanana. Mwangadzi waye a di tshala ni ndriyaye.

²⁶ Oyu nuye si di mu dugela idzosaye, uye nya wuraru nuye, kala uye nya livbandre na wuvili.

²⁷ Na va fude vatshavbo a difa nuye nyamayi wule.

²⁸ Guwugani ga va nya gufa, nyamayi wule a na lumba wevbini wakone, ulo vatshavbo va mu dzegidego kha nga mwangadzi wawe?”

²⁹ Jesu a di va hakha, khuye: “Mu dzi pembide, khu gumbatini Milowo nya Guage ni tshivba ya Nungungulu.

³⁰ Kholu guwugani ga va nya gufa vama kha a dzega, vanyamayi kha va na dzegwa; aholu vatshavbo va na fanana ni dzingilozi Ndzadzini.

³¹ Gasi khu mahungu nya guwuge ga va nya gufa, kha mwa hevbulani iso a nga ganelago Nungungulu, gikhati a nga khuye:

³² ‘Eni kheni Nungungulu wa Abrahama, Nungungulu wa Isaki ni Nungungulu wa Jakobe,’ gani? Uye khandri Nungungulu wa va nya gufa, aholu, khwa va nya guvbanya!”

³³ Gidzemo, na gi mu pwide, gi di liwuga ngudzu khu sihevbudzo saye.

Nayo a gu khongolo ga milayo yatshavbo

³⁴ Vafarisi, na va pwide nya gupwani Jesu a di degudza vasadhusi khu dziphindrulo dzaye, va di gira tshangano;

³⁵ avbovbo a di duga moyo wawe a nga bani ari muhevbudzi nya Nayo, aya mu wudzisa, gasi gu mu tshunganisa, khuye:

³⁶ “Muhevbudzi, khu wevbini nayo a gu koma ga milayo yatshavbo?”

³⁷ Jesu a di mu phindrula, khuye: “ ‘Haladza Pfhumu Nungungulu wago khu monyo wago watshavbo, khu hefemulo wago watshavbo ni mapimo yago yatshavbo.’

³⁸ Oyu khuye a gu khongolo ga milayo yatshavbo; khuye nya guphele wakone.

³⁹ Uye nya wuvili wu ngu fanana noyu. Wa gu ganela, kharati: ‘Haladza muthu kwanu kha nga idzo u dzi haladzago khidzo.’

⁴⁰ Milayo yeyi ya mivili khiyo yi gu litshina nya Nayo watshavbo wa Mosi ni sihevbudzo sa vaprofeti.”

Kristo gyanana gya mani?

⁴¹ Jesu a di wudzisa Vafarisi va nga bani va tshanganide, khuye:

⁴² “Nga nyi embelani: Kristo gyanana gya mani?” Va di mu hakha, khavo: “Gyanana gya Dhavhidhe.”

⁴³ A di va wudzisa, khuye: “Khu ginani uye Dhavhidhe abune, khu tshivba nya Liphuvbo nya Guage, a nga mu ranago Pfhumu, khuye:

⁴⁴ Pfhumu a di embela Pfhumu yangu, khuye: Khala khu nyamudye gwangu, kala nyi gu thesa valala vago vbavbatshi nya migondro yago?

⁴⁵ Olu Dhavhidhe a mu ranago Pfhumu, gu ngu kodzega kharini gu Pfhumu a khale gambe gyanana gyaye?”

⁴⁶ Mwalo a nga dzi kodzago gu mu phindrula. Gukhugela avbovbo kha va mu tiyela gambe gu mu wudzisa gilo.