Levhi 1 - Bhibhiliya Nya Guage

Milayo nya miphaso nya guvbiswe

¹ Pfhumu Nungungulu khu Tshatshani nya Tshangano, a di rana Mosi a gu ganela naye, khuye:

² “Ganela ga vathu va na Israyeli, u va embela, khuwe: Muthu wa na gyanu a gu vbweta gu resa ningelo nya phaso ga Pfhumu Nungungulu, mu ngu kodza gu hatha mhamba vbakari nya sifuyo sa tshambini gwanu, nya mombe mwendro nya nvuta a ningela khigyo.”

³ A gu vbweta gu gira ningelo nya phaso nya guvbiswe nari wa mombe, a na dusa matune nyamba hasa, a ta wu bikela nyangwatunu nya Tshatsha nya Tshangano, gasi aya mana gu hakhwa gwadi mbeli ga Pfhumu Nungungulu.

⁴ Khavbo avbo, a na handzega mandza yaye hungoni nya gifuyo nya miphaso nya guvbiswe, gasi mhamba yi hakhwe gwadi, a kodza gu mana gutsetseledwa sighoho saye.

⁵ Khu hwane, a na paya gimombyana mbeli ga Pfhumu Nungungulu. Vaphasi nya mhamba, a gu sanana sa Aroni, va na dzega novba wakone va wu bikela ga Pfhumu Nungungulu, va mitegedzela khuwo maphuvbo yatshavbo nya giluvelo, gi guromo vbamwanyatunu nya Tshatsha nya Tshangano.

⁶ Na va vbedzide gu tshula lidowo girengo nya phaso nya guvbiswe, va na gi pilelela khu sipandre.

⁷ Sanana sa Aroni, a gu vaphasi nya mhamba, va na khondrisa nilo vbatshani nya giluvelo va vegedzela gwadi dzikhuni vbatshani nya nilo.

⁸ Vaphasi nya mhamba sanana sa Aroni, va na vega gambe khu gusasamedzela sipandre nya nyama, gupata ni hungo ni mafura vbatshani nya dzikhuni dzi guromo niloni vbagiluvelotunu.

⁹ Aholu mahembe ni dzizondzo, si na hegula khu gu handzwa khu mati, khavbovbo, muphasi nya mhamba, a na vbisa satshavbo vbatshani nya giluvelo, khiyo mhamba nya gunungele gwadi yi salalegisago Pfhumu Nungungulu.

¹⁰ A gu bani ningelo nya phaso nya guvbiswe wuri wa girengo nya gidugwana, nvuta mwendro phongo, gu vbwetega matune nyamba hasa.

¹¹ A na paya gifuyo khu phuvbo ga Wuronga nya giluvelo, mbeli ga Pfhumu Nungungulu. Vaphasi nya mhamba, sanana sa Aroni, va na dzega novba wakone va mitegedzela khuwo giluvelo maphuvbo yatshavbo.

¹² Khu hwane a na pilelela gifuyo khu sivbango, khavbo avbo, muphasi nya mhamba a na handzega sipandre ni hungo ni mafura vbatshani nya nilo wu dzurago vbagiluvelotunu.

¹³ Aholu muphasi nya mhamba a na phela khu gu handza mahembe ni dzizondzo matini, a vbedza a vbisa satshavbo vbagiluvelotunu; khuwo phaso nya guvbiswe, ningelo nya guvbiswe nya gunungele gwadi wu salalegisago Pfhumu Nungungulu.

¹⁴ Muthu a gu dusela Pfhumu Nungungulu ningelo nya guvbiswe, wa gu bani wuri wa sinyoni, a na resa matuva mwendro sifondro nya sipomba.

¹⁵ Muphasi nya mhamba a na ningela lituva vbagiluvelotunu, a li tshomborosa ngolo, nyamba li pila hungo, a li vbisa vbagiluvelotunu; a na gamela novba wakone ndzarini nya giluvelo;

¹⁶ a na dusa gitutwa, esi sa gitutwani a si pata gumogo ni mitenga a gu rinya vbatalatunu, vbafuvbi ni giluvelo, khu phuvbo ga Khugadambo.

¹⁷ Khavbo avbo, muphasi nya mhamba a na hapfha ginyoni khu vbakari ni vbakari nya mambapi nyamba gi tshapula, a gi vbisa vbagiluvelotunu vbatshani nya dzikhuni dzi guromo niloni; khuwo phaso nya guvbiswe, ningelo nya gunungele gwadi wu salalegisago Pfhumu Nungungulu.”