Luka 10 - Bhibhiliya Nya Guage

Gurumedwa nya livbandre na mavili magumi ni vapizane vavili

¹ Khavbo avbo, Pfhumu a di hatha vambe livbandre na mavili magumi vapizane, a va rumela vavili vavili gu thanga, va bela khu mitalalani a nga bani a gu vbweta gu vbindra khumo.

² A di va embela, khuye: “Dzimbewu dzingi, aholu vavbweri vadugwana, khu kharato, lombani ga mune lithembwe a rumela vavbweri nya vangi thembweni gwaye.

³ Indrani na mu gu dziti nya gukhenu nya gu mi rumelani kha nga dzinvuta vbakari nya masolwa.

⁴ Mu nga dzegi kwama, mwendro mirava nya dzimbuva, mwendro silato; mu nga losi vathu ndzilani.

⁵ Ni yevbi ndranga mu na belago, phelani khu gukhenu: ‘Gurula gu na gu manege ndrangani momu!’

⁶ A gu bani a romo muthu nya gurule ndrangani, gurula gwanu gu naya gwaye; a gu bani ari mwalo, gu na wuya gambe gwanu.

⁷ Mu nga legalegi khu ndranga ni ndranga. Khalani ndranga mweyo, mu hodza ni gu sela iso va gu naso, kholu githumi gi na ni fanelo nya guhakhiswe.

⁸ Ni levbini lidhoropa mu na belago, va gu mi hakha, hodzani iso mu na ningwago,

⁹ hawulugisani vadwali mu na va manago, na mu gu embela vathu vatshavbo, khenu: ‘Mufumo wa Nungungulu womo vbafuvbi gwanu.’

¹⁰ Gasi mwa gu bela dhoropani nya gukari va si mi hakhi, dugani na mu gu huwata ni dzindzila dzatshavbo nya lidhoropa, khenu:

¹¹ ‘Wonani, hi ngu phuphuta ni kudzudzwane nya lidhoropa lanu, wu nga bani wu dandramede migondroni gwathu, hi mi tshiyelani. Aholu dzitini nya gukhenu Mufumo wa Nungungulu womo vbafuvbi.’

¹² Nyi ngu mi embelani nya gukheni litshigu nya gulamudwe gu na tsetseledwa Sodhoma guvbindra lidhoropa lolo.

Mayigo nyamba yingela

¹³ “Libango lago Khorazini! Libango lago, Bhetisayidha! Kholu nari pwani Tiro ni Sidhoni va di wonide siliwugiso nya nga iso mu nga si wonago enu, na va dzi sodziside gale khu kotani nya sighoho sawe, va ambala dzisaku ni gu phorola nguma.

¹⁴ Khu kharato, litshigu nya gulamule gu na tsetseledwa Tiro ni Sidhoni guvbindra enu.

¹⁵ Ahati uwe, Kafarinawume! U di vbweta gu khusedzwa kala Ndzadzini, gani? Hulo, u tandregide! U na reledzwa kala vbavbatshi.”

¹⁶ Khu guralo, a di embela vapizane, khuye: “Uye a yingisago enu, kheni a nyi yingisago; gasi uye a nyenyago enu kheni a nyi nyenyago. Kholu wule a nyi nyenyago, a gu nyenya wule a nga nyi rumelago.”

Guwuya ga vapizane

¹⁷ Vapizane vale nya livbandre na mavili magumi va di wuya na va tade khu gunengela, vata, khavo: “Pfhumu, ambari maphuvbo nya guvivbe ma di hi yingisa khu lina lago!”

¹⁸ Jesu a di va embela, khuye: “Eni nyi di mu wona Sathane na gu thega khu Ndzadzini kha nga nyangafula.

¹⁹ Dzitini nya gukhenu nyi mi ningide tshivba nya gugandre dzinyoga ni dzihume, gumogo ni tshivba nya gupale wuhungu watshavbo wa nala. Gi mwalo gi na gu mi girago gilo.

²⁰ Gasi enu, mu nga tsakini basi khu gu yingiswa khu maphuvbo. Aholu tsakani kholu malina yanu ma lovidwe Ndzadzini.”

Jesu muvbanyisi wa va nya gu dzi sodzisa

²¹ Khu gikhati gyogyo, Liphuvbo nya Guage li di tadza Jesu khu litsako a gu ganela, khuye: “Nyi ngu gu rungudza, Baba, Pfhumu nya Ndzadzi ni mafu, kholu u sihede silo sesi va nya guti ni vagengeli, u si yeyedza ga va nya gusolega. Ina, Baba, kholu khiso si nga gu nengedzisago.

²² Satshavbo nyi ningidwe khu Babe wangu. Mwalo a mutigo khu mani Mwamana vbavbandze ga Babe ekha, gambe mwalo a mutigo khu mani Babe vbavbandze ga Mwanaye ekha, ni wule Mwamana a dzinago gu mu tulela.”

²³ Khavbo avbo, a di thendregedza a khedza vapizane vaye, a va embela khu tsawana wawe, khuye: “Ma kategide maho ma wonago iso mu si wonago.

²⁴ Kholu nyi ngu mi embelani nya gukheni: Vaprofeti nya vangi ni vafumeli va dzinide gu wona esi mu si wonago, kha va si wona; ni gupwa iso mu si pwago, gambe kha va sipwa gilo!”

Musamariya nya wadi

²⁵ Khavbo avbo, a di khuga muhevbudzi moyo nya Nayo a mu wudzisa, na gufela gu mu linga, khuye: “Muhevbudzi, ginani nyi fanelago gu gira gasi gu mana guvbanya nya gupindruge?”

²⁶ Jesu a di mu hakha, khuye: “Gasi ginani gi lovidwego omu nya Nayo? Ahati uwe, wa gu hevbula kharini?”

²⁷ Muhevbudzi nya Nayo a di khuye: “U na haladza Pfhumu Nungungulu wago, khu monyo wago watshavbo, khu hefemulo wago watshavbo, khu tshivba yago yatshavbo ni mapimo yago yatshavbo; u gola gambe muthu kwanu kha nga idzo u dzi haladzago khidzo uwe mune.”

²⁸ Jesu a di mu embela, khuye: “U hakhide gwadi. Gira kharato, u na vbanya.”

²⁹ Aholu muhevbudzi nya Nayo khu gu vbweta gu dzi vhikela, a di wudzisa, khuye: “Gasi khu mani muthu khwathu?”

³⁰ Khavbo avbo, Jesu a di mu phindrula, khuye: “Mwama moyo a di gu relela khu Jerusalema na guya Jeriko. A di tshangana ni sighevenga si nga mu phangago satshavbo a nga bani nari naso, si mu khinyela ni gu mu gandredzela, si mu diga vbakari nya ndzila na dzimide.

³¹ Gu di kotsana na guvbindra muphasi nya mhamba khu ndzila yile. Na mu wone, a di leya, nyamba thela kota.

³² A di vbindra nuye mulevhi khu vbale. Na mu wone, a di leya nuye.

³³ Aholu a di vbindra Musamariya, a nga bani ari ni lipfhumba laye, na mu wone, a di mu pwela gisiro,

³⁴ a gu hidzimela, a mu thela mafura ni wadwa dziphandzani, a gu dzi hungelela. Khavbo avbo, a di mu khiledza vbaburutunu gwaye, a mu yisa ndrangani nya vaendri; a mu sayisa.

³⁵ Gandra ni dzimindru a di dusa singerengere sivili a ningela mune ndranga, a gu mu embela, khuye: ‘Nyi sayisele muthu yoyu. Gikhati nyi na gu wuyago nyi nata gu livba satshavbo u na gu bani u mu girede, sa gu lomba dzitsapawu nya guvbindre edzi.’ ”

³⁶ Khavbo avbo, Jesu a di wudzisa muhevbudzi nya Nayo, khuye. “Khu mawonelo yago, khu wevbini nya ava va vararu a nga wonago wule a nga thegela mandzani nya sighevenga kha nga muthu kwawe?”

³⁷ Muhevbudzi nya Nayo a di khuye: “Khu wule a nga mu girelago mithumo nya wuhindzi.” Jesu a di mu embela, khuye. “Indra uya gira nuwe kharato.”

Jesu ndrangani ga Marta ni Mariya

³⁸ Na va gu hongola, Jesu a di bela ni vapizane vaye talalani nya gukari. Nyamayi moyo nya gupwani khu Marta, a di mu hakha ndrangani gwaye.

³⁹ Uye a diri ni ndriyaye nya gupwani khu Mariya, uye a ngata khalago vbafuvbi ga Pfhumu, gasi gupwa magana yaye.

⁴⁰ Aholu Marta, a nga bani a gu gamwa khu mithumo ya mingi, a diya ga Jesu aya, khuye: “Pfhumu, khu theli kota kholu ndriyangu a nyi digedzago mithumo yatshavbo, gani? Nga mu embela ata nyi phasa.”

⁴¹ Pfhumu a di mu hakha, khuye: “Marta, Marta, wa gu garadzega ni gu dzi hita khu silo nya singi,

⁴² narigu gimwegyo basi gi vbwetegago. Mariya hathide gipandre nya gyadi, igyo nya gu gima kha na dzegedwa khu muthu.”