Matewu 18 - Bhibhiliya Nya Guage

Dzifanelo nya gubele mufumoni

¹ Khu gikhati gile gya gimwegyo, vapizane va di ya ga Jesu vaya mu wudzisa, khavo: “Khu mani a gu khongolo Mufumo wa Ndzadzini?”

² Uye a di rana gyanana a gi vega vbakari gwawe, khuye:

³ “Khu lisine nyi ngu mi embelani, kheni: Mwa gumba vbindrugedza mu khala nga sanana, gima kha mu na bela Mufumoni wa Ndzadzini.

⁴ Khu kharato, uye a dzi sodzisago kha nga gyanana gegi a na bani ari khongolo Mufumoni wa Ndzadzini.

⁵ Uye a hakhago gyanana nya nga egi, khu lina langu, kheni a nyi hakhago.

Gikhunguvanyiso

⁶ “Gasi uye a khunguvanyisago gimwegyo nya sanana sesi si khodwago gwangu, a diri tshukwana gu a hungwe thamoni giwindri nya gikhongolo nya gitshindro, a rinywa nondrwani nya yiphwa.

⁷ Libango ga litigo khu kotani nya sikhunguvanyiso! Nyi ngu dziti nya gukheni iso si mwalo gu vhikedwa; aholu, libango li na ni wule a si vangago!

⁸ Khu guralo, wa gu wona nya gukhuwe mandza yago mwendro ngondro wago si ngu gu tshunganisa, si pile u dzudzuga, kholu i tshukwana gu bela guvbanyani nya gupindruge nuri ni gimbobo mwendro na wu ndzodola, guvbindra gu rinywa niloni nya gupindruge nuri ni mandza ni migondro yago ya mivili.

⁹ Wa gu wona gukhuwe liso lago li ngu gu tshunganisa, li duse u dzudzuga, kholu i tshukwana gu bela guvbanyani nya gupindruge nuri ni gidzogo, guvbindra gu rinywa niloni wa Ghehena nuri ni maho yago ya mavili.

¹⁰ Dzi woneleni, mu nga nyenyini sanana sesi, ne gimwegyo, kholu nyi ngu mi embelani, kheni: Dzingilozi dzawe khu Ndzadzini gikhati gyatshavbo dza gu wona khovbe ya Babe wangu a guromo Ndzadzini.

¹¹ Kholu Mwamana wa Muthu a tede guta vbanyisa iso si nga bani si dzimede.

¹² Nga nyi embelani: Ina muthu a gu ni lizana dzinvuta, a gu dzimeledwa khu mweyo, kha ngu diga idzo nya livbandre na mana magumi ni livbandre na dzina mugigomoni, a gimbila a vbweta iyo yi nga dzimela, gani?

¹³ Na yi mane, khu lisine nyi ngu mi embelani, kheni a ngu tsakiswa khiyo guvbindra dzile nya livbandre na mana magumi ni livbandre na dzina dzi ngamba dzimela.

¹⁴ Kharati nuye Babe wanu a guromo Ndzadzini kha vbweti gukhuye ni gimwegyo nya sanana sesi gi dzimele.

Ndruye a ghohago

¹⁵ “Wa gu wona gukhuwe ndriyago a gu ghohede, indra u ya mu kawuka na muri enu mwa vavili basi. A gu gu yingisa, u na bani u vbanyiside ndriyago.

¹⁶ Aholu a gumba gu yingisa, dzega muthu moyo mwendro vathu vavili u hongola navo, gasi gu satshavbo si lamudwe khu vafakazi vavili mwendro vararu.

¹⁷ A gumba va yingisa, mu ningele ga libandla; a gumba vbweta gu yingisa libandla, mu vege kha nga muhedheni mwendro kha nga mukhuphisi.

Gu dzumedzisa ni gu himbedzela

¹⁸ “Khu lisine nyi ngu mi embelani, kheni: Satshavbo mu no si hungago mafuni si na hungwa niyo Ndzadzini; niso mu na gu si tshulago mafuni si na tshudwa niyo Ndzadzini.

¹⁹ Nyi ngu mi embelani gambe, kheni: Va gu tshangana vavili vanu, mafuni, gasi gu lomba gilogyo, va na ningwa khu Babe wangu a guromo Ndzadzini.

²⁰ Kholu avbo va manegago vavili mwendro vararu na va tshanganide, khu lina langu, eni nyi na bani nyi romo vbakari gwawe.”

Githumi nya monyo nya guvivbe

²¹ Khavbo avbo, Pedro a di hidzimela ga Jesu a mu wudzisa, khuye: “Pfhumu, nya gu hosedwa khu ndriyangu, nyi na ni fanelo nya gu mu tsetselele nyondro ngani? Nyi na mu tsetselela kala livbandre na dzimbili dzinyondro, gani?”

²² Jesu a di mu hakha, khuye: “Kha nyi gu embeli, kheni: Livbandre na dzimbili dzinyondro, aholu, livbandre na mavili magumi ma bweledzedwago livbandre na dzimbili dzinyondro.

²³ Khu kharato, Mufumo wa Ndzadzini wu ngu fananiswa ni mufumeli moyo a nga vbweta guti magimbidziselo nya thumo ga sithumi saye.

²⁴ Githumi a nga phelago khigyo gi diri ni mangava nya likhumi magumi mazana dzitaleta (10.000).

²⁵ Kha nga ulo a nga bani ari mwalo dzitsapawu nya gulivbe khidzo, pfhumu yile yi di ruma khiyo a rengiswe uye ni mwangadzi waye, ni sanana, ni thomba yaye yatshavbo, gasi gu mana iso nya gulivbe khiso mangava.

²⁶ Githumi gile gi di dzi thesa migondroni gwaye, gi mu lomba, khigyo: ‘Nyi dige nyi ya thuma, nyi nata gu livba mangava yatshavbo.’

²⁷ Pfhumu yile yi di pwa gisiro, yi mu tsetselela mangava yatshavbo.

²⁸ Na dugide khu vbale, a di mana mungana waye a nga bani a mu fiyaride lizana dzitsapawu. A di mu dzwinya ngolo, a mu sokhovedza, na gukhuye: ‘Livba mangava yangu!’

²⁹ Wule a di dzi thesa vbavbatshi, a mu lomba, khuye: ‘Nyi timisele, nyi na gu livba mangava yatshavbo.’

³⁰ Aholu uye kha nga dzumela; a di mu khothela pasoni kala a gu livba mangava yatshavbo.

³¹ Vangana vaye, na va wone esi, va di garadzega, vaya tivisa pfhumu yawe iso si nga giregago.

³² Khavbo avbo, pfhumu yile, yi di mu ranisa yita mu embela, khiyo: ‘Githumi nya guvivbe! Nyi gu tsetselede mangava u nga bani uri nawo, kholu u nga nyi lombago.

³³ Ina khwa nga yela nuwe gutsetselela mungana wago kha nga eni nyi nga gu tsetselelago, gani?’

³⁴ Pfhumu yaye, yi di garadzega, yi mu ningela ga vathangeli nya lipaso a khothedwa kala a gu livba mangava yatshavbo.

³⁵ Khidzo kharati a na gu mi girago Babe wangu a guromo Ndzadzini, muthu ni muthu a gumba tsetselela khu monyo nya wadi ndriyaye.”