Luka 2 - Bhibhiliya Nya Guage

Guvelegwa ga Jesu

¹ Khu matshigu yale, gu di tshayedwa thetho nya gilovela nya litigo latshavbo khu mufumeli nya khongolo Sezari Augusto.

² Gilovela gegi nya guphele gi giregide gikhati Kirino a nga bani ari mufumeli wa Siriya.

³ Muthu ni muthu a di ya lovedwa tigoni gwawe nya mavelego.

⁴ Josefe nuye, a di khuga khu dhoropani ga Nazareta wa Galileya a gu hongola, tigoni ga Dhavhidhe, a gu Bhetlehema gwa Judheya, kholu a diri wa nyumbani ya Dhavhidhe,

⁵ gasi guya dzi lovedzisa gumogo ni Mariya, mwangadzi waye, a nga bani ari ni mimba.

⁶ Na va romo iyoyo, Mariya a di vbohedwa khu matshigu yaye nya guhefemule,

⁷ a gu velega gyanana gyaye nya matiwula, a nga gi fenengedzelago myendra a gi ladzisa mugighowoloni, kholu kha va nga mana wulanga nyumbani nya vaendri.

Dzingilozi dza Nungungulu dzi ngu tivisa vahavisi

⁸ Vbafuvbyana vbale va diromo vahavisi va nga bani va gulala panini va ghadha sifuyo sawe, wutshigu watshavbo.

⁹ Va di tumbulugedwa khu ngilozi ya Pfhumu, va randredwa khu wenengedzo wa Pfhumu, va tala khu hwanga.

¹⁰ Ngilozi yi di va embela, khiyo: “Mu nga thavi, nya guta mi tivisani mahungu maphya nya gutsake nya gukhongolo ngudzu, ma na gu tsakisago vathu vatshavbo.

¹¹ Muhuno olu, Dhoropani ga Dhavhidhe mu velegedwe Muvbanyisi wanu, a gu Kristo, Pfhumu.

¹² Giwonegiso mu na guya mu tigo khigyo, khegi: Mu na mana gyanana na gi fenengedzedwe myendra, na gi ladzisidwe mugighowoloni.”

¹³ Khu githugedza, gu di wonega gumogo ni ngilozi lidhuma nya mabutho ya Ndzadzini ma rungudza Nungungulu, khayo:

¹⁴ “Rungudzo ga Nungungulu Ndzadzini, gurula mafuni ga sigodwa saye.”

¹⁵ Hwane nya gu dzingilozi na dzi bwelede Ndzadzini, vahavisi va di embeledzelana, khavo: “Hongoleni Bhetlehema hiya wona iso si dugeledego, esi hi tivisidwego khu Pfhumu.”

¹⁶ Khavbo avbo, va di hongola khu guvbiredza, vaya mana Mariya ni Josefe ni gyanana, na gi ladzisidwe mugighowoloni.

¹⁷ Na va va wone, va di phela gu ganela iso va nga embedwago khu mahungu nya gyanana gile.

¹⁸ Vatshavbo va nga bani va gupwa, va di liwuga khiso si nga bani si gu ganedwa khu vahavisi.

¹⁹ Gasi Mariya, a di vegedza satshavbo sile khanani gwaye na gu zama guti tshamuselo wakone.

²⁰ Vahavisi va di bwelela na va gu dhumisa ni gu rungudza Nungungulu khu gu wona nya gukhavo satshavbo va nga si wonago ni gu sipwa si ngu fanana niso va nga embedwago khu ngilozi.

Litsimba la Jesu

²¹ Na gu vbindride livbandre na mararu matshigu, gasi gu mu hanisa wugwera, va di mu thangisa lina la Jesu, a gu ilo a nga thangiswago khu ngilozi mayi waye na si gu khuri mimba.

Gubikedwa ga Jesu Nyumbani ga Nungungulu

²² Na ma vbindride matshigu nya guagiswe gwaye, gasi gu landrisa Nayo wa Mosi, Mariya ni Josefe va di dzega gyanana va gu hongola nagyo Jerusalema, gasi guya gi bikela ga Pfhumu,

²³ kha nga idzo a rumago Nayo wa Pfhumu wu gukhuwo: “Mwamana watshavbo nya matiwula a na phasedwa Pfhumu”;

²⁴ ni guya gira ningelo nya matuva mavili, khonge ni mbaha mwendro sipombana sivili, kha nga guruma nya Nayo wa Pfhumu.

²⁵ A di gu vbanya Jerusalema mwama moyo nya gupwani khu Simiyoni. Adiri muthu nya gululame ni githawo ga Nungungulu; a di gu lindrela gu tangadziswa ga Israyeli, Liphuvbo nya Guage li diri gwaye.

²⁶ A di wonisidwe khu Liphuvbo nya Guage pwani kha nafa nyamba wona Kristo wa Pfhumu.

²⁷ Na kutsidwe khu Liphuvbo, a diya Nyumbani ga Nungungulu gikhati Jesu a nga yiswago khu vavelegi vaye, gasi guya landrisa milayo yi nga bani yi mu lumba.

²⁸ Simiyoni a di mu dzega, a mu wugarela, a gu rungudza Nungungulu waye, khuye:

²⁹ “Pfhumu, olu diga githumi gyago gi gu hongola khu gurula, kholu u giride iso u nga gi sambanyelago.

³⁰ Kholu nyi wonide guvbanyisa khu maho yangu,

³¹ ugo u gu vegidego vbakari nya vathu vatshavbo.

³² Uye khuye wenengedzo wu na gu wenengedzago va nya mayigo, Uye gambe gidhumo gya Israyeli, ngamo yago.”

³³ Vavelegi va Jesu va di liwuga khiso si nga bani si gu ganedwa khu kotani yaye.

³⁴ Simiyoni a di va kategisa, a gu embela Mariya, mayi wa Jesu, khuye: “Gyanana gegi gi emisedwe gu khunguvanyisa ni gu wusa vathu nya vangi va na Israyeli; gi na vanga guganedzisana;

³⁵ gasi gu wonegiswa mahingigedzo ma sihadego myonyoni nya yingi. Hefemulo wago wu na hekhwa khu litshari.”

³⁶ Gi diromo nigyo gikhosane gimwegyo nya nyamayi gi nga bani giri muprofeti, nya gupwani khu Ana, gyanana gya Fanuweli, nya lihundzu la Aseri.

³⁷ Gi vbanyide ni mwama waye livbandre na mivili myaga. Na gi tshidwe, gi di vbanya kha nga gifurugadzi kala gi nga enedza livbandre na mararu magumi na mina (84) myaga. Gi di gu khala Nyumbani ga Nungungulu, umo gi nga bani gi thumela Nungungulu wutshigu ni mihani, na gi lombelela ni gu hala.

³⁸ Uye nuye a di vboha khu gikhati gile, a di dhumisa Nungungulu gumogo ni gu ganela khu gyanana gile ga vatshavbo va nga bani va gu lindrela guvbanyiswa ga Jerusalema.

³⁹ Na va landriside satshavbo si nga bani si gu lombwa khu Nayo wa Pfhumu, va di bwelela Galileya, dhoropani gwawe ga Nazareta.

⁴⁰ Aholu gyanana gi di gu dandra ni gu mana tshivba na gi tade khu guti ni wuhigo wa Nungungulu.

Jesu Nyumbani ga Nungungulu

⁴¹ Myaga yatshavbo vavelegi va Jesu va di gu hongola Jerusalema, khu gikhati nya Phasika.

⁴² Nari ni likhumi na mivili myaga, va di hongola naye kha nga giolovedzo gyawe.

⁴³ Guvbelani nya buzo, va di bwelela gaya. Aholu mwamana Jesu a di tshala Jerusalema nyamba tidwa khu vavelegi vaye.

⁴⁴ Va di hingigedza gukhavo womo vbakari nya vathu. Na va gimbide litshigu rumba, va di phela gu mu vbweta muvalongoni numo nya vaakelane.

⁴⁵ Na va mu hamugide, va di bwelela Jerusalema, guya mu vbweta.

⁴⁶ Hwane nya matshigu mararu va diya mu mana Nyumbani ga Nungungulu na khade vbakari nya vahevbudzi nya Nayo a va yingisa gumogo ni gu va wudzisa.

⁴⁷ Vatshavbo va nga mupwago va di liwuga khu guti gwaye ni dziphindrulo dzakone.

⁴⁸ Na va mu wone, vavelegi vaye va di thuruga; mayi waye a di khuye: “Mwanangu, u di hi sanisela ginani? Nga wona, babe wago ni eni hi di gu vbweta khu tshivba.”

⁴⁹ Khavbo avbo, Jesu a di khuye: “Mu di nyi vbwetela ginani? Kha mu dziti nya gukhenu fanelo yangu khu gu khala nyumbani ga Babe wangu, gani?”

⁵⁰ Aholu avo kha va nga wu pima gwadi tshamuselo nya magana ya Jesu.

⁵¹ Khavbo avbo, a di relela navo a hongola Nazareta; a di gu va yingela. Mayi waye a di vegedza satshavbo sesi monyoni gwaye.

⁵² Gasi Jesu a di dandra khu guti, ni tanga ni wuhigo, mahoni ga Nungungulu ni ga vathu.