Levhi 9 - Bhibhiliya Nya Guage

Miphaso nya guhegule ya Aroni ni sanana saye

¹ Khu litshigu nya livbandre na mararu, Mosi a di rana Aroni ni sanana saye, gumogo ni madhota ya Israyeli,

² a embela Aroni, khuye: “Dzega gikuzyana u ta ninga ningelo nya phaso nya ditshedzo, ni nvuta nya guta gire ningelo nya phaso nya guvbiswe, sirengo sa sivili, gu vbwetega nyamba hasa, gasi uta si bikela ga Pfhumu Nungungulu.

³ U na embela sanana sa Israyeli, khuwe: Dzegani nyamabhongwe mu gira mhamba nya gu ditshedzwe siwono, ni gikuzyana mwendro nvuta nya mwaga moyo, satshavbo gu vbwetega nyamba hasa, gasi gu gira ningelo nya phaso nya guvbiswe;

⁴ kuzi ni nvuta muta si gira mhamba nya phaso nya pwanano, muta paya mbeli ga Pfhumu Nungungulu, ni ningelo nya wuguvbi nya gusugwe khu mafura, kholu muhuno Pfhumu Nungungulu a nata dzi wonegisa gwanu.”

⁵ Khavbo avbo, avo va di resa satshavbo esi Mosi a nga va leletelago va ta ema naso mbeli nya giluvelo; tshangano watshavbo wu di hidzimela wuta ema mbeli ga Pfhumu Nungungulu.

⁶ Mosi a di ganela, khuye: “Esi khiso Pfhumu a mi leletago gu gira. Girani gasi wudhumo wa Pfhumu Nungungulu wu wonega avbo gwanu.”

⁷ A di embela gambe Aroni, khuye: “Hidzimela vbagiluvelotunu, bikela ningelo wago nya phaso nya ditshedzo ni phaso nya guvbiswe, u gira gambe nayo nya gu dzi agise uwe mune ni gu agisa vathu vago; khu hwane, bikela ningelo nya phaso nya gulivbe nandru wawe gasi gu va handza siwono sawe; kha nga edzi Pfhumu Nungungulu a leletedego khidzo.”

⁸ Aroni a di hidzimela vbagiluvelotunu a ya paya gikuzyana gasi gu handza gighoho gyaye.

⁹ Sanana saye si di mu resela novba, a gu nega umo nyala a mitegedzela dzikeho nya giluvelo; wumbe novba watshavbo a wu vbaladza tshinani nya giluvelo.

¹⁰ Khu hwane, a di vbisa mafura vbatshani nya giluvelo, dzitshwa ni libindri nya girengo nya phaso nya ditshedzo, kha nga edzi Pfhumu Nungungulu a leletedego khidzo Mosi.

¹¹ Aholu a diya vbisa nyama yakone ni lidowo vbavbandze nya lizumbo.

¹² Khu gulandrela, Aroni a di paya girengo nya phaso nya guvbiswe; sanana saye si di mu resela novba, uye a gu wu mitegedzela wubambe nya giluvelo.

¹³ Va di mu resela gambe girengo nya phaso nya guvbiswe, gipandre khu gipandre gumogo ni hungo; uye a di vbisa satshavbo vbatshani nya giluvelo.

¹⁴ A di handza mahembe ni dzizondzo a si vbisa gumogo ni phaso nya guvbiswe vbatshani nya giluvelo.

¹⁵ Khu gulandrela, a di bikela ningelo wa vathu vatshavbo; a di dzega nyamabhongwe wu nga bikedwago khu vathu kha nga phaso nya ditshedzo, a wu paya, a ningela gasi gu handza sighoho kha nga idzo a nga girago girengo nya guhegule.

¹⁶ A di ningela gambe phaso nya guvbiswe, kha nga edzi gu vegidwego khu nayo.

¹⁷ Ga isoso satshavbo, a di pata ningelo nya wuguvbi, a baga gyandza a vbisa vbatshani nya giluvelo, a engedzela avbo nya phaso nya guvbiswe wa vbadzimindrutunu.

¹⁸ Khu hwane, Aroni a di paya kuzi ni nvuta nya phaso nya pwanano wu ningedwago khu vathu. Sanana saye si di mu ninga novba, a gu mitegedzela wubambe gwatshavbo nya giluvelo.

¹⁹ Khavbo avbo, mafura nya kuzi ni nvuta, ngila, mafura ma fumbelago dzitshwa ni libindri;

²⁰ mafura yatshavbo va di ma handzega vbadzikhanatunu nya sirengo, Aroni a di si vbisa vbatshani nya giluvelo.

²¹ Gasi khana ni litundru la nyamudye, Aroni a di si ndziwitela, a gira nayo nya bikelo mbeli ga Pfhumu Nungungulu, kha nga idzo a nga leletelago khidzo Mosi.

²² Khu hwane, Aroni a di khusedza mandza ga vathu a va kategisa, a tshiga khu vbagiluvelotunu, hwane nya gu bani a ningede phaso nya ditshedzo, phaso nya guvbiswe ni phaso nya pwanano.

²³ Khavbo avbo, Mosi ni Aroni va di bela Tshatshani nya Tshangano, gikhati va nga dugago va di kategisa vathu; wudhumo wa Pfhumu Nungungulu wu di wonega ga vathu vatshavbo.

²⁴ Gu di duga nilo khu mbeli ga Pfhumu Nungungulu wu ngata tsagamisa nyama nya phaso nya guvbiswe ni mafura vbatshani nya giluvelo. Avbo va nga wona, vathu vatshavbo va di kulungela khu gunengela va noga va kuha vbavbatshi khu khovbe.