Luka 14 - Bhibhiliya Nya Guage

Jesu a ngu hawulugisa khu litshigu nya Sabhadho

¹ Tshigu mwedo nya Sabhadho, na bede ndrangani ga moyo nya khongolo nya Vafarisi, gasi guya hodza. Vatshavbo va di khusa maho va mu khedza esi a girago.

² A diromo vbale moyo a nga bani a gu dwala khu giwumbwa.

³ Jesu, a di wudzisa ga vahevbudzi nya Nayo ni Vafarisi, khuye: “Gu ngu dzumedziswa mwendro gu himbedzedwa gu hawulugisa khu Sabhadho, gani?”

⁴ Aholu vatshavbo va di degula. Khavbo avbo, Jesu a di kuha muthu wule, a mu hawulugisa, bwelo khavbo a mu ruma gu hongola gaya gwaye.

⁵ Hwane nya isoso a di va wudzisa, khuye: Khu mani, vbakari gwanu, nya gu a wona mwamana waye mwendro mombe yaye na yi thegede namboni, a si hongoligo aya yi nula khu gukhuye litshigu nya Sabhadho?

⁶ Mwalo a nga dzi kodzago gu mu phindrula.

Gu dzi sodzisa

⁷ Na gu wona idzo vathu va nga bani va gu tutumela khidzo malanga nya guthange, Jesu a di va embela gipimaniso gegi:

⁸ “Wa gu ranwa mutshadhotunu u nga tutumeli wulanga nya guthange, a nga bani a ranidwe mumbe nya khongolo gu gu vbindra,

⁹ khu kharato, mune ndranga, a nata gu embela, khuye: ‘Nga leya avbovbo u ningela wulanga oyu.’ U na khuga khu vbale u na tade khu dzitshoni uya khala wulanga wa hwane.

¹⁰ Gasi, wa gu ranwa, indra khala wulanga wa mahegiso, kholu a gu vboha mune ndranga a nata gu embela, khuye: ‘Pari yangu, hidzimela kheno.’ Avbovbo u na khusega mahoni ga vatshavbo va guromo vbamezatunu.

¹¹ Kholu watshavbo muthu a dzi khusedzago a na vbwasamiswa, gasi uye a dzi vbwasamisago a na khusedzwa.”

Ningela nyamba lindrela gu bweledzedwa

¹² Khavbo avbo, a di embela wule a nga mu ranago, khuye: “Wa gu dongisela buzo nya gukari, u nga rani dzipari dzago, vandriyago, valongo, vaakelane vale nya sitetema; u pima gukhuwe avo navo va na gu rana, gasi va gu bweledzela.

¹³ Wa gu dongisela buzo, rana sisiwana, silima, sikhurubwa ni sikhumu.

¹⁴ U na bani u kategide, kholu kha va na mana igyo nya gubweledzele khigyo; u na bweledzedwa khu litshigu nya guwuge ga va nya gululama.”

Gipimaniso nya buzo nya khongolo

¹⁵ Na va pwide esi, moyo a nga bani a romo vbamezatunu a di mu embela, khuye: “Kategide uye a na guya khalago vbamezatunu a hodza Mufumoni wa Ndzadzini!”

¹⁶ Jesu a di mu hakha, khuye: “Muthu nya gukari a di gira buzo nya khongolo, a ramba vathu nya vangi.

¹⁷ Na dongisede satshavbo, a di ruma githumi gyaye guya embela vathu, khigyo: ‘Deluni, satshavbo si dongisedwe!’

¹⁸ Aholu vatshavbo va di hengela monyo moyo nyamba wadi. Uye nya guphele a di khuye: ‘Nyi ngari gu renga gipeto, nya guvbweta guya gi wona; u na nyi divalela, kha nyi na dzi kodza gu manega.’

¹⁹ Mumbe a di khuye: ‘Nyi ngari gu renga livbandre mipatwa nya dzimombe nya gulime, nya guvbweta guya dzi lingedzela; u na nyi divalela, kha nyi manegi.’

²⁰ Gasi mumbe a di khuye: ‘Nyi ngari gu tshadha, khu kharato kha nyi manegi.’

²¹ Githumi gi di bwelela giya tivisa esi ga mune ndranga. Khavbo avbo, mune ndranga a di goroga, a gu embela githumi gyaye, khuye: ‘Indra, olu kamwe, dhoropani gwatshavbo, u gimbila u rana avo u na va manago mu dzindzilani: Sisiwana, silima, sikhumu ni sikhurubwa.’

²² Githumi gi di wuya gita, khigyo: ‘Pfhumu, nyi giride kha nga idzo u rumidego khidzo, aholu wu nga tshade wulanga.’

²³ Khavbo avbo, a di embela githumi gyaye, khuye: ‘Indra dzindzilani ni sindzilanani, u gimbila u rana vatshavbo va ta bela, mwendro nyumba yangu yi na tala.

²⁴ Nyi ngu mi embelani nya gukheni ni moyo nya vale nyi nga bani nyi va ranide kha na linga buzo wangu.’ ”

Sigaradzo hi si manago khu gulandrela Jesu

²⁵ Vathu nya vangi va di gu mu landrela. Jesu, na khuside maho a va khedza, a di khuye:

²⁶ “Uye atago gwangu a mba diga babe, mayi, mwangadzi, sanana, vandriyaye, ni gu dzi diga uye mune, kha dzi kodzi gu khala mupizane wangu.

²⁷ Uye a si rwaligo gihambano gyaye a nyi landrela, kha dzi kodzi gu khala mupizane wangu.

²⁸ Khu mani, vbakari gwanu, a gu vbweta guvbaha langwe, a si pheligo khu gu khala vbavbatshi a wona dzitsapawu a gu nadzo, mwendro dzi ngu enela kala gu yi vbedza?

²⁹ Gasi gu si giregi gu a kemba gwadi khokhweni, a si dzi kodzi gu yi vbedza, a hegwa khu vathu, khavo:

³⁰ ‘Muthu yoyu phede guvbaha, aholu kha dzi kodza gu yi vbedza.’

³¹ Ina ka, khu wevbini mufumeli a hongolago aya dwana nyimbi ni mumbe mufumeli, nyamba phela khu gu khala vbavbatshi a wona mwendro a na dzi khodza gu dwana ni mufumeli a tago ni magumavili mazana (20.000) vama, uye a gu bani ari ni likhumi magumi mazana (10.000) vama, basi?

³² A gu wona khuye kha dzi kodzi, a gu rumela madhota ma khinga mufumeli wule na ngari hwindzo, gasi guya lomba gurula.

³³ Kharati, ni wevbini, a guromo vbakari gwanu, a si digigo iso a gu naso, kha dzi kodzi gu khala mupizane wangu.

Munyu nya lidume

³⁴ “Munyu gilo nya gyadi. Aholu wa gu phusa, wu na lungwa khu ginani?

³⁵ Kha wu ngu gu phasa gilo, ambari gu nonisa wulime, mwendro gu wu gira gitoromu. Wa gu dzudzugwa. Uye a gu ni dzindzeve nya guyingise, a napwe!”