Levhi 27 - Bhibhiliya Nya Guage

Milayo yi gimbilelanago ni sisambanyo ga Pfhumu Nungungulu

¹ Pfhumu Nungungulu a di engedza a embela Mosi, khuye:

² “Ganela ga sanana sa Israyeli u si embela, khuwe: Muthu a gu gira gisambanyo ga Pfhumu Nungungulu khu gyuma gi enelago tengo nya muthu;

³ Gitumbiso gyogyo, a gu bani nari gya muthu a enedzidego magumavili myaga guya mbeli kala livbandre na limwedo magumi myaga, a na dusa pimo nya livbandre magumi dzisekeli nya parata, mayelano ni sekeli ya wulangani nya guage.

⁴ Aholu, a gu bani ari nyamayi, pimo waye wu na bani wuri magumararu dzisekeli.

⁵ Aholu tanga yaye ya gu bani yiri ya livbandre kala magumavili myaga, nari mwama, pimo waye wu na bani wuri magumavili dzisekeli, a gu bani ari nyamayi, likhumi dzisekeli.

⁶ Aholu tanga yaye ya gu bani yiri ya ngima kala livbandre myaga, nari mwama yi na bani yiri livbandre dzisekeli nya parata, a gu bani ari nyamayi dzisekeli dzitharu nya parata.

⁷ Gukhugela livbandre na limwedo magumi myaga guya mbeli, a gu bani nari mwama, pimo waye wu na bani nari wa likhumi na livbandre dzisekeli, a gu bani ari nyamayi, likhumi dzisekeli.

⁸ Aholu, a gu bani nari gisiwana ngudzu a si dzi kodzi gu livba tengo wu emisidwego, a na dzi bikela ga muphasi nya mhamba, afela gu mu vegela tengo gukhedza khu gumanela gwaye.

⁹ Muthu a gu bani giride gisambanyo nya guningele khu gifuyo ga Pfhumu Nungungulu, satshavbo a na gu ningelago ga Pfhumu Nungungulu si na bani si agide.

¹⁰ Kha gu kodzegi gu vbindrugedza mwendro gu tshikedza egi nya gyadi khu igyo nyamba gyadi, mwendro egi nyamba gyadi khegi nya gyadi; aholu wa gu dzi kodza gu vbindrugedza gifuyo khu gifuyo, satshavbo si na bani na si agide.

¹¹ A gu bani nari gifuyo nya gunyenyeze nya esi si si yeligo gu ningedwa ga Pfhumu Nungungulu, gu na ningedwa gifuyo gegi ga muphasi nya mhamba.

¹² Muphasi nya mhamba a na vega tengo gukhedza khu wuwadi ni gumba wadi nya igyo; gukhedza khu tengo muphasi nya mhamba a na wu wonago gupimisani gwaye.

¹³ Aholu khu mambe magirelo mune nya gifuyo a gu vbweta gu dzi tshudzisa, a na engedzela gipandre nya livbandre nya tengo waye.

¹⁴ Muthu a gu ningela ndranga yaye gasi gu agisedwa Pfhumu Nungungulu, muphasi nya mhamba a na pima tengo nya makhalelo nya nyumba yaye, mwendro khyadi mwendro khandri yadi.

¹⁵ Aholu, wule a yi ningedego gu yi agisa, a gu vbweta gu dzegisa nyumba yaye, a na engedzela gipandre nya livbandre nya tengo wu vegidwego, iyo yi na mu lumba.

¹⁶ Muthu a gu ningela gipandre nya lithembwe laye, a gu thomba yaye gasi gu agisela Pfhumu Nungungulu, tengo nya gu yi dzegisa khuwo wu fanede gu khedza khu mbewu yi yadwago thembweni momo: Ghomeri mweyo nya mala yi na pimwa tengo nya livbandre magumi dzisekeli nya parata.

¹⁷ Aholu a gu ningela lithembwe laye ndrani nya Mwaga nya Gunengele, tengo wakone wu na vegwa gukhedza khu edzi li na wonwago khidzo.

¹⁸ Aholu a gu ningela lithembwe laye hwane nya Mwaga nya Gunengele, muphasi nya mhamba a na vega tengo gukhedza khu myaga yi tshadego gu vboha Mwaga nya Gunengele, a na vbungula tengo wu vegidwego.

¹⁹ Aholu wule a ningedego lithembwe laye, a gu tshukha a vbweta gu li dzegisa, avbovbo a na engedzela gipandre nya livbandre nya gyuma, ilo li na khala laye.

²⁰ Aholu a gumba dzina gu li dzegisa, mwendro gu li rengisa ga mumbe muthu, gima kha na li dzegisa gambe.

²¹ Aholu lithembwe leli la gu tshulega khu Mwaga nya Gunengele, wule a nga renga lithembwe leli a na duga umomo, kholu lithembwe leli li agide li phasedwe Pfhumu Nungungulu; li na lumba muphasi nya mhamba.

²² Muthu a gu ningela ga Pfhumu Nungungulu lithembwe a nga rengago, nasiri gipandre nya thomba yaye,

²³ muphasi nya mhamba a na saya tengo wu vegidwego kala Mwagani nya Gunengele; khu litshigu lolo la limwedo, wu na livbwa tengo yoyo kha nga gilo gi phasedwego Pfhumu Nungungulu.

²⁴ Khu Mwaga nya Gunengele, lithembwe li na bwelela ga wule a li rengisidego, wule a nga bani nari mune, kholu lithembwe thomba yaye.

²⁵ Tengo watshavbo wu na vegwa gukhedza khu sekeli ya vbawulangani nya guage; sekeli mweyo yi na ni magumavili dzigera.

²⁶ Aholu matiwula nya gifuyo, kha nga gi lumbago Pfhumu Nungungulu, mwalo a yelago gu gi ningela; ambari nari mombe mwendro nvuta, sa gu lumba Pfhumu Nungungulu.

²⁷ Aholu a gu bani nari gifuyo nya gunyenyeze, gi na dzegiswa, gukhedza khu tengo waye vbatshani gwaye a na engedzela gipandre nya livbandre; gya gu bani gya sa dzegiswa, gi na rengiswa, gukhedza khu tengo wa igyo.

Gumwalo gudzegiswa ga silo si agidego

²⁸ Khu guralo, ni gimwegyo nya esi si ningedwego gu phasedwa Pfhumu Nungungulu, ga satshavbo si guromo nya muthu mwendro gifuyo, mwendro lithembwe nya thomba yaye, kha si kodzegi gu rengiswa, ambari gu dzegiswa; khu kharati silo satshavbo nya guage si na bani si agide ngudzu mbeli ga Pfhumu Nungungulu.

²⁹ Mwalo vbakari nya vathu uye a phasedwego Pfhumu Nungungulu a dzi kodzago gu dzi dzegisa; vbavbandze nya gusongwe basi.

Desima

³⁰ Satshavbo a gu sa gipandre nya likhumi nya mihandro nya mafu, nya dzimbewu dza thembweni ambari mihandro nya misimbo, sa gu lumba Pfhumu Nungungulu; si agide, si phasedwe Pfhumu Nungungulu.

³¹ Aholu, muthu a gu vbweta gu dzegisa silo saye nya gipandre nya likhumi, a na engedzela gipandre nya livbandre vbatshani nya iso.

³² Aholu ga satshavbo esi nya gipandre nya likhumi nya sifuyo nya sikhongolo nesi nya sidugwana, ni satshavbo esi si ningedwago khu ndronga ya muhavisi, gipandre nya likhumi gi na phasedwa Pfhumu Nungungulu.

³³ Kha gu na vbweta gu tidwa igyo nya gyadi nigyo nyamba gyadi, ambari gu vbindrugedza; aholu, mwa gu vbindrugedzani, gimwegyo khu gimbe, khu magirelo yoyo, sa sivili si na bani si agide; kha si dzi kodzi gu dzegiswa.”

³⁴ Khiso esi sileletelo pfhumu Nungungulu a leletedego Mosi, ga sanana sa Israyeli, gigomoni ga Sinayi.