Marko 13 - Bhibhiliya Nya Guage

Jesu a ngu tivisa gu pfhungumudwa nya Nyumba ya Nungungulu

¹ Na gu duga khu Nyumbani ga Nungungulu, moyo nya mupizane a di mu embela, khuye: “Muhevbudzi, nga wona wukhongolo nya siwindri sesi nya dzinyumba ni wumburi nya mavbahelo yakone!”

² Aholu Jesu a di mu hakha a mu embela, khuye: “U ngu dzi wona dzinyumba dzedzi nya dzikhongolo? Dzatshavbo dzi na pfhungumudwa. Kha gi na tshala giwindri vbatshani nya giwindri gikwawe.”

³ Na khade gigomoni nya miolivha gi khedzanidego ni Nyumba ya Nungungulu, Pedro, Jakobe, Johane ni Andreya va di mu wudzisa vari venga, khavo:

⁴ “Hi embele, lini si na gu dugelelago satshavbo soso? Giyeyedzo muni hi na wonago khigyo gukhethu somo vbafuvbi ni gu tadzisega?”

⁵ Khavbo avbo, Jesu a di phela gu va embela, khuye: “Dzi woneleni, gasi mu si kanganyiswi khu vathu.

⁶ Va nata nya vangi khu lina langu, khavo: ‘Kheni Kristo.’ Va na pengisa va nya gutala.

⁷ Mwa gupwa huwa nya dzinyimbi ni guganedwa khu dzinyimbi ni ligwaha nya dzinyimbi mu nga thurugi; gu vbwetega si girega isoso, aholu khandri mahegiso.

⁸ Kholu litigo li na wugela limbe litigo, mufumo wu wugela wumbe mufumo; malanga nya mangi gu na manega sirevareva ni ndzala. Satshavbo soso a na bani ari guphela nya sisaniso.

⁹ “Dzi woneleni, kholu va na mi ningela ga valamuli, mu na ya kwamudwa Dzinyumbani nya nombelo, mu yiswa ga vamwamangulu ni vafumeli khu kotani yangu, gasi gu nyi fakazani mahoni gwawe.

¹⁰ Aholu, guphela gu vbwetega gu enedza mayigo yatshavbo khu gutivisa Ivhangeli.

¹¹ Mwa gu yiswa ga vafumeli gasi guya lamudwa mu nga garadzegi khu egi mu na guya ganelago. Mu na ganela esi mu na gu embedwago khu gikhati gyogyo. Kholu, khandrenu mu na ganelago, aholu khu Liphuvbo nya Guage.

¹² Muthu a na ningela ndriyaye a songwa, babe a ningela gyanana; sanana si na wugela vavelegi vawe, si va songisa.

¹³ Mu na vengwani khu wathu vatshavbo kotani nya lina langu. Aholu oyu a na timiselago kala mahegiso a na vbanyiswa.

Tshanisa nya yikhongolo Jerusalema

¹⁴ “Aholu, mwa gu wonani manyala nya guthise na ma emisidwe avba gu si yeligo oyu a hevbulago a na si pime gwadi, avo va guromo Judheya va na thavele sigomoni.

¹⁵ Oyu a na bani a romo vbatshani nya nyumba a nga tshigi gambe a bela nyumbani gasi guya dzega gilogyo;

¹⁶ ni oyu a na bani a romo thembweni a nga bweleli gambe hwane gasi guya dzega guambala.

¹⁷ A na bani ari tshanisa ga va nya dzimimba ni va nya gu mamisa matshiguni yoyo.

¹⁸ Lombelelani gasi, si si dugeleli vbagirametunu

¹⁹ Kholu, khu matshigu yoyo, yi na manega tshanisa nya yikhongolo nya gu gima yi si gu manegi gukhugela avbo Nungungulu a nga vanga litigo, kala matshigu ya muhuno, gambe gima kha yi na manega gambe.

²⁰ Nari pwani Pfhumu kha nga rodzisa matshigu yoyo, mwalo a nga vbweta gu vbuluga; aholu, khu kotani nya vale a va hathidego a ma rodziside.

²¹ Khu kharato, va guta mi embelani, khavo: ‘Wonani, Kristo womo avba’, mwendro gukhavo: ‘Khuye wule,’ mu nga dzumelini.

²² Kholu va na dugelela Vakristo ni vaprofeti nya malipha. Va na gira siliwugiso nya gutale, si na dzi kodzago gu pengisa ambari sihathwa.

²³ Khu kharato, dzi woneleni, nyi mi embedeni matshigu ma nga romo.

Guwuya ga Mwamana wa Muthu

²⁴ “Khu matshigu yoyo, hwane nya tshanisa yeyi, lidambo li na sivbala, ngima kha wu na wenengedza.

²⁵ Dzinyeledzi dzi na thegela khu Ndzadzini ni dzitshivba nya Ndzadzini dzi na dzudzwa.

²⁶ Khavbo avbo, va na wona Mwamana wa Muthu na gu tshiga khu vbakari nya lipfhi na tade khu tshivba nya yikhongolo ni gidhumo.

²⁷ A na rumela dzingilozi dzaye gasi guta tombanisa sihathwa sa maphuvbo yatshavbo ya mana, gukhugela mahegiso nya litigo kala mahegiso nya ndzadzi.

Gipimaniso nya ngure

²⁸ “Manani gihevbudzo khu gipimaniso nya ngure: Wa gu thela matamo nya nyenvu mu ngu dziti nya gukhenu nango nya maronga yi vbohide.

²⁹ Kharato nugo, mwa gu wonani satshavbo sesi na si gu dugelela, dzitini nya gukhenu gikhati vbohide.

³⁰ Khu lisine, nyi ngu mi embelani gukheni: Melana yoyu kha wu na vbindra si si gu dugeleli satshavbo sesi.

³¹ Yi na vbindra ndzadzi ni mafu, aholu magana yangu kha ma na vbindra.”

Mwalo a litigo litshigu ni gikhati

³² Gasi gikhati ni litshigu, mwalo a dzitigo, ambari dzingilozi dza Ndzadzini, ambari Mwamana, sa gu tidwa khu Babe basi.

³³ Dzi woneleni, khalani na mu dongide ni gu lombelela, kholu kha mu liti litshigu ambari gikhati.

³⁴ Gu ngu fanana ni muthu nya gukari a nga donga liendro, a di khuga a tshiyedza ndranga ga sithumi saye, a kabanisela mithumo ga moyo ni moyo, a ruma ghadhi gu tshala yi khevisela.

³⁵ Khu kharalo, khalani na mu dongide kholu kha mu giti gikhati a wuyago khigyo mune ndranga, gani silambo, gani vbakari nya wutshigu, gani vbakari nya mihani, gani mambagugya, gani dzimindrudzile;

³⁶ a nga wuya khu guvbiredza ata mi mana na mu lade.

³⁷ Esi nyi mi embelago nya gu embela vatshavbo, kheni: Khalani na mu dongide.