Levhi 25 - Bhibhiliya Nya Guage

Mwaga nya Sabhadho

¹ Pfhumu Nungungulu a di ganela gambe ga Mosi gigomoni ga Sinayi, khuye:

² “Ganela ga sanana sa Israyeli u si embela, khuwe: Avbo mu na belago tigoni nyi na mi ningago, mu na vegisa Sabhadho, mu ningani mafu gikhati nya guhefemule khu lina la Pfhumu Nungungulu.

³ Mu na lima mu yala marembwe yanu gipimo nya livbandre na moyo myaga, ndrani nya livbandre na moyo myaga mu na avbulela miuvha mu havela mihandro yakone.

⁴ Aholu khu mwaga nya livbandre na mivili, mafu ma na ningwa gikhati nya guhefemule, Sabhadho nya gurungudze lina la Pfhumu Nungungulu. Khu na nga yala lithembwe lago, gambe khu na nga avbulela miuvha yago.

⁵ U nga vbweri dzimbewu nya esi si na bugago sabune nya mbewu yi nga thegago guvbwerani ga vbanyamwage, gambe u nga haveli dziuvha nya miuvha yi ngamba avbuledwa. Wu na bani wuri Mwaga nya Sabhadho, nya guhefemule mafu.

⁶ Aholu mihandro yi na velegwago mwagani nya Sabhadho nya guhefemule mafu, mu na hodzani, uwe gumogo ni sithumi sago nya vama ni vanyamayi, ni vathumegeli ni muwuyi u vbanyago naye.

⁷ Ni sithumi sago, ambari ni sirengo nya likhabi sa tigoni gwago, satshavbo si na hodza niso mihandro yoyo.

Mwaga nya gunengele

⁸ U na saya livbandre na dzimbili dzisemana nya myaga, khu gu khethu, livbandre na sivili sighava nya livbandre na mivili myaga, livbandre na mivili myaga yi wuyedzedwa livbandre na guvili; u tshanganisa kharati gipimo nya magumana na livbandre na mina myaga.

⁹ Hwane nya ugo, u na ruma gu wombwa pundru khu tshivba ni tshivba, khu litshigu nya likhumi nya ngima nya livbandre na mivili. Litshigu nya tsetselelo nya wukhongolo, mu na ruma gu wombwa pundru tigoni gwanu gwatshavbo.

¹⁰ Mu na agisa mwaga nya livbandre magumi, mu tivisa tigoni gwanu gwatshavbo gutshulega ga vathu vatshavbo va vbanyago umo. Mwaga yoyu, gu na bani guri gunengela nya gukhongolo vbakari gwanu; muthu ni muthu a na bwelela petoni gwaye, gambe muthu ni muthu a na wuya ga valongo vaye.

¹¹ Mwaga nya livbandre magumi, mwaga nya gunengele kha mu na lima mu yala, kha mu na vbwera esi si nga bugago sabune thembweni; kha mu na havela dziuvha nya guvelegwe khu miuvha mi ngamba avbuledwa.

¹² Kha nga a gu gunengela nya gukhongolo, mwaga yoyo fanede nari gilo gi agidego vbakari gwanu, mu na hodzani mihandro ya thembweni.

¹³ Mwagani momo nya gunengele nya gukhongolo, moyo ni moyo nya enu a na hakha nyaluphye gipeto gyaye.

¹⁴ Wa gu rengisela gilo muthu kwanu, mwendro gu renga, mu nga kalavelani khu gyanu.

¹⁵ U na renga gilo gyogyo ga muthu kwanu, u wona myaga yi vbindridego hwane nya mwaga nya gunengele, uye a na rengisa na gu wona myaga nya guvbwere.

¹⁶ Myaga ya gu bani yiri yingi, u na livba tengo nya wungi; ya gu bani yiri yidugwana u na livba tengo nya wudugwane ga esi u rengago, kholu a gu gu rengisela tengo nya dzinango nya guvbwere.

¹⁷ “Mu nga tshanisini muakelane wanu, muthu ni muthu a na thave Nungungulu waye, kholu Eni kheni Pfhumu Nungungulu wanu.”

Situmbiso nya Mwaga nya Sabhadho

¹⁸ Sayisani milayo yangu, vegisani sileletelo sangu; si landriseni guvbanyani gwanu, gasi mu vbanye nyamba thava gilo tigoni.

¹⁹ Mafu ma na ninga mihandro yaye, mu na hodza mu khura; gambe mu na vbanyani na mu tiyide tigoni nyamba thava gilo.

²⁰ Mwa gu ganela, khenu: Hi na hodza ginani mwagani nya livbandre na mivili, olu hi na gumba yala mwendro guvbwera mihandro?

²¹ Eni nyi na mi ninga gikategiso gyangu khu mwaga nya livbandre na moyo, gasi gu ninga mihandro nya guningane myaga miraru;

²² avbo mu na gu yalago khu mwaga nya livbandre na miraru, mu na hodzani esi mu nga vbwera vbanyamwage, kala mwaga nya livbandre na mina. Kala mu gu vbwera dzimbewu, mu na vbanyani khu vbwero wa vbanyamwage.

Gudzegisa sipeto ni dzikhumbi

²³ Sipeto si nga rengisedwi muphelo, kholu mafu ma gu lumba Eni, enu muvawuyi ni vapfhumba vangu.

²⁴ Khu guralo, litigo latshavbo mu na gu li fumelago, mu na ningelani fanelo nya dzegiso nya sipeto satshavbo.

²⁵ Ndriyago a gu mana sigaradzo a gu rengisa gipandre nya gipeto gyaye, nongo waye nya lisine, a ngu yela guya dzegisa gipandre gi nga rengiswago khu ndriyaye.

²⁶ Muthu a gu mwalo nongo nya gu mu dzegisele gipeto gyaye, a gu kala a mana tengo nya guenele gu gi dzegisa khuwo,

²⁷ a na saya myaga a rengisidego khiyo, a gu livba tengo wu tshadego ga wule a nga mu rengela, khu magirelo yoyo, gipeto gi na wuya gambe mandzani gwaye.

²⁸ Aholu a gu hamuga maningano nya gu ye dzegisa egi a nga rengisago, gi na simama giri mandzani ga murengi, kala ga Mwaga nya Gunengele, khu mwaga yoyo gi na tshulega gi wuya gambe mandzani ga mune waye.

²⁹ Muthu a gu rengisa nyumba yi guromo dhoropani gu bhiyidwego, a na ni fanelo nya gu yi dzegisa kala guvbelani nya mwaga a nga rengisago khuwo. Fanelo yaye nya gu yi dzegise, yi na ni mwaga moyo basi.

³⁰ Nyumba yi guromo dhoropani gu bhiyidwego, ya gumba dzegiswa ndrani nya mwaga rumba, yi na lumba murengi ni ngamo yaye kala gupindruga; khu Mwaga nya Gunengele kha yi na tshulega khu mandzani gwaye.

³¹ Aholu dzinyumba dzi guromo vbavbandze nya madhoropa nya gubhiywe dzi na girwa idzosaye ni sipeto sa tigoni; dzi ngu dzi kodza gu dzegiswa mandzani ga murengi, gambe dzi na tshulega khu Mwaga nya Gunengele.

³² Gasi dzinyumba dza Valevhi, ni dzinyumba dzi guromo madhoropani ma lumbago avo, Valevhi va na ni fanelo nya gu dzi dzegise ni gevbini gikhati.

³³ Mulevhi a gumba dzegisa nyumba yaye a rengisidego yi guromo dhoropani yi mu lumbago, nyumba yoyo, yi na tshulega khu mandzani ga murengi khu Mwaga nya Gunengele, kholu dzinyumba dzi guromo madhoropani ga Valevhi gyuma gyawe vbakari ga sanana sa na Israyeli;

³⁴ gasi gipeto gi guromo vbafuvbi ni madhoropa yawe, gi nga rengiswi; kholu gyuma gi va lumbago kala gupindruga.

Milayo nya guvhikele sisiwana

³⁵ Ndriyago a gu khala gisiwana, a vbeledwa khu tshivba, u na mu phasedzela kha nga muwuyi, mwendro muthu nya gute khala petoni gwago, mu dzumedzise guvbanya vbafuvbi gwago.

³⁶ U nga hakhi bhindzu avbo gwaye, mwendro gu vbweta gu wuyedwa khu gilo khavbo gwaye, aholu thava Nungungulu wago, u diga ndriyago a vbanya nago.

³⁷ U nga lombisi dzitsapawu khu gu vbweta bhindzu, gambe u nga mu ningi guhodza khu gu zama gu wuyedwa khu gilo.

³⁸ Eni kheni Pfhumu Nungungulu wanu nyi nga mi dusago khu tigoni ga Egipito, gasi guta mi ningani litigo la Khanani, nyi fela gu khala Nungungulu wanu.

Milayo nya guvhikele dzikhumbi

³⁹ Ndriyago u vbanyago naye a gu khala gisiwana, a gu dzi rengisa gwago, u nga mu thumisi kha nga khumbi;

⁴⁰ mu phare kha nga githumi mwendro muluveli. A na gu thumela kala mwaga nya gunengele.

⁴¹ Khavbo avbo, a na tshulega a khuga a hongola uye ni sanana saye, a bwelela ga valongo vaye aya khala nyaluphye gipetoni gya vavelegi vaye.

⁴² Kholu sithumi sangu nyi nga si dusago khu tigoni ga Egipito, kha va yeli gu rengiswa kha nga dzikhumbi.

⁴³ U nga va khozisi khu dzihanyi, aholu thava Nungungulu wago.

⁴⁴ Gasi khumbi nya mwama mwendro nya nyamayi u na yi rengago, gu vbwetega nya valombo, nya gute khu mayigoni ya vbavbandze; mu ngu dzi kodza gu renga dzikhumbi nya vama ni vanyamayi.

⁴⁵ Mu ngu dzi kodzani gambe gu renga dzikhumbi vbakari nya sanana nya vawuyi va vbanyago nanu, dzindranga dzawe dzi guromo vbafuvbi gwanu, ni sanana sawe si velegidwego tigoni gwanu, va khala thomba yanu.

⁴⁶ Avovo mu ngu dzi kodzani gu tshiyela sanana sanu kha nga thomba yawe, gikhati gyatshavbo mu ngu dzi kodza gu va thumisani kha nga dzikhumbi. Aholu vandriyanu va na Israyeli, a nga manegi ni moyo nya gu va fumele khu dzihanyi.

⁴⁷ Muwuyi mwendro muluveli a vbahidego tigoni gwanu, a gu ghanya, a gu manega ndriyago nya gisiwana aya dzi rengisa ga muluveli, mwendro ga muwuyi u vbanyago naye, mwendro ga moyo nya nongo wa muluveli yoyu a khala khumbi,

⁴⁸ hwane nya gu bani a dzi rengiside, a na ni fanelo nya gu dzegiswe; moyo nya vandriyaye a ngu dzi kodza gu mu dzegisa.

⁴⁹ Babedugwane waye, ambari gyanana gya babedugwane waye, mwendro moyo nya nongo nya linyumba lawe, a ngu dzi kodza gu mu dzegisa; a gu bani ari ni maningano a ngu dzi kodza gu dzi dzegisa abune.

⁵⁰ Khu kharato a na pwanana ni oyu a nga rengwago khuye va wona gipimo nya matshigu gukhugela mwaga a nga dzi rengisago khuwo kala Mwaga nya Gunengele, tengo nya gurengwe gwaye, wu na pimwa khu gikhati nya mwaga gukhedza khu tengo nya guhakhwe kha nga githumi.

⁵¹ Gwa gu bani gu nga tshade myaga nya yingi, a na dusa tengo wu ninganago myaga yoyo, nya dzitsapawu nya tengo a rengidwego khuwo, tengo nya gu dzi dzegise gwaye.

⁵² Ma gu bani ma tshade madugwana gu vbohisa Mwaga nya Gunengele, a na pwanana naye a livba myaga yi tshadego, gasi gu livba gu dzi dzegisa gwaye.

⁵³ Ndrani nya myaga a na gu bani nari ndrangani gwaye, fanede gu mu wona kha nga githumi nya guhakhiswe; nasi gu mu gira kha nga khumbi.

⁵⁴ A gumba tshudziswa, khu magirelo yaya, a na tshulega khu Mwaga nya Gunengele, uye gumogo ni sanana saye.

⁵⁵ “Kholu va na Israyeli va gu lumba Eni basi, sithumi sangu nyi si dusidego khu tigoni ga Egipito. Eni kheni Pfhumu Nungungulu wanu.”