Matewu 17 - Bhibhiliya Nya Guage

Wudhumo wa Jesu Gigomoni

¹ Hwane nya livbandre na limwedo matshigu, Jesu a di dzega Pedro, Johane ni ndriyaye Jakobe, a gu hongola navo venga gigomoni nya gulaphe.

² A di vbindrugedza giemo mahoni gwawe. Khovbe yaye yi di ngangamela nga lidambo; dzingandzu dzaye dzi di aga kha nga wenengedzo.

³ Avbovbo a di tumbuluga Mosi ni Eliya, na va gu bhula naye.

⁴ Pedro a di khusa lito, khuye: “Pfhumu, gwadi gu hi khale avba; wa gu dzina nyi na gira mitshatsha miraru: Moyo wago, mumbe wa Mosi, mumbe wa Eliya.”

⁵ Na nga guganela, li dita lipfhi nya gungangamele lita va fenengedza khu mwedzi waye; khu vbakari nya lipfhi gu di pwala lito, na li gu, khilo: “Oyu khu Mwamana wangu nya gu mu haladze ngudzu, a tsakisago monyo wangu; mu yingiseni.”

⁶ Na va pwide mahungu yaya, vapizane va di thega vbavbatshi khu khovbe na va tade khu hwanga.

⁷ Jesu a di va yela aya va phara, khuye: “Khugani mu eme, mu nga thavi.”

⁸ Na va hapfhude, va di wona basi Jesu nyambana mumbe muthu.

Guta ga Eliya

⁹ Na va gu tshiga khu mugigomoni, Jesu a di va laya, khuye: “Mu nga embeli muthu iso mu ngari gu si wonago, kala Mwamana wa Muthu a wuga khu ga vafudego.”

¹⁰ Vapizane va di mu wudzisa, khavo: “Khu ginani vahevbudzi nya Nayo va gukhavo Eliya a na phela khuye a wuya?”

¹¹ Uye a di va hakha, khuye: “Ina, Eliya a na wuya ata lulamisa satshavbo.

¹² Aholu eni nyi ngu mi embelani, kheni: Eliya dzude, aholu kha va mu tugula. Va di mu phara idzo va nga dzinago khidzo. Kharati nugo, va na sanisa Mwamana wa Muthu.”

¹³ Vapizane va di dziti nya gukhavo a gu thula Johane Mubhapatisi.

Gikhwathana nya liphuvbo nya guvivbe

¹⁴ Na va dzude avbo gi nga bani gi romo gidzemo, a di duga mwama moyo aya dzi thesa migondroni ga Jesu a mu embela, khuye:

¹⁵ “Pfhumu, pwela wusiwana mwamana wangu, kholu a na ni gitshira gi mu sanisago ngudzu. Dzinyondro dzingi a thegelago niloni ni matini.

¹⁶ Nyi di mu reside ga vapizane vago, aholu kha va dzi kodza gu mu hawulugisa.”

¹⁷ Jesu a di khuye: “Mela nya vathu nyamba khodwa, mu si gitigo nigyo mu girago! Nyi na khala nanu kala lini? Nyi na mi timiselani kala lini? Mu reseni eno gwangu.”

¹⁸ Khavbo avbo, Jesu, a di kawuka liphuvbo nya guvivbe li gu duga ga gikhwathana; khavbo avbo, gukhugela gikhati gile gikhwathana gile gi di vbanyiswa guralo.

¹⁹ Vapizane va di ya wudzisa Jesu, khu phuvbo, khavo: “Khu ginani ethu hi nga tandrwa khilo gu li tutumisa?”

²⁰ Jesu a di va hakha, khuye: “Khu kotani nya gukhodwe gwanu a gu gudugwanana. Khu lisine nyi ngu mi embelani, kheni: Gukhodwa gwanu gwa gu fanana ni mbewu nya ginapi, mu na rumani gigomo gegi, khenu: ‘Siguga khavba uya khala vbale’; gi na mi yingisani. Khu kharato, gimwalo gi na mi tandrago.

²¹ Lifumbu leli nya maphuvbo la gu tutumiswa basi khu tshivba nya nombelo ni guhala.”

Gitiviso nya wuvili nya gusaniseke gwa Jesu

²² Na va tshanganide Galileya, Jesu a di va embela, khuye: “Mwamana wa Muthu a na ni fanelo nya gu ningedwe mandzani nya vathu,

²³ va na mu songa, aholu khu litshigu nya wuraru a na wuga.” Na va pwide esi, vapizane va di swihala ngudzu.

Khupho nya Nyumba ya Nungungulu

²⁴ Na va vbohide Kafarinawume, vakhuphisi va Nyumbani ga Nungungulu va di ya ga Pedro, vaya mu wudzisa, khavo: “Ina muhevbudzi wanu kha livbi khupho nya Nyumba ya Nungungulu, gani?”

²⁵ A di hakha, khuye: “A ngu livba.” Na vbohide gaya, Jesu a di thangulela gu mu wudzisa, khuye: “Nga nyi embela, Simoni: Khu vamani va khuphelago ni gu girela mihengo vafumeli nya mafu? Khu ngamo yawe, mwendro khu valombo?”

²⁶ Kha nga ulo a nga phindrulago, khuye: “Khu valombo,” Jesu a di mu embela, khuye: “Khu kharato, ngamo yawe yi mwalo giguruvedzo nya gukhuphe.

²⁷ Ambari ulo, gasi hi si tshunganisi muthu, indra phwani uya lova. Ndzandzi u na gu phelago khiyo gu mola, yi tule likana, u na mana dzitsapawu. Dzi dzege uya livba khidzo khupho wago ni wangu.”