Levhi 14 - Bhibhiliya Nya Guage

Nayo nya guagiswe mudwali nya sokono

¹ Khu hwane, Pfhumu Nungungulu a di embela Mosi, khuye:

² “Oyu khu nayo nya guagise muthu a gu ni madwali nya sokono. A na dzi wonegisa ga muphasi nya mhamba;

³ muphasi nya mhamba a na duga vbavbandze nya lizumbo gasi guya mu khedza, a gu wona gukhuye madwali nya sokono, ma hawulugide,

⁴ muphasi nya mhamba a na ruma gukhuye oyu a agiswago a resedwa sinyoni sivili nya guvbanye nya esi si agidego khu nayo, ni mapulango nya sedhari, ni mwendra nya giwunguwungu ni hisopo.

⁵ Muphasi nya mhamba a na ruma gu songa ginyoni gimwegyo khalini nya libumba yi tadego khu mati nya guage.

⁶ Khu hwane nya avbo, a na dzega ginyoni nya guvbanye, ni mapulango nya sedhari gumogo ni mwendra nya giwunguwungu ni hisopo a nega satshavbo ni ginyoni nya guvbanye novbani nya egi gi nga songwago, wu patana ni mati nya guage.

⁷ Khavbo avbo, a na mitegedzela livbandre na dzimbili dzinyondro wule a agiswago madwali nya sokono, a tivisa gukhuye agide. Khu guhegisa a na tshula ginyoni nya guvbanye gi vbuvba.

⁸ Wule a na agiswago, a na handza dzingandzu dzaye, a vbaludwa ndzudzu waye watshavbo, aya hamba, a na agiswa. Khavbo avbo, a ngu dzi kodza gu wuya lizumboni, aholu a na khala livbandre na mavili matshigu vbavbandze nya tshatsha waye.

⁹ Khu litshigu nya livbandre na mavili, a na vbaludwa mafefeleti milini gwaye gwatshavbo. Ndzudzu, giledzu, dzitshi ni satshavbo. A na handza guambala gwaye, aya hamba mili matini, a na agiswa.

¹⁰ Khu litshigu nya livbandre na mararu a na dzega dzinvutana dzimbili nyamba hasa ni nvuta nya ngadzi nya mwaga moyo nyamba hasa, ni sipandre siraru nya likhumi avba nya efa nya wuguvbi nya gupfangwe ni mafura, a ta gira ningelo, ni ndrengo nya mafura.

¹¹ Muphasi nya mhamba a na gu thangelago thumo nya guagise, a na bikela oyu a vbwetago gu agiswa ni miningelo yeyi yatshavbo mbeli ga Pfhumu Nungungulu nyangwatunu nya Tshatsha nya Tshangano.

¹² Muphasi nya mhamba a na dzega nvuta mweyo a yi bikela kha nga ningelo nya phaso nya gulivbe milandru gumogo ni ndrengo nya mafura a na si ndziwitela mbeli ga Pfhumu Nungungulu khu nayo nya bikelo.

¹³ Khavbo avbo, a na dzega nvuta aya yi paya Wulangani nya Guage, avbo gu payedwago sirengo nya miphaso nya ditshedzo ni esi nya miphaso nya guvbiswe; kholu nyama nya miphaso nya gulivbe nandru ni eyi nya miphaso nya sighoho ya gu lumba muphasi nya mhamba; silo si agidego ngudzu.

¹⁴ Muphasi nya mhamba a na dzega novba nya nvuta nya phaso nya gulivbe nandru a todza ndzeve ya nyamudye ya oyu a agiswago ni avba nya nyala nya nyaghonwe nya mandza ya nyamudye, ni nyala nya nyaghonwe nya ngondro waye wa nyamudye.

¹⁵ Khu hwane nya ugo, muphasi nya mhamba a na dzega ndrengo nya mafura, a guhula madugwana gyandzani gwaye ga nyambade.

¹⁶ Khavbo avbo, muphasi nya mhamba a na nega nyala yaye nya mandza ya nyamudye gwaye umo nya mafura ma guromo gyandzani gya nyambade a mitegedzela khu nyala livbandre na guvili mbeli ga Pfhumu Nungungulu.

¹⁷ Mafura ma tshalago gyandzani gwaye ga nyambade, muphasi nya mhamba a na todza khayo ndzeve ya nyamudye ya wule a agiswago, vbanyalatunu nya mandza ya nyamudye ni vbanyalatunu nya ngondro waye wa nyamudye khu vbatshani nya novba nya gulivbe milandru.

¹⁸ Mafura yatshavbo ma na tshalago mandzani ga muphasi nya mhamba, a na ma thela hungoni gwa oyu a agiswago.

¹⁹ Khavbo avbo, muphasi nya mhamba a na ningela gambe phaso nya ditshedzo a girela nayo nya guage wule a agiswago gu nyenyeza gwaye; khu guhegisa a na ningela mhamba nya phaso nya guvbiswe.

²⁰ Muphasi nya mhamba a na ningela phaso yoyu nya guvbiswe vbagiluvelotunu gumogo ni ningelo nya guhodze; kharati, a na mu girela nayo nya guagiswe, muthu yoyo a na aga.

Guagiswa nya mudwali nya sokono nya gisiwana

²¹ Muthu nya gisiwana a hamugago sifuyo nya gudingane gu dusa esi si vbwetegago gasi gu gira phaso nya gulivbe milandru, a na dusa hamba mweyo nya phaso nya gulivbe milandru, yi na ndziwitedwago khu nayo nya bikelo, gasi gu mana gu agiswa sighoho saye; a resa gambe gipandre nya likhumi nya efa nya wuguvbi wu gadzingidwego khu mafura, a gira ningelo nya wuguvbi, ni ndrengo nya mafura.

²² A na dzega gambe, gukhedza khu gumanela gwaye, matuva mavili mwendro sipomba sivili: Limwedo nya gugire khilo phaso nya ditshedzo, limbe nya phaso nya guvbiswe.

²³ Khu litshigu nya livbandre na mararu hwane nya gu na agisidwe, a na si ningela ga muphasi nya mhamba nyangwatunu nya Tshatsha nya Tshangano mbeli ga Pfhumu Nungungulu.

²⁴ Muphasi nya mhamba a na dzega nvuta nya phaso nya gulivbe milandru ni ndrengo nya mafura a si ndziwitela khu nayo nya bikelo mbeli ga Pfhumu Nungungulu.

²⁵ Hwane nya gu na payide nvuta nya phaso nya gulivbe milandru, muphasi nya mhamba a na dzega novba wudugwana nya girengo nya miphaso a todza khuwo ndzeve ya nyamudye ya oyu a agiswago, ni avba nya nyala nya nyaghonwe nya mandza ya nyamudye ni nyala nya nyaghonwe nya ngondro wa nyamudye.

²⁶ Muphasi nya mhamba a na guhula mafura gyandzani gwaye gya nyambade.

²⁷ Khu hwane muphasi a na nega nyala nya mandza ya nyamudye a mitegedzela khu mafura a gu nawo gyandzani gya nyambade livbandre na guvili mbeli ga Pfhumu Nungungulu;

²⁸ khu guhandzamedza, a na todza khu mafura ma guromo gyandzani gwaye ndzeve ya nyamudye ya oyu a agiswago, ni nyala nya nyaghonwe nya mandza ya nyamudye ni nyala nya nyaghonwe nya ngondro waye wa nyamudye, malangani ya mamowo a na todzago khu novba nya nvuta nya gulivbe milandru.

²⁹ Muphasi nya mhamba a na thela mafura ma tshadego gyandzani gwaye, hungoni gwa oyu a agiswago, gasi gu mu girela phaso nya gulivbe milandru, mbeli ga Pfhumu Nungungulu.

³⁰ Khavbo avbo, a na ningela lituva limwedo mwendro gipomba gimwegyo, gukhedza khu gumanela gwaye.

³¹ Gimwegyo a gira khigyo phaso nya ditshedzo, gimbe a gira phaso nya guvbiswe gumogo ni ningelo nya wuguvbi; kharati, muphasi nya mhamba a na girela nayo nya gulivbe wule a vbwetago gu agiswa, mbeli ga Pfhumu Nungungulu.

³² Oyu khu nayo nya guagise muthu a na bani ari ni ngumbe nya sokono, a gu hamuga esi si ninganago gu gira khiso mhamba nya guagiswe gwaye.”

Sokono mudzinyumbani

³³ Pfhumu Nungungulu a di embela gambe Mosi ni Aroni, khuye:

³⁴ “Avbo mu na gu belago tigoni ga Khanani, nyi na mi ningago li khala lanu, nya gukala Eni nyi thela sokono ga nyumba nya gukari vbakari gwanu,

³⁵ mune nya nyumba yoyo fanede guya tivisa muphasi nya mhamba, a mu embela, khuye: Nyi wonide nya gukhwatshi madwali nya sokono nyumbani gwangu.

³⁶ Muphasi nya mhamba nasi gu beli nyumbani gasi guya khedza mudwali, a na rumela gu dusela sombo satshavbo gu tshala liphanga nyumbani, gasi gu si nyenyeziswi sombo satshavbo si guromo nyumbani; khu hwane muphasi nya mhamba a na bela gasi guya khedza nyumba.

³⁷ A gu khedza gibalavandza, a wona dzindzarini nya nyumba, gukhwatshi gupandrega, nya guvbyuge mwendro nya gufuvilane, na gu kembegide ngudzu gubela ndzarini,

³⁸ muphasi nya mhamba a na duga khu nyumbani momo a rumela gu yi segwa khu livbandre na mavili matshigu.

³⁹ Khu litshigu nya livbandre na mavili muphasi nya mhamba a na wuya guta khedza, gu gibalavandza gi engedzelane gu thaphela ndzari, gani.

⁴⁰ Uye a na rumela gu duseledwa siwindri sa vbale gu thaphedwago khu sibalavandza, si ya dzudzugwa vbavbandze nya lidhoropa, wulangani wu nyenyezidego.

⁴¹ A ruma gambe gukhuye nyumba yi rwerwa khu ndrani wubambe nya gibalavandza, mafu ma nga rwerwa ma na rwadwa ma ya vbaladzwa vbavbandze nya lidhoropa, wulangani wu nyenyezidego.

⁴² Wulangani nya siwindri sile si nga dusedwago, va na tshomegedzela simbe siwindri, va londredza nyaluphye nyumba khu limbe libumba.

⁴³ Gibalavandza gya gu wonega gambe nyumbani, hwane nya gu bani si dusedwe siwindri, na gu rwerwidwe ni gu londredzwa ndzari,

⁴⁴ muphasi nya mhamba a na wuya gambe vbale a ta khedzisa. Gibalavandza gya gu bani gi engedzelane nyumbani, gu yeyedza gupwani nyumbani momo gu na ni sokono nya guthise; nyumba yoyo yi nyenyezide.

⁴⁵ Nyumba yi na pfhungumudwa, siwindri sakone, mapulango ni mafu yatshavbo si na rwadwa si ya vbaladzwa wulangani nya gunyenyeze vbavbandze nya lidhoropa.

⁴⁶ Oyu a na belago nyumbani matshiguni yi na gu bani yi khothidwe, a na nyenyeza kala gupfolani nya lidambo.

⁴⁷ Oyu a na lalago nyumbani momo, a na handza guambala gwaye, ni oyu a na hodzelago umo, a na gu handza nuye.

⁴⁸ Aholu muphasi nya mhamba a gu wuya ga nyumba yoyo a ta wona gukhuye gibalavandza kha gya engedzelana gudandra, hwane nya gu nyumba na yi londridwe, a na tivisa nya gukhuye nyumba yi agide, kholu gibalavandza gi vbede.

⁴⁹ Gasi gu handza nyumba, a na dzega sinyoni sivili, mapulango nya sedhari, mwendro tshalu nya gufuvile ni litamo nya hisopo.

⁵⁰ A na songa ginyoni gimwegyo khalini nya libumba yi gu ni mati nya guage;

⁵¹ a na dzega simbo nya sedhari, ni hisopo, ni mwendra nya gufuvile ni ginyoni gi nga gu vbanyago a si nega satshavbo novbani nya ginyoni gi payidwego ni matini nya guage, a mitegedzela nyumba livbandre na guvili.

⁵² A na agisa kharati nyumba khu novba nya ginyoni, khu mati nya guage, khu ginyoni nya guvbanye, khu simbo nya sedhari, khu litamo nya hisopo ni mwendra nya gufuvile.

⁵³ Khavbo avbo, a na tshula ginyoni nya guvbanye gi vbuvba vbavbandze nya lidhoropa; a na gira kharati nayo nya guagise nyumba. Iyo yi na aga.

⁵⁴ “Eyi khu milayo yatshavbo mayelano khu sibalavandza satshavbo nya sokono ni sirandzi,

⁵⁵ nya sokono nya guambale ni eyi nya dzinyumba,

⁵⁶ nya sithunya, wuhaga ni sibalavandza,

⁵⁷ gasi guhevbudza gya gu bani gi romo gilo nya guage mwendro nya gunyenyeze. Oyu khu nayo nya sokono.”