Marko 3 - Bhibhiliya Nya Guage

Jesu a ngu vbanyisa muthu nya gugulimale libogo khu litshigu nya Sabhadho

¹ Jesu a di bela nyaluphye nyumbani nya nombelo. A diromo umo muthu nya gulimale libogo.

² Vatshavbo va di khusa maho va mu khedza, gasi gu mu wona mwendro a na mu hawulugisa khu litshigu nya Sabhadho, vafela gu mu rwega nandru.

³ Khavbo avbo, Jesu a di embela mwama nya gulimale libogo, khuye: “Delu u ta ema vbakari vbavba.”

⁴ A di va wudzisa, khuye: “Ina gu ngu dzumedziswa khu litshigu nya Sabhadho gu gira silo nya sadi mwendro nya guvivbe, gani? Gu vbanyisa muthu, mwendro gu mu songa?” Aholu avo va di degula, basi.

⁵ Jesu a di khedza vatshavbo va nga bani va mu randrede na gu garadzega khu gu wona guvivba nya myonyo yawe, a di embela mudwali, khuye: “Thawuludza libogo lago.” Uye a di li thawuludza, li hawuluga.

⁶ Vafarisi va di duga vaya tshangana ni avo nya tsawa wa Herodhi va gu luga mano nya gu mu gusonge khayo.

⁷ Jesu a di khuga a gu hongola siwoni ni vapizane vaye, a di landrwa khu gidzemo nya gingi gya Galileya, Judheya,

⁸ ni Jerusalema, ni Idhumeya, Khisikheyi nya tsongo wa Joridhani, ni wubambe nya madhoropa ya Tiro ni Sidhoni. Gidzemo nya gingi, na gi pwide ndruma nya siliwugiso a nga gira Jesu, gi dita gwaye.

⁹ Khavbo avbo, uye a di embela vapizane vaye va mu dongisela gingalavana gasi a si gundrwi khu vathu.

¹⁰ Kha nga olu a nga bani a gu hawulugisa nya vangi dzingumbe dzawe nya dzingi, vathu vatshavbo va nga bani vari ni madwali va di hidzimela gwaye vafela gu mu kuha.

¹¹ Maphuvbo nya guvivbe nayo, ma gu mu wona, ma di khidzima mbeli gwaye ma gu ganela, khayo: “Uwe khuwe Mwamana wa Nungungulu.”

¹² Aholu, uye a di ma degudza a gu ma laya ma si embeli muthu.

Jesu a ngu hatha vapostoli

¹³ Khavbo avbo, Jesu a di gwela gigomoni, a gu rana avo a nga va gola. Avo va di hongola gwaye.

¹⁴ A di emisa likhumi na vavili gasi va khala naye, ni gu va ruma gu gimbila va hevbudza Ivhangeli.

¹⁵ A di va ninga tshivba nya gu hawulugise madwali ni gu gututumisa maphuvbo nya guvivbe.

¹⁶ Malina yawe khaya: Simoni a nga mu thangisago lina la Pedro;

¹⁷ Jakobe ni ndriyaye Johane, sanana sa Zebhedhewu, a nga va thangisago lina la Bhowanerige, gu tshamusago pwani: “Sanana nya Libara.”

¹⁸ Andreya, Filipi, Bharitolomewu, Matewu, Tomasi, Jakobe, mwamana wa Alifewu, Tadhewu, Simoni, Mwama Mukhanani,

¹⁹ ni Judha Sikarioti, a gu uye a nga mu ningelago.

Vahevbudzi nya nayo va ngu vala Jesu

²⁰ Khavbo avbo, a di hongola gaya ni vapizane vaye. Gidzemo gi di tombana nyaluphye nyamba mu ninga ni gikhati gidugwana nya gumane gu hodza.

²¹ Valongo vaye, na va pwide esi, va dita gasi guta mu dzega, kholu va di pimisa nya gukhavo a di handruga.

²² Ni vahevbudzi nya Nayo va nga bani va dzude khu Jerusalema va di khavo: “Uye a gu fumwa khu Bhelizebhu, khongolo nya maphuvbo nya guvivbe, gambe a gu tutumisa maphuvbo nya guvivbe khu tshivba ya Bhelizebhu.”

²³ Khavbo avbo, Jesu a di va rana a va wudzisa khu sipimaniso, khuye: “Gu ngu kodzega kharini Sathane a tutumisa Sathane?

²⁴ Mufumo wu dzi kabanisago khu mitsawa yi wugelanago khu gyawe, mufumo wowo kha wuyi danga.

²⁵ Ndranga yi dzi kabanisago yabune, ndranga yoyo kha yi na pindruga.

²⁶ Kharati nugo, Sathane a gu dzi kabanisa ni gu dzi wugela abune, kha na pindruga, a na mbembisa guralo.

²⁷ Mwalo a dzi kodzago gu bela nyumbani nya ndrena gasi gu yi phanga nyamba phela khu gu yi hunga. Hwane nya isoso, khavbo a dzi kodzago gu yi phanga.

²⁸ Khu lisine nyi ngu mi embelani gukheni: Muthu watshavbo a ngu kodza gu tsetseledwa sighoho ni guvivba gwatshavbo a ganelago nya guvale Nungungulu.

²⁹ Aholu uye a valago Liphuvbo nya Guage, kha na tsetseledwa, a na simama ni giwono gyaye kala gupindruga.”

³⁰ A di ganela kharato khu kotani va nga khavo a na ni liphuvbo nya guvivbe.

Mayi ni vandruye va Jesu

³¹ Khavbo avbo, a di vboha mayi waye ni vandriyaye, va ta ema khu vbavbandze va mu ranisa.

³² Gidzemo gi di khade gi mu randrela, va mu embela, khavo: “U ngu vbwetwa khu mayi wago ni vandriyago, vbavbandze.”

³³ Aholu Uye a di va hakha, khuye: “Khu mani mayi wangu ni vandriyangu?”

³⁴ Na khusedzide maho a khedza vatshavbo va nga bani va khade va mu randrela, a di khuye: “Mayi wangu ni vandriyangu khavo ava.

³⁵ Kholu muthu watshavbo a girago gugola gwa Nungungulu khuye a gu ndriyangu nya mwama, nuye nya nyamayi ni mayi wangu.”