Luka 7 - Bhibhiliya Nya Guage

Guhawulugiswa ga githumi gya muthangeli

¹ Jesu na vbedzide gu ganela iso a nga embela gidzemo, a di hongola Kafarinawume.

² Muthangeli moyo nya gikwata nya lizana masotshwa a diri ni githumi gyaye nya gu gi gole ngudzu gi nga bani gi gu dwala nya guhadza gufa.

³ Na pwide ndruma ya Jesu, a di rumela madhota nya gukari nya Vajudha gasi guya mu lomba gu ata vbanyisa githumi gyaye.

⁴ Na va vbohide ga Jesu, va diya mu lomba pharamawundru, khavo: “Uye a ngu fanela gu giredwa wuhindzi wowo,

⁵ kholu a ngu gola va na gyathu; gambe khuye a nga hi vbahela nyumba nya nombelo.”

⁶ Jesu a di hongola navo. Na va vbweta gu vboha ndrangani, muthangeli nya masotshwa a di rumela mwango khu dzipari dzaye, khuye: “U nga dzi garadzi, Pfhumu, kholu nyi mwalo fanelo nya gu uwe u bele ndrangani gwangu.

⁷ Nyi di dzipwa na nyiri mwalo fanelo nya gu gu khinge; aholu rumela lito limwedo lago basi, githumi gyangu gi na hawuluga.

⁸ Kholu, eni neni, ambari nyi gu ni vakhongolo vangu, nyi na ni masotshwa nyi ma rumago neni. Mumbe gu mu ruma, kheni: ‘Indra’, a gu hongola; mumbe, kheni: ‘Delu’, ata; githumi gyangu, kheni: ‘Gira egi’, gi gira.”

⁹ Na pwide magana yaya, Jesu a di liwuga ngudzu, a gu embela avo va nga bani va mu landra, khuye: “Nyi ngu mi embelani, kheni: Nyi si gu mani gukhodwa nya gukhongolo nya nga ogu, ambari ga va na Israyeli.”

¹⁰ Sirumwa sile, na si bwelede gaya, si diya mana githumi na gi hawulugide nya dzadi.

Guwuswa ga gyanana gya noni ya Nayimi

¹¹ Khavbo avbo, khu hwane nya esi, Jesu a di hongola dhoropani ga Nayimi, gumogo ni vapizane ni gidzemo nya gingi.

¹² Na va gu vboha dhoropani, va di kotsana ni muthu a nga bani a guya dzingwa, a diri gyanana gya gimwegyo gya mayime moyo nya noni. Va diromo vathu nya vangi va dhoropani mule va nga bani va gu hongola navo, na va gu bangaladza malile wule.

¹³ Pfhumu na mu wone, a di mu pwela gisiro, a gu mu embela, khuye: “U nga lili.”

¹⁴ A di hidzimela, aya kuha lithatho. Avo va nga bani va li pharide, va di ema. Khavbo avbo, a di khuye: “Lidzaha, eni nyi ngu gu ruma, wuga.”

¹⁵ Mufi a di wuga a khala khu giwunu gyaye, a gu phela gu ganela. Khavbo avbo, Jesu a di mu ningela ga mayi waye.

¹⁶ Vatshavbo va di tala khu githawo, va gu dhumisa Nungungulu, khavo: “Tumbulugide vbakari gwathu muprofeti nya khongolo; Nungungulu endrede ngamo yaye.”

¹⁷ Ndruma nya giliwugiso gegi yi di phalalega ni Judheya gwatshavbo ni mayigo yatshavbo ya vbafuvbyana mule.

Sirumwa sa Johane ga Jesu

¹⁸ Vapizane va Johane va diya mu tivisa satshavbo iso si nga dugelela.

¹⁹ Khavbo avbo, Johane a di rana vapizane vavili, a va rumela ga Pfhumu, gasi guya mu wudzisa, khavo: “Khuwe wule a vbwetago guta, mwendro hi nga gu lindrela mumbe?”

²⁰ Na va vbohide ga Jesu, va di khavo: “Johane Mubhapatisi a hi rumide guta gu wudzisa: Khuwe wule a vbwetago guta, mwendro hi nga gu lindrela mumbe?”

²¹ Gikhati gyogyo furi Jesu a di hawulugisa vathu nya vangi madwali ni gu vbanyisa ava va nga bani va gu saniswa khu maphuvbo nya guvivbe, gumogo ni gu tula maho sikhumu.

²² Jesu a di va hakha, khuye: “Indrani muya tivisa Johane iso mu si pwago ni gu si wona: Sikhumu si ngu wona, sikhurubwa si ngu gimbila, va nya sokono va ngu agiswa, sivbwiri si ngu pwa, vafi va ngu wuga, Mahungu nya Yadi ma ngu hevbudzwa sisiwana.

²³ Kategide saye wule a gumba khuvekhiswa khu magana yangu.”

Jesu a ngu fakazela Johane

²⁴ Na va hongode vapizane vale, Jesu a di tshala a wudzisa gidzemo khu mahungu ya Johane, khuye: “Ginani mu ngaya gi wona giwulani? Tshava nya gu hanahaniswe khu phuvbo, gani?

²⁵ Gasi ginani mu ngaya gi wona? Muthu nya gu ambale sombo nya gumbure, gani? Avo va si hamugigo gilo ni gu ambala gwadi va gu dugela dzindrangani nya vafumeli.

²⁶ Ginani mu ngaya gi wona, na? Muprofeti? Ina. Khidzo nyi mi embelago. Gambe guvbindra ni muprofeti.

²⁷ Khuye oyu a thudwago khu Milowo, pwani: ‘Nyi na thangisa mbeli gwago girumwa gyangu, gasi guya gu dongisela ndzila.’

²⁸ Khidzo nyi mi embelago, kheni: Vbakari nya vathu vatshavbo va velegidwego khu vanyamayi, mwalo muprofeti nya khongolo guvbindra Johane; aholu muthu nya mahegisela Mufumoni wa Ndzadzini khongolo guvbindra uye.”

²⁹ Vatshavbo vale va nga mu yingisago na gu ganela isoso, ambari ni vahengisi nya mikhupo, va di rungudza, khavo: “Khu lisine Nungungulu lulamide.” Khavo avo va nga bani va hakhide gubhapatisa ga Johane.

³⁰ Aholu, vafarisi ni vahevbudzi nya Nayo va nga bombago gubhapatisa ga Johane va bombide khu kharato makategwa va nga bani va dongisedwe khu Nungungulu.

³¹ Jesu a di khuye, “Nyi na va fananisa ni mani vathu nya mela yoyu? Va ngu fanana ni mani?

³² Va ngu fanana ni sanana sile nya gu, na siromo tendrelani si ganedzisana, khiso: ‘Hi wombide sitoliyo, kha mwa hana! Hi embide dzindzimo nya wusiwana, kha mwa lila!’

³³ Kholu dzude Johane Mubhapatisi, a si hodzigo gilo ni gumba sela wadwa, mwari, khenu: ‘A na ni liphuvbo nya guvivbe.’

³⁴ Dzude Mwamana wa Muthu, a hodzago ni gu sela, mwari, khenu: ‘Likhondrobwa, bewudzi, bwelo khavbo, pari nya vakhuphisi ni sighohi.’

³⁵ Aholu guti ga Nungungulu gu lulamide mahoni ga vale va gu hakhago.”

Gighohi nya gu dzi sodzise

³⁶ Mufarisi moyo a di rana Jesu, gasi guya hodza naye. Na vbohide ndrangani momo, a di khala vbamezatunu.

³⁷ Nyamayi moyo, a nga bani a tidwa kha nga gighohi dhoropani mule, na dzitide nya gukhuye Jesu womo a hodza ndrangani ga mufarisi, a dita ni gigasi gyaye nya mafura nya gunungele ngudzu,

³⁸ ata khala khu hwane gwaye na gu lila. A di naganisa migondro ya Jesu khu marongo, a gu yi bavbulela khu ndzudzu waye, a gu yi bhejari ni gu yi todza mafura nya gunungele.

³⁹ Mufarisi wule a nga mu ranago, na wonide esi, a di ganela enga mapimoni gwaye, khuye: “Nari gupwani oyu mwama muprofeti kamwe, na gu muti khu mani, ni gu muthu muni nyamayi a mu khuhago, kholu gighohi!”

⁴⁰ Khavbo avbo, Jesu a di mu embela, khuye: “Simoni, gyomo nyi vbwetago gu gu embela.” A di hakha, khuye: “Ganela, Muhevbudzi.”

⁴¹ Jesu, khuye: “A diromo muthu a nga bani a fiyariside dzitsapawu vathu vavili: Moyo wakone a diri ni mangava nya livbandre mazana (500) dzipondro; mumbe, lizana dzikinyeta.

⁴² Kha nga ulo va nga bani vari mwalo dzitsapawu nya gulivbe khidzo, a di va tsetselela va vavili. Khu wevbini nya ava va vavili a nga mu golago ngudzu?”

⁴³ Simoni a di hakha, khuye: “Khu lisine, nya gu wona gukheni khu wule a nga mu tsetselela mangava nya mangi.” Jesu a di mu embela, khuye: “U hakhide gwadi.”

⁴⁴ A di thendregedza a gu khedza nyamayi wule, a embela Simoni, khuye: “U ngu mu wona nyamayi yoyu? Eni nyi bede ndrangani gwago, khwa nyi ninga mati nya guhandze migondro yangu; gasi uye a nyi handzide migondro khu marongo yaye, bwelo khavbo a yi bavbulela khu ndzudzu waye.

⁴⁵ Uwe khwa nyi bhejari; gasi uye, gukhugela nyi bela, kha garali khu gu bhejari migondro yangu.

⁴⁶ Uwe khwa nyi phorodza mafura hungoni; gasi uye a nyi todzide migondro khu mafura nya gunungele.

⁴⁷ Khu kharato, nyi ngu gu embela, kheni: A ngu tsetseledwa sighoho saye nya singi, kholu yeyedzide lihaladzo nya likhongolo. Aholu wule a tsetseledwago silo nya sidugwana, a ngu gola vbadugwana.”

⁴⁸ Khavbo avbo, a di embela nyamayi wule, khuye: “Siwono sago si tsetseledwe.”

⁴⁹ Avo va nga bani varomo vbamezatunu va di phela gu wudzisana, khavo: “Gasi khu mani oyu a dzi kodzago gu tsetselela sighoho?”

⁵⁰ Jesu a di embela nyamayi wule, khuye: “Gukhodwa gwago gu gu vbanyiside. Indra khu gurula.”