Levhi 15 - Bhibhiliya Nya Guage

Gunyenyeza nya mwama.

¹ Pfhumu Nungungulu a di embela Mosi ni Aroni, khuye:

² Ganelani ga sanana sa Israyeli mu si embela, khenu: Mwama nya gukari a gu duga wusila khu milini gwaye, a na nyenyeza khu wusila wowo.

³ Oyu khu nayo wu ganelago khu gunyenyeza; mili waye wa gu dusa wusila mwendro gu wu sega wu si dugi, uye a na nyenyeza.

⁴ Lidawu a lalago avbo oyu a dugelago wusila, li nyenyezide ni esi a si khalelago si nyenyezide niso.

⁵ Oyu a kuhago lidawu la muthu a dugelelago wusila a na handza guambala gwaye, aya hamba khu mati, a na nyenyeza kala gupfolani nya lidambo;

⁶ Oyu a na khalago wulanga a nga bani a khade wule a dugelago wusila a na handza guambala gwaye, aya hamba khu mati, ambari ulo a na nyenyeza kala gupfolani nya lidambo.

⁷ Oyu a kuhago mili wa muthu a dugelago wusila khu milini gwaye, a na handza guambala gwaye aya hamba khu mati, ambari ulo, a na nyenyeza kala gupfolani nya lidambo.

⁸ Muthu a gu ni madwali nya gudugele wusila khu milini, a gu hetshela oyu a agidego, uye a nga hetshedwa a na handza dzingandzu dzaye, aya hamba matini, ambari ulo, a na nyenyeza kala gupfolani nya lidambo.

⁹ Sighwabhata a khilelago khiso buru muthu a dugelago wusila khu milini gwaye, si na nyenyeza.

¹⁰ Ni wevbini a kuhago gyombo gi nga khaledwago khu muthu yoyo, a na nyenyeza kala gupfolani nya lidambo; ni wule a nga rwalago sombo soso, a na handza guambala gwaye, aya hamba khu mati ambari ulo, a na nyenyeza kala gupfolani nya lidambo.

¹¹ Ni wule nuye a nga kuhago mudwali yoyo na sa hamba mandza yaye, muthu yoyo a na handza dzingandzu dzaye, aya hamba matini, ambari ulo, a na nyenyeza kala gupfolani nya lidambo.

¹² Khali nya libumba ya gu khuhwa khu oyu a dugelago wusila khu milini gwaye yi na pandrwa, aholu gyombo nya guvatwe khu simbo, gi na handzwa khu mati.

¹³ Aholu a gu hegisa gudugelela wusila khu milini gwaye, mudwali a na saya livbandre na mavili matshigu hwane nya gu na hawulugide; a handza dzingandzu dzaye, aya hamba matini ya tsongoni, a na aga.

¹⁴ Khu litshigu nya livbandre na mararu, a na dzega matuva mavili mwendro sipomba sivili, aya bikela ga Pfhumu Nungungulu, nyangwatunu nya Tshatsha nya Tshangano, aya si ningela ga muphasi nya mhamba.

¹⁵ Muphasi nya mhamba a na ningela gimwegyo a gira phaso nya gulivbe nandru, ni gimbe nya phaso nya guvbiswe, a gira nayo nya guagiswe wusila waye, mbeli ga Pfhumu Nungungulu.

¹⁶ Mwama a gu duga mbewu nya livelego, fanede gu hamba mili waye watshavbo khu mati, ambari ulo, a na nyenyeza kala gupfolani nya lidambo.

¹⁷ Guambala gwatshavbo ni malowo yatshavbo ma nga khuhwago khu mbewu nya livelego, gu vbwetega si handzwa matini, si na nyenyeza kala gupfolani nya lidambo.

¹⁸ Mwama a gu lala ni nyamayi gu duga mbewu nya livelego khu milini gwaye, va vavili va na hamba khu mati, va nyenyeza kala gupfolani nya lidambo.

Gunyenyeza nya nyamayi

¹⁹ Nyamayi a gu bani a wona migima yaye, a dugela novba khu milini gwaye, a na lolela livbandre na mavili matshigu. Muthu a mu kuhago, a na nyenyeza kala gupfolani nya lidambo.

²⁰ Malawu yatshavbo a nga lalago avbo matshiguni yaye nya guwone migima, si na nyenyeza; ni silo satshavbo a nga si khalelago si na nyenyeza.

²¹ Oyu a kuhago lidawu laye, a na handza dzingandzu dzaye, aya hamba matini, ambari ulo a na nyenyeza kala gupfolani nya lidambo.

²² Wule a na kuhago gyombo gya avbo a nga bani a khade avbo a nga handza dzingandzu dzaye aya hamba matini, ambari ulo, a na nyenyeza kala gupfolani nya lidambo.

²³ Uye nuye a na kuhago gyombo gi nga bani gi vegidwe vbadawutunu, mwendro wulanga a khadego avbo, a na nyenyeza kala gupfolani nya lidambo.

²⁴ Mwama a gu lala ni nyamayi yoyo, novba waye wu na mu namarela, mwama yoyo, a na nyenyeza livbandre na mavili matshigu, malawu yatshavbo a lalago avbo ma na nyenyeza.

²⁵ Nyamayi nuye a gu dugelela novba matshigu nya mangi, vbavbandze nya matshigu yaye nya guwone migima, mwendro a gu vbindrisa matshigu yaye, a na lolela matshigu yatshavbo a na bani na gu dugelela novba, gukhwatshi khu matshigu nya migima yaye.

²⁶ Matshigu yatshavbo a na gu bani na gu dugelela novba, malawu yatshavbo a nga bani na gu lala avbo, gu na gira gukhwatshi khu malawu a lalelago matshiguni nya migima yaye; khidzosaye gambe ni silo satshavbo a na si khalelago, si na nyenyeza, si na gira gukhwatshi khu matshigu yaye nya migima.

²⁷ Oyu a si kuhago a na nyenyeza, a na handza guambala gwaye, aya hamba matini, ambari ulo a na nyenyeza kala gupfolani nya lidambo.

²⁸ Aholu a gu hegisa gu dugelela novba, a na saya livbandre na mavili matshigu, khu kharato, a na aga.

²⁹ Khu litshigu nya livbandre na mararu, a na dzega matuva mavili mwendro sipomba sivili, aya ningela ga muphasi nya mhamba, nyangwatunu nya Tshatsha nya Tshangano.

³⁰ Muphasi nya mhamba a na gira ningelo nya phaso nya ditshedzo, egi gimbe a gira ningelo nya phaso nya guvbiswe; khavbo avbo, muphasi nya mhamba a na mu girela nayo nya guagiswe mbeli ga Pfhumu Nungungulu khu kotani nya novba wu nga bani wu mu nyenyeziside.

³¹ Khidzo kharati va yelago gu gira va na Israyeli va hambana ni gunyenyeza gwawe, gasi va si dzi vangeli lufu khu guta nyenyezisa wulanga wangu nya guage wu guromo vbakari gwawe.

³² Oyu khu nayo wu vegedwago vale va dugelelago novba, ni vale va dugago mbewu nya livelego si va nyenyezisago;

³³ ni nyamayi wule gikhati a wonago migima yaye, ni vathu vatshavbo, vama mwendro vanyamayi va dugelelago wusila khu milini gwawe, ni mwama a lalago ni nyamayi nya gulolele.