Levhi 20 - Bhibhiliya Nya Guage

Gutsayiswa ga vale va ghohago

¹ Pfhumu Nungungulu a di embela gambe Mosi, khuye:

² “U na embela gambe sanana sa Israyeli, khuwe: Gani khu wevbi nya livelego la Israyeli, mwendro muluveli a luvelago tigoni ga Israyeli, a na ningelago gyanana gyaye a gira phaso nya mhamba ga Moloki, fanede gu songwa. A na pfarwa khu siwindri khu vathu va tigoni gwawe.

³ Nyi na thendregedza nyi wugela muthu yoyo, nyi mu fuvisa vbakari ga na gyawe, kholu ningede gyanana gyaye gi gira mhamba nya guphasedwe Moloki, a nyenyezisa kharati wulanga wangu nya guage ni gu vivbisa lina langu nya guage.

⁴ Vathu va tigoni gwawe va gu pfhuma maho va si woni muthu yoyo, avbo a ningelago gyanana gyaye gu girela mhamba Moloki, va si mu songi,

⁵ Eni nyi na thendregedza khovbe yangu nyi wugela muthu yoyo nyi mu songa gumogo ni ngamo yaye, nyi mu fuvisa vbakari ga va na gyawe, nyi pata ni vale va hengelago naye gu gira wuphuphulu va phasela Moloki.

⁶ Muthu ayago ga vanyasikwembu, ni va nya gulola dzisolo, a dzi ningedzela gukhodwa ga silo soso, Eni nyi na mu wugela nyi mu fuvisa vbakari ga va na gyawe.

⁷ Khu guralo, dzi agiseni mu khala vathu va agidego, kholu Eni kheni Pfhumu Nungungulu wanu.

⁸ Vegedzani sileletelo sangu mu si sayisa. Eni kheni Pfhumu nyi mi sayisago.

⁹ Wule a valago babe mwendro mayi waye, a na songwa; kholu a hembulude babe ni mayi waye; novba waye wu na thegela vbatshani gwaye.

¹⁰ Mwama a gu bhaya ni mwangadzi wa mwama kwawe, mwama ni nyamayi vale va nga bhayana, khu wuvili wawe va na songwe.

¹¹ Mwama a gu lala ni mwangadzi wa babe waye, funungude khu kharato wumbwiri wa babe waye, khu wuvili wawe va na songwe; novba wawe wu na thegele vbatshani gwawe.

¹² Khidzo saye mwama a gu lala ni ngadzamwane waye, va vavili va na songwa; va giride guvivba nya guthise ngudzu; novba wawe wu na thegele vbatshani gwawe.

¹³ Mwama a gu lala ni mwama kwawe va bhayana, khu wuvili wawe va giride gilo nya gunyenyeze ngudzu; va na songwa khu wuvili wawe. Novba wawe wu na thegela vbatshani gwawe.

¹⁴ Mwama a dzegago nyamayi gumogo ni mayi wakone, a gu gira gulolela nya gukhongolo; va na vbiswa vatshavbo gumogo ni vanyamayi vale, gasi gughoha nya nga ogu, gu si manegi vbakari gwanu.

¹⁵ Mwama a gu lala ni girengo, a na songwa mwama, mu songa gambe ni girengo.

¹⁶ Nyamayi a gu hidzimela ga girengo a lala nagyo; songani nyamayi mu bwelo khavbo mu songa gambe girengo, va na konedwe gufa. Novba wawe wu na thegela vbatshani gwawe.

¹⁷ Mwama a gu dzega ndriyaye nya nyamayi, gyanana gya babe waye, mwendro gya mayi waye, a wona wumbwiri waye, nyamayi nuye a wona wumbwiri wa mwama, idzodzo dzitshoni nya dzikhongolo ngudzu, va na songwa na va gu wonwa khu vathu tigoni gwawe; kha nga olu uye a nga funungulago wumbwiri wa hane waye, a na rwala gulemela nya nandru waye.

¹⁸ Mwama a gu lala ni nyamayi a wonago migima yaye, avbo a funungulago wumbwiri waye, khu wuvili wawe va na fuviswa vbakari gwa va na gyawe, kholu funungude gibuga nya novba wa nyamayi yoyu, ni nyamayi yoyu funungude gibuga nya novba waye.

¹⁹ U nga fununguli wumbwiri wa ndruye wa mayi wago, mwendro wa hane wa babe wago, kholu wa gu funungula wumbwiri wa nongo wago nya lisine. Va na rwala gulemela nya nandru wawe.

²⁰ Oyu a lalago ni mwangadzi wa babedugwane waye, a gu funungula wumbwiri wa babedugwane waye; va na rwala gulemela nya gighoho gyawe, va nafa nyamba velega sanana.

²¹ Mwama a gu dzega mwangadzi wa ndriyaye, ugogo gunyenyeza nya gulolele; kholu funungude wumbwiri wa ndriyaye, va nafa nyamba velega sanana.

²² Khu guralo, mu na vegisani milayo yangu yatshavbo, ni sileletelo sangu satshavbo, mu si landrisa, gasi litigo nyi mu yisago muya vbaha umo li si mi gosi.

²³ Mu nga landrisi tumbunugo nya mavbanyelo ya vathu nyi na gu va lundrago mbeli gwanu; kholu va giride silo sesi satshavbo nya guvivbe; va nyi goroside.

²⁴ Eni nyi mi embedeni gukheni: Mu naya fumela litigo lawe, nyi na gu mi ningago li khala thomba yanu; litigo li gogago mahwe ni wulombe. Kheni Pfhumu Nungungulu wanu nyi mi hathidego vbakari nya mambe mayigo.

²⁵ Nyi na hambanisa sirengo si agidego nesi nya gunyenyeze; ni sinyoni si agidego nesi nya gunyenyeze; mu nga dzi nyenyezisi khu sirengo ni sinyoni, ni mafumbu nya guhambanelane nya sirengo si khwirirago khu lididi mafuni, nyi mi hevbudzidego gu si hambanisa, khu gu si loledzisa.

²⁶ Agani mahoni gwangu, kholu Eni Pfhumu Nungungulu nyi agide, gambe nyi mi hathide vbakari nya mayigo, gasi mu khala vathu vangu.

²⁷ Mwama mwendro nyamayi a na dzi ningedzelago guphasela dzinguluve, ni gulola dzisolo mwendro wutumbe; va na pfarwa khu siwindri. Novba wawe wu na thegela vbatshani gwawe.”