Levhi 22 - Bhibhiliya Nya Guage

Milayo yi ganelago khu miningelo yi ningedwago Pfhumu

¹ Pfhumu Nungungulu a di embela Mosi, khuye:

² “Embela Aroni ni sanana saye va ninga githawo silo si agisidwego, esi sanana sa Israyeli si nyi phaselago, gasi va si nyenyezisi lina langu nya guage. Eni kheni Pfhumu Nungungulu.

³ Va embele gukhuwe gukhugela olu, muthu watshavbo nya lifumbu lanu, nya situgulwana sanu satshavbo, a na tiyelago gu hidzimela ga silo si agidego, esi sanana sa Israyeli si dusago si phasela Pfhumu Nungungulu, na sa aga, muthu yoyo a na fuviswa mahoni gwangu. Eni kheni Pfhumu Nungungulu.

⁴ Gani khu mani vbakari nya sanana sa Aroni, a na bani ari ni madwali nya sokono mwendro gu dugelela wusila khu milini gwaye, a nga hodzi miningelo nya guage kala a agiswa. Khidzosaye gambe ni oyu a kuhago muthu a nyenyezisidwego khu girumbi; ni oyu a nga dugago mbewu nya livelego;

⁵ ni oyu a kuhago ni gevbini girengo nya gukhwirire khu lididi gi dzi kodzago gu mu nyenyezisa, ni oyu a kuhago muthu, a dzi kodzago gu mu nyenyezisa, gani khu manyala nya lifumbu muni.

⁶ Muthu a kuhago satshavbo sesi, a na nyenyeza kala gupfolani nya lidambo, a nga hodzi miningelo nya guage, kala aya hamba mili waye matini.

⁷ Gupfolani nya lidambo a na aga; khavbo a na dzi kodzago gu hodza miningelo nya guage, kholu khugo guhodza gwaye.

⁸ A nga hodzi girengo nya gufe gyabune, mwendro nya gusongwe khu sirengo nya likhabi, gasi a si dzi nyenyezisi khigyo. Eni kheni Pfhumu Nungungulu.

⁹ Va na landrise milayo yangu, gasi va si mani nandru khu silo sesi va dzi vangela lufu khu gu dzi nyenyezisa. Eni kheni Pfhumu Nungungulu, nyi va agisago.

¹⁰ Oyu a si gu wa nyumbani nya wuphasi nya mhamba, a nga hodzi ningelo nya phaso nya guagiswe, ambari pfhumba wa muphasi nya mhamba mwendro githumi gyaye kha va dzumedziswi gu hodza miphaso yi agisidwego.

¹¹ Aholu uye a rengidwego khu dzitsapawu khu muphasi nya mhamba, a ngu dzumedziswa gu hodza, ni vale va velegedwego ndrangani ga muphasi nya mhamba va ngu yela hodza guhodza gwaye.

¹² Nyamahegyane wa muphasi nya mhamba, a gu dzegwa khu mwama a si gu wa lifumbu laye, uye kha dzumedziswi gu hodza silo si agisidwego.

¹³ Aholu nyamahegyane wa muphasi nya mhamba a gu fedwa khu mwama waye, mwendro wule a nga hudwa wugadzi na sa tshiya sanana, a gu wuya a ta khala ndrangani ga babe waye, kha nga matshigu nya wumbiri waye, a na dzumedziswa gu hodza guhodza ga babe waye; aholu muluveli a nga hodzi.

¹⁴ Muthu a gu phazama a hodza guhodza gu agidego khu gumba dziti, fanede gu bweledzela muphasi nya mhamba tengo nya silo sesi a hodzidego, bwelo khavbo a engedzela gipandre nya livbandre vbatshani nya esi.

¹⁵ Vaphasi nya mhamba va nga nyenyezisi miningelo yi agidego nya esi sanana sa Israyeli si duselago Pfhumu Nungungulu,

¹⁶ gasi va si rwali tsayiso nya nandru wawe, khu gu hodza miphaso yi agisidwego kholu, eni kheni Pfhumu Nungungulu nyi va agisago.”

Dzifanelo nya sirengo nya miphaso

¹⁷ Pfhumu Nungungulu a di engedza a embela Mosi, khuye:

¹⁸ “Ganela ga Aroni ni sanana saye, ni ga vatshavbo va na Israyeli, u va embela, khuwe: Muthu watshavbo wa na Israyeli, mwendro muluveli a vbanyago tigoni ga Israyeli, a vbwetago gu bikela ningelo waye gasi gu tadzisa gisambanyo a giridego ga Pfhumu Nungungulu, mwendro ni wevbini ningelo nya gugole gwaye, a gira phaso nya guvbiswe ga Pfhumu Nungungulu;

¹⁹ gasi wu kodza gu hakhwa, gu vbwetega a ningela gifuyo nya matune nyamba hasa, a gi hathidego vbakari nya dzimombe, nya dzinvuta mwendro nya dziphongo.

²⁰ Mu nga ningelini khu gifuyo nya guhase, kholu kha mu na hakhwa khu phaso nya gugire kharato.

²¹ Muthu a gu vbweta gu dusa phaso nya pwanano, nya gutadzise gisambanyo a giridego ga Pfhumu Nungungulu, mwendro kha nga ningelo nya gugole gwaye; gani a gu ningela khu girengo nya gikhongolo, gani khya gidugwana, gasi gi kodza gu hakhwa, gu vbwetega na gi vbelede nyamba solega.

²² U nga ningeli ga Pfhumu Nungungulu gifuyo nya gikhumu, nya guhase, nya guthenwe, nya silondra, nya gighwere; gambe mu nga girini khigyo phaso nya guvbisedwe Pfhumu Nungungulu vbatshani nya giluvelo gyaye.

²³ Mombe mwendro nvuta yi gu ni litundru nya gukhwenyele mwendro nya gulaphe u na yi ningela khu gugola gwago, aholu kha yi na dzumedwa gu gira khiyo phaso nya gutadzise gisambanyo.

²⁴ U nga bikeli ga Pfhumu Nungungulu gifuyo gi thenidwego, khu gu phwatiswa, mwendro khu gu bayiswa, mwendro khu gu pidwa, mu nga girini silo nya nga isoso tigoni gwanu.

²⁵ Mu nga dzumeli gu hakha, ambari khu mandzani ga muluveli, sifuyo nya nga isoso, mu ningela khiso guhodza ga Nungungulu; kha si na hakhwa, kholu si vivbide, si solegide.”

²⁶ Pfhumu Nungungulu a di ganela gambe ga Mosi a mu embela, khuye:

²⁷ “Gwa gu velegwa gimombyana, mwendro ginvutana, mwendro giphongwana gi na khala ni mayi wakone livbandre na mavili matshigu; gukhugela eli nya livbandre na mararu matshigu nya guvelegwe gwaye, wa gu gi ningela ga Pfhumu Nungungulu kha nga phaso nya guvbiswe, gi na hakhwa gwadi.

²⁸ Mu nga songi gifuyo gumogo ni gyanana gyaye litshigu la limwedo; gani mombe, gani nvuta.

²⁹ Mwa gu ningela ga Pfhumu Nungungulu phaso nya gubonge, ningelani khu magirelo ma lulamidego, gasi mu kodza gu hakhwa.

³⁰ Nyama nya miphaso yi fanede gu hodzwa litshigu lolo nya miphaso, mu nga tshiyi gilo kala ga limbe litshigu. Eni kheni Pfhumu Nungungulu.

³¹ Vegisani milayo yangu mu yi landrisa, eni kheni Pfhumu Nungungulu.

³² Mu nga nyenyezisi lina langu nya guage, gasi nyi kodza gu rungudzwa vbakari ga sanana sa Israyeli. Eni kheni Pfhumu Nungungulu nyi mi agisago;

³³ nyi mi dusidego khu tigoni ga Egipito, gasi nyi khale Nungungulu wanu. Eni kheni Pfhumu Nungungulu.”