Luka 22 - Bhibhiliya Nya Guage

Vajudha va ngu hunga gikungo nya gusonge Jesu

¹ Wu di gu hidzimela buzo nya Sibaba nyambana mela, wu ranwago buzo nya Phasika.

² Vakhongolo nya vaphasi nya mhamba ni vahevbudzi nya Nayo va di vbweta lipindru nya gusonge Jesu, aholu va di gu thava gidzemo.

³ Sathane a di bela khu ga Judha, a ranwago Sikarioti, a nga bani ari moyo nya vale nya likhumi na vavili.

⁴ A diya ganela ni vaphasi, gumogo ni dzindruna va hevbula mano nya guningele khayo Jesu.

⁵ Avo va di nengela, va gu mu thembisa gu mu ninga dzitsapawu.

⁶ Judha a di bonga, a gu vbweta gikhati nya gyadi nya gu mu ningele khigyo, nyamba tidwa khu gidzemo.

Gudongisedwa nya gilalelo nya guhegise

⁷ Na li vbohide litshigu nya sibaba nyambana mela, a nga bani ari litshigu nya gusongwe ginvutana.

⁸ A di ruma Pedro ni Johane, khuye: “Indrani muya hi dongisela iso si vbwetegago gasi hi hodze Phasika.”

⁹ Va di mu wudzisa, khavo: “Wa guvbweta khuwe hiya dongisela hayi?”

¹⁰ A di va hakha, khuye: “Gikhati mu na belago dhoropani, mu na tshangana ni mwama nari ni kanvu nya mati. Mu landreni kala ndrangani a na belago,

¹¹ muya embela mune ndranga, khenu: Pfhumu a hi rumide guta gu wudzisa: Khu yevbini nyumba nyi na hodzelago umo nvutana nya Phasika ni vapizane vangu?

¹² A na mi yeyedzani nyumba nya yikhongolo yi gomo gitezi, umo mu na guya manago na gu ladzidwe. Dongiselani umo.”

¹³ Va di hongola, vaya mana satshavbo kha nga idzo a nga va embelago khidzo. Va diya dongisela umo Phasika.

Gilalelo nya guhegise

¹⁴ Na gi vbohide gikhati, Jesu a diya khala vbamezatunu gumogo ni vapostoli,

¹⁵ a gu va embela, khuye: “Nyi dogorede ngudzu gu hodza nanu Phasika yeyi na nyi si gu saniseki,

¹⁶ kholu nyi ngu mi embelani, kheni: Kha nyi na yi hodza gambe, kala yi tadzisega Mufumoni wa Ndzadzini.”

¹⁷ Na dzegide gikombe, a di bonga, khuye: “Dzegani, mu tshiyelana mwatshavbo.

¹⁸ Kholu nyi ngu mi embelani nya gukheni kha nyi na sela gambe wadwa nya dziuvha kala wu vboha Mufumo wa Nungungulu.”

¹⁹ Khavbo avbo, a di dzega gibaba, na gu bonga, a di gi kabanisa, a va ninga, khuye: “Egi givili gyangu, gi na ningedwago khu kotani yanu; girani esi khu gialakanyo gyangu.”

²⁰ [Hwane nya gilalelo, a di dzega gikombe, a gira idzosaye, khuye: “Gikombe gegi khya gidzumeledzwano nya giphya gi tiyiswago khu novba wangu, wu na vbaladzedwago enu.]

²¹ Aholu, dzitini nya gukhenu uye a vbwetago gu nyi ningela nyi naye vbamezatunu vbavba!

²² A gu nari Mwamana wa Muthu, a na landrisa esi si hungidwego khu Nungungulu. Aholu libango li na ni wule a na mu ningelago!”

²³ Va di phela gu wudzisana, khavo: “Khu mani a vbwetago gu gira isoso?”

Khu wevbi a gu khongolo Mufumoni wa Ndzadzini

²⁴ Vapizane va di phela gu ganedzisana, na va vbweta guti khu mani a gu khongolo vbakari gwawe.

²⁵ Jesu a di va embela, khuye: “Vafumeli nya mayigo va gu ma khozisa khu tshivba gambe avo va fumago khu gukhozisa va gu ranwa vafumeli nya wuhindzi.”

²⁶ Gasi vbakari gwanu gu nga giregi kharato; uye a gu khongolo a na khale kha nga mahegisela; ni uye a rumago kha nga uye a thumelago vakwawe.

²⁷ Gasi khu mani a gu khongolo: Uye a khalago vbamezatunu mwendro khuye a ningago guhodza, gani? Khu lisine khongolo khu wule a khalago vbamezatunu! Gani olu eni nyi womo vbakari gwanu kha nga wule a mi thumelago.

²⁸ Enu khenu mu nga nyi bangaladzani gikhati gyatshavbo gulingwani gwangu.

²⁹ Khu kharato, nyi na mi ningani mufumo kha nga Babe a nga nyi ningago neni,

³⁰ gasi mu hodze ni gu sela vbamezatunu nya buzo wangu. Mu na khalani vbasikhalotunu nya wufumu, mu lamula mahundzu yatshavbo ya Israyeli, nya likhumi na mavili.

Jesu a ngu tivisa Pedro khuye a na mu danga

³¹ Pfhumu a di embela gambe Simoni, khuye: “Simoni, Simoni, dziti nya gukhuwe Sathane a mi lombideni gasi gu mi vbevbera kha nga mavbila.

³² Aholu eni nyi di lombelela khu uwe ga Nungungulu gasi gukhodwa gwago gusi rereki. Gani olu, gikhati u na vbindrugedzago uwe, u na tiyisa vandriyago.”

³³ Uye Simoni a di khuye: “Pfhumu, avba nyi guromo nyi sambanyide guya nago pasoni, ni gufani.”

³⁴ Jesu a di mu hakha, khuye: “Nyi ngu gu embela, Pedro: Kha na emba khonge muhuno nu si gu nyi dangi nyondro tharu.”

Gikhati nya gudwane

³⁵ Jesu a di engedza gambe, khuye: “Gikhati nyi nga mi rumelani nyambana gipatsi, nyambana rava, nyambana silato, gyomo gi nga mi kenelelago, gani?” Vapostoli va di hakha, khavo: “Gi mwalo gi hi keneledego.”

³⁶ A di engedza gambe, khuye: “Gasi olu, uye a gu ni gipatsi a na phare; nuye a gu ni rava a na phare nuye. Uye a gu mwalo litshari, a na rengise libhadzi gasi gu renga litshari limwedo.

³⁷ Kholu lisine nyi mi embelago kheli: Gu vbwetega si girege gwangu iso si ganedwago khu milowo, nya gupwani: ‘Sayedwe vbakari nya sighohi.’ Khu lisine, iso si nyi lindredego si ngu vbweta gu girega.”

³⁸ Va di khavo: “Pfhumu, khu ma woni matshari mavili aya.” Gasi uye a di va hakha, khuye: “Basi.”

Gusala ga Jesu Getsemani

³⁹ Kha nga giolovedzo gyaye, a di duga a gu hongola gigomoni nya Miolivha. Vapizane va di hongola naye.

⁴⁰ Na va vbohide, a di va embela, khuye: “Lombelelani, gasi mu si beli gusengwani.”

⁴¹ Khavbo avbo, a di leya vbadugwana, aya lombelela, khuye:

⁴² “Baba, wa gu dzina nyi leyisele gikombe gegi nya wuvi. Ambari ulo, gu nga giregi guhaladza gwangu; aholu, ugo gwago.”

⁴³ Khavbo avbo, yi dita ngilozi khu Ndzadzini, gasi guta mu tiyisa.

⁴⁴ [Na gu tshaniseka ngudzu, a di simama gu lombelela, khu tshivba, na gu ruta lithonga nya nga madona nya makhongolo nya novba, ma gu thegela mafuni.]

⁴⁵ Na vbedzide gu lombelela, a di yela vapizane, a va mana na va lade khu madidikhana ni gu garadzega.

⁴⁶ A di va wudzisa, khuye: “Khu ginani mu lalago? Wugani, mu lombelela, gasi mu si beli gusengwani.”

Gumodwa ga Jesu

⁴⁷ Jesu na nga guganela li di vboha lidhuma nya vathu, na li gu thangedwa khu moyo nya vale nya likhumi na vavili, nya gupwani khu Judha, a nga hidzimelago ga Jesu gasi guya mu bhejari.

⁴⁸ Khavbo avbo, Jesu a di mu wudzisa, khuye: “Judha, ina u ngu tiya gu ningela Mwamana wa Muthu khu gu mu bhejari, uwe?”

⁴⁹ Vapizane va nga bani va mu randrede, na va wone iso si nga bani si vbweta gu dugelela, va di mu wudzisa, khavo: “Pfhumu, hi dwana navo khu matshari, gani?”

⁵⁰ Moyo wawe a di bayisa githumi gya khongolo nya vaphasi nya mhamba a gu gi pila ndzeve ya nyamudye.

⁵¹ Aholu Jesu a di va kawuka, khuye: “Basi! Va digeni.” A di phara ndzeve nya githumi a gi hawulugisa.

⁵² Khavbo avbo, Jesu a di embela lidhuma latshavbo li nga yago gasi guya mu mola: Vakhongolo nya vaphasi, vathangeli nya Nyumba ya Nungungulu ni madhota, khuye: “Mu di donga matshari ni sighomba khwatshi mwa guta mola gighevenga!

⁵³ Matshigu yatshavbo nyi diri nanu Nyumbani ga Nungungulu, kha mwa nyi mola! Gasi egi khigyo gikhati gyanu, a gu mufumo nya gidema.”

Gudanga ga Pedro

⁵⁴ Khu vbale, va di dzega Jesu va gu hongola naye ndrangani ga khongolo nya muphasi nya mhamba. Pedro a di gu landra khu hwindzo.

⁵⁵ Kha nga ulo va nga bani va khondriside nilo vbakari nya ndranga, va wora, Pedro a diya khala nuye vbakari gwawe.

⁵⁶ Githumi gimwegyo nya nyamayi, na gi mu wone na khade na gu wora nilo, gi di mu khedza gwadi, khigyo: “Oyu nuye a diri naye.”

⁵⁷ Aholu Pedro a di danga, khuye: “Nyamayi, eni kha nyi muti.”

⁵⁸ Khadukhadu, mumbe gambe a di khuye: “Uwe nuwe u moyo wawe.” Gasi Pedro a di khuye: “Amasawu, kha nyi muti.”

⁵⁹ Na gu vbindride gipimo nya wora, mumbe gambe a dita temarisa, a ganela, khuye: “Khu lisine, oyu nuye a diri naye, gambe Mugalilewu nuye.”

⁶⁰ Pedro a di khuye: “Amasawu, kha nyi siti niso u ganelago.” Gikhati gyogyo, na ngu gu ganela, wu di emba khonge.

⁶¹ Pfhumu, na yi thendregedzide yi mu khedza mahoni, Pedro a di dundruga magana ya Pfhumu, gikhati yi nga mu embelago, khiyo: “Wu si gu embi khonge, u na nyi danga guraru.”

⁶² A di duga vbavbandze aya lila khu wuvi waye watshavbo.

Jesu a ngu phela guvadwa

⁶³ Gasi vale va nga bani va gu mu ghadha, va di mu vala ni gu mu sanisa.

⁶⁴ Va di mu tshika maho na va mu wudzisa, khavo: “Nga tumba! Khu mani a nga gu veta?”

⁶⁵ Va di mu vala khu simbe nya gutale.

Jesu a ngu lamudwa khu khongolo nya vaphasi nya mhamba

⁶⁶ Na gugide, wu di girwa tshangano nya madhota, vakhongolo nya vaphasi nya mhamba, ni vahevbudzi nya Nayo. Va di dzega Jesu vaya naye phathani gwawe.

⁶⁷ Va di mu embela, khavo: “Hi embele lisine. Ina kamwe uwe khuwe Kristo, gani?” Uye a di va hakha, khuye: “Nya gu mi embelani, kha mu na khodwa;

⁶⁸ nya gu mi gira giwudziso, kha mu na nyi phindrula.

⁶⁹ Aholu Mwamana wa Muthu, gukhugela olu, a na khala nyamudye ga Nungungulu.”

⁷⁰ Vatshavbo va di mu wudzisa, khavo: “Sa gu yeyedza gupwani uwe u Mwamana wa Nungungulu, gani?” A di va hakha, khuye: “Mu ngu ganela, khenu kheni.”

⁷¹ Khavbo avbo, va di khavo: “Hi na dzi garadzela gambe ginani khu gu vbweta dzifakazi? Hi mu pwide hatshavbo na gu ganela abune.”