Josuwa 8 - Bhibhiliya Nya Guage

Gumbembiswa ga Ayi

¹ Pfhumu Nungungulu a di embela Josuwa, khuye: “U nga thavi gambe u nga vbeli tshivba, dzega vama vatshavbo va somidego, u gwela u ya dwana ni Ayi; wona gukhuwe nyi ningede mandzani gwago mufumeli wa Ayi, gumogo ni vathu vaye, lidhoropa laye ni litigo laye.

² U na ya gira Ayi gumogo ni mufumeli waye, kha nga edzi u nga girago Jeriko gumogo ni mufumeli waye; mu na ya phanga dzithomba ni sifuyo sakone si khala sanu. Vega vathu khu hwane nya lidhoropa va varamela.”

³ Khavbo avbo, Josuwa a di bela ndzilani gumogo ni vama vatshavbo va somidego gasi gu gwela aya dwana ni Ayi. A di hatha magumararu magumi mazana (30.000) vama nya dzindrena, a va rumela va hongola ni vbakari nya wutshigu.

⁴ A di va leletela, khuye: “Dzi woneleni! Indrani mu ya va varamela khu hwane nya lidhoropa; mu nga khali ngudzu hwindzo ni lidhoropa, aholu khalani na mu dongide.

⁵ Eni gumogo ni vathu hi gu navo hi na hidzimela vbafuvbi ni lidhoropa; avbo va na gukhavo khu hi khinga, hi na gira kha nga idzo hi giridego guphelatunu hi na tutuma mbeli gwawe.

⁶ Avo va na duga va hi landra kala hi va ndrindrela guya hwindzo ni lidhoropa; kholu va na, khavo: Ha gu va thava kha nga guhegulani. Khu guralo, hi na tutuma mbeli gwawe.

⁷ Khavbo avbo, enu mu na dugani mu va dhumela mu phanga lidhoropa. Pfhumu Nungungulu wanu, a na va ningela mandzani gwanu.

⁸ Avbo mu na gu phangago lidhoropa, li khondriseni khu nilo, kha nga guruma ga Pfhumu Nungungulu. Wonani; esi khu sileletelo sangu.”

⁹ Josuwa a di va ruma va hongola, avo va di ya va varamela khu vbakari nya eno khu Bheteli eno khu Ayi khu phuvbo ga Pfoladambo. Josuwa a di lala wutshigu wowo vbakari nya vathu.

¹⁰ Josuwa a di wuga ni mambagugya a tshanganisa vathu a hongola gu ya dwana ni Ayi, uye ni madhota ya Israyeli va di thanga mbeli ga vathu.

¹¹ Vama vatshavbo a nga bani ari navo va di hongola naye, na va vbohide vbafuvbi nya lidhoropa va di ghova khu phuvbo ga wuronga, kova wu khala khu vbakari gwawe ni Ayi.

¹² Josuwa a di hatha tengo nya livbandre magumi mazana (5.000) vama va ya varama khu Pfoladambo ga Bheteli ni Ayi.

¹³ Khu guralo, vathu va di fola khu Wuronga nya lidhoropa, gumogo ni avo va nga bani va sihade khu Pfoladambo gwa ilo; Josuwa a di gimbila wutshigu wowo vbakari nya kova.

¹⁴ Avbo mufumeli wa Ayi, a nga si wonago, a di khuga khu guvbiredza dhoropani, uye gumogo ni vathu vaye va di khuga ni mambagugya va ya tshangana ni va na Israyeli va dwanana navo, va di ya tombana ga wulanga nya kova, na va si dziti nya gukhavo vambe va sihade khu hwane nya lidhoropa.

¹⁵ Josuwa ni vatshavbo va na Israyeli, va di gira gukhwatshi va gu padwa khavo, va thava va tutuma khu ndzila nya guye giwulani.

¹⁶ Khavbo avbo, vathu vatshavbo va nga bani vari dhoropani va di tshangana gasi gu va lundra; va di lundra Josuwa, uye a va ndrindrela hwindzo ni lidhoropa.

¹⁷ Mwalo ni moyo a nga bani a tshade dhoropani ga Ayi mwendro Bheteli, kholu vathu vatshavbo va di dugide va lundra va na Israyeli, va tshiya lidhoropa na li tudwe.

Guphangwa nya lidhoropa

¹⁸ Pfhumu Nungungulu a di embela Josuwa, khuye: Khwandra giholoma u gu nagyo mandzani gi thonona dhoropani ga Ayi; kholu nyi na li ningela mandzani gwago; khavbo avbo, Josuwa a di khusedza giholoma gi nga bani giri mandzani gwaye gi thonona dhoropani.

¹⁹ Avbo a nga khusedza mandza yaye, avo va nga bani va varamide, va di khuga khu guvbiredza khu malangani yawe, va ta dhoropani va ta liphanga; va dzegela gu li vbisa khu nilo.

²⁰ Avbo vama va dhoropani ga Ayi, va nga thendregedza va khedza hwane, va di wona wutshi nya lidhoropa na wu gwela wuya ndzadzini, va si kodzi gu thavela ni yevbini phuvbo; kholu va na Israyeli va nga bani va gu pfhadzedzela gu thavela va di thendregedza va wuyela vale va nga bani va gu va lundra.

²¹ Josuwa ni vatshavbo va na Israyeli, na va wone gukhavo va na gyawe va nga bani va sihade va phangide lidhoropa, ni gu li wona tuviga wutshi, va di bwelela va ta dhumela vama va dhoropani ga Ayi.

²² Vambe va na Israyeli va di duga khu dhoropani va ya dwana ni nala, khu guralo, avo va di randredwa khu va na Israyeli, khu maphuvbo yatshavbo, avbo va ngamba tshiya ni moyo nya guvbanye mwendro nya guthave.

²³ Khu guralo, va di mola mufumeli wa Ayi na nga gu vbanya va mu yisa ga Josuwa.

²⁴ Avbo va nga vbedzago gu sasela vavbanyi va Ayi, avo va khabini navo va giwulani, avo va nga lundrwago khu va na Israyeli, hwane nya gu bani vatshavbo na va sasedwe khu matshari, va na Israyeli vatshavbo va di wuya dhoropani va ta sasela vatshavbo khu matshari.

²⁵ Tengo nya avo va fudego litshigu lolo, nya vama ni vanyamayi, wu diri likhumi na mavili magumi mazana, (12.000) vatshavbo nari va dhoropani ga Ayi.

²⁶ Josuwa a di neredza mandza yaye a nga bani a ma khusedzide gumogo ni giholoma gyaye, kala va mbembiswa vatshavbo vavbanyi va Ayi.

²⁷ Va na Israyeli va di phanga mitshambi ni thomba yatshavbo ya dhoropani, kha nga idzo Pfhumu Nungungulu a nga bani a leletede khidzo Josuwa.

²⁸ Josuwa a di vbisa lidhoropa la Ayi li khala marumbi kala na muhuno.

Guhevbudwa nya libhuku nya nayo mbeli nya giluvelo

²⁹ Josuwa a di rumela gu va vbayega mufumeli wa Ayi vbasimbotunu va mu diga avbovbo kala ni silambo gupfolani nya lidambo; khu guruma ga Josuwa, va di dusa girumbi vbasimbotunu va ya gi dzudzuga vbafuvbi ni nyangwa nya lidhoropa, vbatshani gwaye va di wungedzela gigomo nya siwindri, gi nga guromogo kala na muhuno.

Guwusedzwa nya gidzumeledzwano

³⁰ Khavbo avbo, Josuwa a di vbaha giluvelo gya Pfhumu Nungungulu wa Israyeli gigomoni gya Ebhali,

³¹ gukhedza khu gileletelo gya Mosi, githumi gya Pfhumu Nungungulu, a nga bani a ningide sanana sa Israyeli, kha nga idzo gu lovidwego khidzo libhukuni nya Nayo wa Mosi, pwani: A gi vbahide khu siwindri si si ngamba vatwa khu mbato, va ningela vbatshani gakone miphaso nya guvbiswe ga Pfhumu Nungungulu ni dzimhamba nya pwanano.

³² Josuwa, vbatshani vbale nya siwindri a di lovedza Nayo wule Mosi a nga bani a lovide mbeli ga va na Israyeli.

³³ Israyeli watshavbo, madhota yaye, vathangeli vaye gumogo ni valamuli vaye va di khala na va emide va randrela Ngasa, mbeli ga vaphasi nya mhamba va na Levhi va nga bani va rwade Ngasa nya Gidzumeledzwano gya Pfhumu Nungungulu. Vbale va diromo valuveli gumogo ni sivelegwa sa Israyeli; gipandre nya avo va di emide khu mbeli nya gigomo gya Garizimi, gimbe gipandre gi ema khu mbeli nya gigomo gya Ebhali; kha nga idzo va nga leletedwago khidzo khu gale khu Mosi, githumi gya Nungungulu, gukhuye gu kategiswe vathu va na Israyeli.

³⁴ Khu hwane, gu di hevbudwa magana yatshavbo nya Nayo, nya sikategiso ni givalo, kha nga idzo gu lovidwego khidzo Libhukuni nya Nayo.

³⁵ Gu mwalo ni gimwegyo nya magana ma nga leletedwago khu Mosi, Josuwa a ngamba ma hevbulela tshangano wa Israyeli, gu pata gumogo ni vanyamayi, sanana sa beleni ni valuveli va nga bani va gu vbanya vbakari gwawe.