Levhi 8 - Bhibhiliya Nya Guage

II. NAYO NYA GUWUMBELE VAPHASI NYA MHAMBA Guwumbedwa wuphasi nya mhamba ga Aroni ni sanana saye

¹ Pfhumu Nungungulu a di embela gambe Mosi, khuye:

² “Dzega Aroni ni sanana saye, u dzega gambe ni dzingandzu, mafura nya gutodze, kuzi nya phaso nya ditshedzo, ni dzihamba dzimbili ni gitundru nya sibaba nyambana mela.

³ Ramba tshangano watshavbo wu tombana nyangwatunu nya Tshatsha nya Tshangano.”

⁴ Mosi a di gira iso a nga rumwago khu Pfhumu Nungungulu: A di ramba tshangano watshavbo nyangwatunu nya Tshatsha nya Tshangano.

⁵ Khavbo avbo, a di ganela ga vathu, khuye: “Esi khiso Pfhumu Nungungulu a nyi rumidego gukhuye nyi si gire.”

⁶ Khu gulandrela a di ranisa Aroni ni sanana saye va hidzimela, a va handza khu mati.

⁷ A ambagisa Aroni ngandzu nya wuphasi nya mhamba, a mu hunga keka, a mu fenengedza gifenengelo; a mu ambagisa Efodhe a yi tiyisa khu ngodzi yakone.

⁸ A di mu ambagisa gikhweso gya vbakhanatunu, a vegedzela gwadi, “Urimi” ni “Tumimi.”

⁹ A di mu ambagisa ni gihugu hungoni, giwombotunu nya gihugu, a di vega genge nya ndralama, a gu gitambo nya guage kha nga idzo Pfhumu Nungungulu a nga leletelago khidzo Mosi.

¹⁰ Khavbo avbo, khu gulandrela, Mosi a di dzega mafura a todza Tshatsha nya Guage ni satshavbo si guromo umo, a wu agisa.

¹¹ A di mitegedzela khayo livbandre na dzimbili dzinyondro vbagiluvelotunu a gi kategisa gumogo ni sombo saye satshavbo, mbiya ni girandro gyaye, a si agisa.

¹² Khu hwane a di guhula mafura nya gutodze hungoni ga Aroni, a mu agisa.

¹³ Mosi a di rana sanana sa Aroni si hidzimela, a si ambagisa dzingandzu ni mikeka, a si ambagisa sihugu kha nga idzo Pfhumu Nungungulu a mu leletedego khidzo.

¹⁴ Khu gulandrela a di ruma gu hidzimisa kuzi nya phaso nya ditshedzo, Aroni ni sanana saye, va di handzega mandza hungoni nya kuzi.

¹⁵ Mosi a di paya kuzi a hakhedzela novba wakone, na negide nyala yaye novbani, a di todza dzikeho nya giluvelo khu maphuvbo yatshavbo a gi agisa; khu hwane a di guhula novba watshavbo tshinani nya giluvelo a gi agisa gasi gu ningela avbo phaso nya gulivbe nandru nya gighoho.

¹⁶ A di dzega mafura yatshavbo nya mahembe, ni libindri ni dzitshwa ni mafura yakone, a vbisa satshavbo vbatshani nya giluvelo.

¹⁷ Aholu kuzi, ni lidowo, ni nyama ni swanyi wakone a diya si vbisa vbavbandze nya lizumbo kha nga idzo Pfhumu Nungungulu a leletedego khidzo Mosi.

¹⁸ A di ruma va hidzimisa nvuta nya miphaso nya guvbiswe, Aroni ni sanana saye va di yi handzega mandza hungoni.

¹⁹ Mosi a di paya nvuta a guhula novba dzibambe nya giluvelo.

²⁰ A di kabanisa niyo nvuta khu sipandre si vbwetegago, a vbisa hungo ni sipandre satshavbo gumogo ni mafura.

²¹ Aholu a di handza matini mahembe ni dzizondzo dzakone; a gu vbisa nvuta yatshavbo vbatshani nya giluvelo. Eyi i mhamba nya guvbiswe nya mahema ma salalegisago Pfhumu Nungungulu; kha nga idzo Pfhumu Nungungulu a leletedego khidzo Mosi.

²² Khu gulandrela a di ruma gukhuye va hidzimisa nvuta nya wuvili, a gu nvuta nya phaso nya guwumbele vaphasi nya mhamba. Aroni ni sanana saye va di yi handzega mandza hungoni.

²³ Mosi a di paya nvuta a baga novba wudugwana a todza Aroni mahegiso nya ndzeve yaye ya nyamudye, ni nyalani nya nyaghonwe nya mandza ya nyamudye, ni nyalani nya nyaghonwe nya ngondro wa nyamudye.

²⁴ Khavbo avbo, a di ranisa sanana sa Aroni si hidzimela, a ta si todza khu novba mahegiso nya ndzeve ya nyamudye ni nyalani nya yikhongolo nya mandza ya nyamudye ni nyalani nya nyaghonwe nya ngondro wa nyamudye nya moyo ni moyo nya avo. Owu wumbe novba a di wu guhula dzibambe nya giluvelo.

²⁵ A di dzega mafura ni ngila, ni mafura yatshavbo nya mahembe ni libindri ni dzitshwa dza dzimbili ni mafura yakone, ni litundru la nyamudye.

²⁶ A di dzega gibaba gimwegyo nyambana mela, ni gibaba nya gusugwe khu mafura, ni fiyoso gitundruni nya sibaba nyambana mela gi guromo mbeli ga Pfhumu Nungungulu, a pata satshavbo ni mafura ni litundru la nyamudye.

²⁷ A di vega satshavbo mandzani ga Aroni ni sanana saye, va si ndziwitela satshavbo mbeli ga Pfhumu Nungungulu, kha nga nayo nya bikelo.

²⁸ Khavbo avbo, Mosi a di dzega satshavbo mandzani gwawe, a gu si vbisa vbatshani nya giluvelo nya miphaso nya guvbiswe. A gira mhamba nya miphaso nya guwumbele vaphasi, nya mahema nya gusalalalegise wu vbisedwago Pfhumu Nungungulu.

²⁹ Mosi a di dzega khana nya nvuta a yi ndziwitela mbeli ga Pfhumu Nungungulu, a gira nayo nya gubikele. Gipandre gegi nya nvuta nya phaso nya guwumbele yi di lumba Mosi, kha nga idzo Pfhumu Nungungulu a mu leletedego khidzo.

³⁰ Khavbo avbo, Mosi a di dzega gambe mafura nya gutodze ni novba wu nga bani wuri vbatshani nya giluvelo a gu mitegedzela khiso Aroni ni dzingandzu dzaye, a mitegedzela gambe sanana saye ni dzingandzu dzawe; a di agisa Aroni, ni dzingandzu dzaye, a agisa sanana saye gumogo ni dzingandzu dzawe.

³¹ Mosi a di va embela, khuye: “Indrani mu ya phula nyama nyangwatunu nya Tshatsha nya Tshangano; mu na yi hodzela kamwe iyoyo gumogo ni sibaba si guromo gitundruni nya miningelo nya guwumbele, kha nga idzo nyi rumidego khidzo, avbo nyi nga kheni: Aroni ni sanana saye khavo va yelago gu hodza nyama yeyi.”

³² Aholu esi si tshalago nya nyama ni sibaba si vbiseni niloni.

³³ Mu na vbedzani livbandre na mavili matshigu nyamba khuga nyangwatunu nya Tshatsha nya Tshangano, kala mu gu tshanganisa matshigu nya guwumbedwe gwanu, gu dzegago livbandre na mavili matshigu; kholu Pfhumu a na vbedza livbandre na mavili matshigu na gu mi agisa.

³⁴ Esi hi giridego muhuno, khesi Pfhumu Nungungulu a rumidego gukhuye hi gire gasi gu landrisa thumo nya guagiswe gwanu.

³⁵ “Khu guralo, mu na khalani livbandre na mavili matshigu nyangwani nya Tshatsha nya Tshangano, wutshigu ni mihani, mu landrisa kharato sileletelo sa Pfhumu Nungungulu, gasi mu sifi; kholu khidzo nyi nga leletedwago khidzo.”

³⁶ Aroni ni sanana saye va di gira satshavbo esi Pfhumu Nungungulu a nga rumago khu magana ya Mosi.