Marko 9 - Bhibhiliya Nya Guage

¹ Jesu a di va embela gambe, khuye: “Khu lisine nyi ngu mi embela gambe gukheni, vbakari nya avo va guromo avba vomo va na gumba linga gufa kala va gu wona gu vboha Mufumo ni tshivba ya Nungungulu.”

Gu vbindrugedza ga Jesu

² Hwane nya livbandre na limwedo matshigu, Jesu a di dzega Pedro, ni Jakobe ni Johane vari vonga a di gwela navo gigomoni nya gulaphe. Na vbohide, a di vbindrugedza mahoni gwawe.

³ Dzingandzu Dzaye dzi di ngangamela, dzi gu aga, nya gu mwalo muhandzi mafuni a dzi kodzago gu dzi agisa kharato.

⁴ Gu di wonega avbo gwawe, Eliya ni Mosi na va gu bhula ni Jesu.

⁵ Pedro a di embela Jesu, khuye: “Muhevbudzi, gwadi gu hi khale avba! Hi na vbaha mitshatsha miraru, moyo wago, mumbe wa Mosi ni wa Eliya.”

⁶ Kholu a di si giti ni egi a nga bani a gu ganela, kholu va di tade khu hwanga.

⁷ Khavbo avbo, li di tshiga lipfhi li nga ta va fenengedza; Khu vbakari nya lipfhi li di pwala lito na li gu, khilo: “Oyu khu Mwamana wangu nya gigodwa, mu yingiseni.”

⁸ Na va hapfhude, va di khedza maphuvbo yatshavbo, mwalo va mu wonego, vbavbandze ga Jesu basi.

⁹ Gikhati va nga bani va gu tshiga khu gigomoni, Jesu a di va laya, khuye: “Mu nga embeli muthu esi mu nga si wonago kala Mwamana wa Muthu a gu wuga khu ga vafudego.”

¹⁰ Khu kharato, va di degula naso esi va nga embedwa. Aholu va di wudzisana khu gyawe, khavo: “Sa gu tshamusela ginani guwuga khu ga vafudego?”

¹¹ Va di mu wudzisa, khavo: “Khu ginani vahevbudzi nya Nayo va gukhavo a na phela khu Eliya ata?”

¹² Jesu a di va phindrula, khuye: “Khidzo. Eliya a na phela khuye ata gasi guta lulamisa silo satshavbo. Milowo gasi yari khiyo ginani khu Mwamana wa Muthu, khandri yari khiyo gu vbwetega a saniseka ngudzu ni gu nyenywa?

¹³ Dzitini nya gukhenu Eliya dzude. Gikhati a ngatago, va dita mu gira edzi va nga dzinago, kha nga edzi gu lovidwego khidzo.”

Jesu a ngu hawulugisa gikhwathana nya liphuvbo nya guvivbe

¹⁴ Na vbohide avbo va nga bani va romo vambe vapizane, va di wona vathu nya vangi gumogo ni vahevbudzi nya Nayo na va va randrede va gu ganedzisana navo.

¹⁵ Na va wonide Jesu, vatshavbo va di liwuga va tutuma vaya mu losa.

¹⁶ Khavbo avbo, a di va wudzisa, khuye: “Ginani mu ganedzisanago khigyo navo?”

¹⁷ Moyo nya gidzemo, a di khuye: “Muhevbudzi, nyi gu resede mwamana wangu a saniswago khu liphuvbo nya guvivbe, li mu giridego gidudu.

¹⁸ Ni evbini avba li gunago, la gu mu dugela, li mu thesa vbavbatshi, a pupuma liguvi khu kanani ni gu khukhurusa magwaha, a banga sivbango. Nyi di lomba vapizane vago gu li tutumisa, aholu kha va li kodza.”

¹⁹ Jesu a di khuye: “Vathu nyamba khodwa! Nyi na khala nanu kala lini? Nyi na mi timisela kala lini? Mu reseni eno.”

²⁰ Va di mu yisa gwaye. Liphuvbo nya guvivbe, na li wonide Jesu li di dzudza gikhwathana khu tshivba ni tshivba, li gi thesa vbavbatshi gi gu kuya ni gu pupuma liguvi khu kanani.

²¹ Jesu a di wudzisa babe wakone, khuye: “Phedwe vbanyalini?” Babe wule a di mu hakha, khuye: “Gukhugela wanana waye;

²² dzinyondro dzingi la gu mu thesa matini ni niloni li dwanela gu mu songa. Khu kharato, wa gu dzina gu hi phasa, hi girele wuhindzi.”

²³ Jesu a di khuye: “Wa gu dzina! Satshavbo si ngu kodzega ga wule a khodwago.”

²⁴ Khavbo avbo, babe nya gikhwathana gile a di khusedza lito na gulila ganela, khuye: “Nyi ngu khodwa! Ambari ulo nyi phase, u engedzela gukhodwa gwangu.”

²⁵ Jesu, na wonide gukhuye va ngu vboha vathu nya vangi a di kawuka liphuvbo nya guvivbe, khuye: “Uwe liphuvbo nya givbwiri ni wududu, nyi ngu gu ruma: Duga ga gikhwathana gegi, u nga wuyi gambe uta bela gwaye.”

²⁶ Liphuvbo li di womba huwa, li gi dzudza khu tshivba ni tshivba, li duga, gikhwathana gi di dzima. Nya vangi va di pimisa gukhavo gi fude.

²⁷ Aholu, Jesu a di gi phara khu libogo a gi wusa, gikhwathana gi di khuga gi ema.

²⁸ Gikhati Jesu, a bedego nyumbani, vapizane vaye va di mu wudzisa vari venga, khavo: “Khu ginani ethu hi nga tandrega gu li tutumisa?”

²⁹ A di va hakha, khuye: “Maphuvbo nya lifumbu leli ma gu kodzwa basi khu nombelo ni gu hala.”

Jesu a ngu tivisa nyaluphye gufa gwaye

³⁰ Na va khugide khu vbale va di tsemakanya litigo la Galileya. Jesu a di si vbweti gu tidwa khu vathu,

³¹ kholu a di gu hevbudza vapizane vaye mahungu nya gukhuye: “Mwamana wa Muthu a na ningedwa mandzani ga vathu, va gu mu songa; aholu, hwane nya gubani na fude a na wuga khu litshigu nya wuraru.”

³² Avo kha va nga pima tshamuselo yoyu, aholu va di khala hwanga gu mu wudzisa.

Khu mani a gu khongolo Mufumoni wa Nungungulu

³³ Na va vbohide dhoropani ga Kafarinawume, uye nari nyumbani a di wudzisa, khuye: “Ginani mu nga bani mu gu ganedzisana khigyo ndzilani?”

³⁴ Avo va di degula kholu va di gu ganedzisana khu gu vbweta guti khu mani a gu khongolo vbakari gwawe.

³⁵ Khavbo avbo, Jesu a di khala vbavbatshi a rana vale nya likhumi na vavili, a va embela, khuye: “Oyu a vbwetago gu khala nya guhegule, a na khala uye mahegisela ni githumi gya vatshavbo.”

³⁶ A di dzega gyanana a gi vega vbakari gwawe, a gi wugarela a va embela, khuye:

³⁷ “Oyu a hakhago gyanana nya nga egi khu lina langu, kheni a nyi hakhago. Aholu, oyu a nyi hakhago, kha hakhi eni basi, a gu hakha ni wule a nga nyi rumelago.”

Oyu a si hi wugeligo khwana gyathu

³⁸ Johane a di khuye: “Muhevbudzi, hi wonide mwama moyo na gu tutumisa maphuvbo nya guvivbe khu lina lago, hi mu himbedzela, kholu kha lumbi tsawa wathu.”

³⁹ Aholu, Jesu a di khuye: “Mu nga mu himbedzeli, kholu mwalo a dzi kodzago gu gira siliwugiso khu lina langu a wuya khavbo a nyi wugela.

⁴⁰ Kholu oyu a si hi wugeligo khwana gyathu.

⁴¹ Khu lisine nyi ngu mi embela gukheni oyu a na mi ningago gani khokho nya mati, khu lina langu kholu mu gu vapizane va Kristo, gima kha na nga hamuga tshatshazelo waye.

⁴² Gani khu mani a khunguvanyisago moyo nya sanana si khodwago nya nga esi, a diri tshukwana gu hungeledwa thamoni gwaye giwindri nya gikhongolo nya libwe, a rinywa nondrwani.

⁴³ Mandza yago ma gu khala gikhunguvanyiso ma pile, kholu i tshukwana gubela guvbanyani nya gupindruge ni gimbobo, guvbindra gubela ni mandza ya mavili phalani nya nilo nyamba tshimega.

⁴⁴ Avbo siwungu si si figo, ni nilo wakone wu si tshimegigo.

⁴⁵ Ngondro wago wa gu khala gikhunguvanyiso, wu pile. I tshukwana gu bela guvbanyani nya gupindruge nuri gighwiri guvbindra gu rinywa phalani nya nilo ni migondro yago ya mivili.

⁴⁶ [Avbo siwungu si sifigo, nilo wakone wu si tshimegigo.]

⁴⁷ Ni liso lago la gu khala gikhunguvanyiso gwago li duse vbavbandze, i tshukwana gubela Mufumoni wa Ndzadzini uri ni liso limwedo guvbindra gu rinywa ni maho ya mavili phalani nya nilo

⁴⁸ avbo siwungu si si figo, nilo wakone wu si tshimegigo.

⁴⁹ “Muthu watshavbo a na agiswa khu nilo, kha nga mhamba yi agiswago khu munyu.

⁵⁰ Munyu khwadi, aholu wa gu phusa wu na lungwa khu ginani? Khalani nenu munyu nya wundruye vbakari nya vathu mu vbanya khu gurula khu gyanu.”