Levhi 23 - Bhibhiliya Nya Guage

MIBUZO NYA YIKHONGOLO NYA WUKHODWA Sabhadho

¹ Pfhumu Nungungulu a di ganela ga Mosi a mu embela, khuye:

² “Ganela ga sanana sa Israyeli u si embela, khuwe: Mibuzo ya Pfhumu Nungungulu eyi mu yelago gu ramba tshangano nya guage, kheyi:

³ Mu na thuma livbandre na limwedo matshigu, aholu eli nya livbandre na mavili, litshigu nya Sabhadho nya guhefemule, nya tshangano nya guage. Mu nga thumi thumo khu litshigu lolo. Litshigu nya Sabhadho nya gurungudze Pfhumu Nungungulu, malangani gwatshavbo mu vbanyago umo.

Phasika

⁴ Eyi khu mibuzo ya Pfhumu Nungungulu, mitshangano nya guage mu na gu yi rambago khu gikhati gyakone.

⁵ Khu litshigu nya likhumi na mana nya ngima nya guhegule, kala gupfolani nya lidambo, Phasika ya Pfhumu Nungungulu.

⁶ Khu litshigu nya likhumi na livbandre nya ngima wa wumowo, mu na phela Buzo nya Sibaba nyambana Mela mu rungudza Pfhumu Nungungulu; gipimo nya livbandre na mavili matshigu na mu gu hodza sibaba nyamba thedwa mela.

⁷ Khu litshigu nya guhegule, mu na gira tshangano nya guage, mu nga thumi thumo nya gulemele.

⁸ Aholu, umo nya livbandre na mavili matshigu yoyo, mu na ningela phaso nya guvbiswe ga Pfhumu Nungungulu. Khu litshigu nya livbandre na mavili mu na gira tshangano nya guage, mu nga thumi thumo nya gulemele.

Buzo nya gulume mihandro nya guhegule

⁹ Pfhumu Nungungulu a di embela kharati Mosi, khuye:

¹⁰ “Ganela ga sanana sa Israyeli u si embela, khuwe: Avbo mu na belago tigoni nyi mi ningago, gikhati mu vbwerago dzimbewu dzanu, edzi nya guphele, mu na dzega gitundru mu yisa ga muphasi nya mhamba;

¹¹ uye a na gira nayo nya bikelo a yi ndziwitela mbeli ga Pfhumu Nungungulu, gasi mu hakhwe gwadi; bikelo yoyu wu na girwa khu litshigu li landrelago eli nya Sabhadho.

¹² Litshigo la limwedo Muphasi nya mhamba a na ndziwitelago gitundru, mu na bikela ginvutana nyamba hasa, nya mwaga moyo, mu gira phaso nya guvbiswe ga Pfhumu Nungungulu;

¹³ gumogo ni ningelo nya sipandre sivili nya likhumi nya efa nya wuguvbi nya gudadatwe wu sugidwego khu mafura, gasi gu khala ningelo nya guvbiswe nya gunungele gwadi wu salalegisago Pfhumu Nungungulu; ningelo nya wadwa nya gupime gipandre nya hini nya vbinyu.

¹⁴ Mu nga hodzi sibaba mwendro sivbila nya guvawudwe, mwendro esi si si gu vidzwigo, kala gu vboha litshigu lolo mu na gu vbelegedzago khilo miningelo ga Nungungulu wanu; oyu nayo nya gupindruge ga situgulwana sanu ni wevbini wulanga mu na vbanyago umo.”

Buzo nya Pentekosta

¹⁵ “Hwane nya ugo, mu na saya livbandre na dzimbili dzisemana nya gutale, gukhugela litshigu li handzamedzago Sabhadho yile mu resago khiyo gitundru nya mihandro nya gundziwitedwe; mu vbedza livbandre dzimbili dzisemana mu gu gira isoso.

¹⁶ Mu na saya livbandre magumi matshigu kala gu vboha litshigu li handzamedzago Sabhadho nya livbandre na dzimbili, mu ningela gambe ga Pfhumu Nungungulu yimbe miningelo nya dzimbewu nya dziphya.

¹⁷ Mu na resani khumo mu vbanyago umo, sibaba sivili nya gugirwe khu sipimo sivili nya gipandre nya efa nya wuguvbi nya gudadatwe, nya guphudwe ni mela, muta gira nayo nya bikelo khu ningelo nya gundziwitedwe; khiyo eyi mihandro nya guphele yi lumbago Pfhumu Nungungulu.

¹⁸ Mu na ningela sibaba, mu pata gumogo ni livbandre na sivili sinvutana nya mwaga moyo, nyamba solega mwendro guhasa, ni gimombyana ni dzihamba dzimbili nya phaso nya guvbiswe, gumogo ni miningelo nya guhodza ni mawadwa yakone; mu gira phaso nya guvbiswe nya gunungele gwadi wu salalegisago Pfhumu Nungungulu.

¹⁹ Mu na ningela mabhongwe nya phaso nya guhandze sighoho, ni sinvutana sivili nya mwaga moyo, mu gira ningelo nya pwanano.

²⁰ Muphasi nya mhamba a na si ndziwitela gumogo ni sibaba nya dzimbewu nya guphele mbeli ga Pfhumu Nungungulu, khu ningelo nya gu ndziwitele, a gira gambe kharato khu sinvutana sa sivili si phasedwa Pfhumu Nungungulu, si lumba muphasi nya mhamba.

²¹ Litshigu lolo furi, mu na ramba tshangano nya guage, kha mu na thuma thumo nya gulemele, oyu khu nayo wu vegedwago situgulwana sanu satshavbo ni evbini mu na gu bani mu vbanya umo.

²² Gikhati mu vbwerago mahangeni gwanu, mu nga vbweri gwatshavbo kala dzitshokhani nya lithembwe, gambe mu nga botedzeli ni esi si thegedego, tshiyelani gisiwana ni muluveli. Eni kheni Pfhumu Nungungulu wanu.”

Buzo nya mwaga muphya

²³ Pfhumu Nungungulu a di embela gambe Mosi, khuye:

²⁴ “Embela sanana sa Israyeli, khuwe: Khu litshigu nya guphele nya ngima nya livbandre na wuvili, a gu litshigu nya guhefemule, mu na womba pundru mu ramba tshangano nya guage, mu ta alakanya ni gu kulungela litshigu lolo.

²⁵ Mu nga thumi thumo nya gulemele, mu na ningelani phaso nya guvbiswe ga Pfhumu Nungungulu.”

Litshigu nya ditshedzo

²⁶ Pfhumu Nungungulu a di embela gambe Mosi, khuye:

²⁷ “Khu litshigu nya likhumi nya ngima wowu nya livbandre na mivili, a gu litshigu nya ditshedzo, mu na ramba tshangano nya guage; mu hala, mu ningela phaso nya guvbiswe mu phasela Pfhumu Nungungulu.”

²⁸ Mu nga thumi thumo nya gulemele litshigu lolo, kholu litshigu nya ditshedzo, gasi gu giredwa nayo nya guagiswe mbeli ga Pfhumu Nungungulu wanu.

²⁹ Kholu muthu watshavbo vbakari gwanu a na gumba hala litshigu lolo, Eni nyi na mu fuvisa vbakari ga va na gyawe.

³⁰ Ni oyu a thumago ni wevbini thumo litshigu lolo, nyi na mu fuvisa vbakari ga va na gyawe.

³¹ Khu guralo, mu nga thumi gilo, oyu nayo nya gupindruge ga situgulwana sanu ni wevbini wulanga mu na vbanyago umo.

³² Li na bani liri litshigu nya Sabhadho nya guhefemule, mu na hala; mu na vegisa Sabhadho nya guhefemule, gukhugela silambo nya litshigu nya livbandre na mana nya ngima, kala silambo nya litshigu li landrelago.

Buzo nya mitshatsha

³³ Pfhumu Nungungulu a di ganela a embela Mosi, khuye:

³⁴ “Ganela kharati ga sanana sa Israyeli, khuwe: Khu litshigu nya likhumi na livbandre nya ngima yoyu nya livbandre na mivili, mu na alakanya buzo nya Mitshatsha, mu rungudza Pfhumu Nungungulu, livbandre na mavili matshigu.

³⁵ Litshigu nya guphele mu na gira tshangano nya guage, mu nga thumi thumo nya gulemele.

³⁶ Litshigu ni litshigu nya ayoyo nya livbandre na mavili, mu na ningelani phaso nya guvbiswe ga Pfhumu Nungungulu: Khu litshigu nya livbandre na mararu, mu na gira tshangano nya guage, mu gira ningelo nya guvbiswe ga Pfhumu Nungungulu. Tshangano nya buzo nya gunengele, mu nga thumi thumo nya gulemele.

Mahungu nya guhegise

³⁷ Eyi khiyo mibuzo nya gurungudze Pfhumu Nungungulu, mu na rambago mitshangano nya guage, mu gira ningelo nya guvbiswe ga Pfhumu Nungungulu; phaso nya guvbiswe, ni ningelo nya guhodze, miphaso ni miningelo nya mawadwa, gukhedza khu milayo nya litshigu ni litshigu;

³⁸ mu na gira esi, vbavbandze nya dzisabhadho dza Pfhumu Nungungulu, nya miningelo yanu ni miphaso yanu yatshavbo nya guningele khu gugola gwanu, mwendro nya gutadzise sisambanyo sanu ga Pfhumu Nungungulu.

³⁹ Aholu khu litshigu nya likhumi na livbandre nya ngima nya livbandre na mivili, hwane nya gu na mu vbedzide gu vbwera dzimbewu dza thembweni, mu na girani buzo wa Pfhumu Nungungulu wu na dzegago livbandre na mavili matshigu; litshigu nya guphele buzo wowo, a na bani ari Sabhadho nya guhefemule, gu na gira gambe kharato litshigu nya livbandre na mararu.

⁴⁰ Litshigu nya guphele, mu na hava mihandro nya yadi, mu koka matamo nya migindru ni aya nya misimbo nya yikhongolo, ni sitsongo; mu vbedza livbandre na mavili matshigu na mu gunengela mbeli ga Pfhumu Nungungulu wanu.

⁴¹ Mu na girani buzo wowu, kha nga buzo nya gurungudze Pfhumu Nungungulu, livbandre na mavili matshigu, mwaga ni mwaga. Wu na bani wuri nayo nya gupindruge ga situgulwana sanu; mu na girani buzo yoyu khu ngima nya livbandre na mivili.

⁴² Mu na khala mitshatshani matshigu yatshavbo yaya nya livbandre na mavili. Vathu vatshavbo va velegedwego tigoni ga Israyeli, va fanede gu khala mitshatshani;

⁴³ gasi situgulwana sanu si dziti gu khiso gikhati nyi dusidego sanana sa Israyeli khu tigoni ga Egipito, nyi va giride va khala mitshatshani. Eni kheni Pfhumu Nungungulu wanu.”

⁴⁴ Khidzo kharati, Mosi a nga tshamuselago khidzo sanana sa Israyeli mibuzo nya gu rungudzwe Pfhumu Nungungulu.