Josuwa 5 - Bhibhiliya Nya Guage

Wugwera nya sanana sa Israyeli

¹ Gikhati vafumeli vatshavbo va Vaamori, va nga bani va vbanyela Pfoladambo nya tsongo wa Joridhani ni vafumeli vatshavbo nya Vakhanani, va nga bani va vbanya khu wubambe nya yiphwa, va nga pwago gupwani Pfhumu Nungungulu bangiside mati nya tsongo wa Joridhani mbeli ga va na Israyeli, kala va tshatuga, va di vbela tshivba, va pilega longo khu kotani ya va na Israyeli.

² Khavbo avbo, Pfhumu Nungungulu a di embela Josuwa, khuye: “Lodza siwindri u gira migala, u bedza nyaluphye wugwera sanana sa na Israyeli.”

³ Khavbo avbo, Josuwa a di gira migala khu siwindri a hanisa wugwera va na Israyeli Gibheyati-Haraloti.

⁴ Josuwa a di va hanisa wugwera khu gighelo gegi: Kholu vama vatshavbo va nga dugago khu Egipito, vama va nga somago nyimbi, vatshavbo va di fude giwulani na va guta khu Egipito.

⁵ Vathu vatshavbo va dugidego khu Egipito va di hanide wugwera, aholu avo va nga ya velegedwa giwulani vbakari nya liendro hwane nya guduge khu Egipito, kha va nga bani va hanide.

⁶ Va na Israyeli va gimbide giwulani gipimo nya magumana myaga, va vbela kharati vama vatshavbo nya nyimbi va dugidego khu Egipito; avo kha va nga yingisa lito la Pfhumu Nungungulu, kholu a di sambanyide gukhuye gima kha na va diga va wona litigo lile a sambanyidego gu ninga vababe vawe litigo li gogago mahwe ni wulombe.

⁷ Va di tshikedzwa khu sanana sawe; khiso esi Josuwa a nga si hanisa wugwera, kholu kha sa nga bani si hanide wugwera liendroni gwawe.

⁸ Na va hanide wugwera, va di khala lizumboni kala va hawuluga.

⁹ Khavbo avbo, Pfhumu Nungungulu a di embela Josuwa, khuye: “Muhuno nyi duside vbakari gwanu dzitshoni dza Egipito.” Kotani nya isoso wulanga wule wu di ranwa pwani Giligali, kala na muhuno.

Buzo nya Phasika

¹⁰ Va na Israyeli va di zumba Giligali, va gira buzo nya Phasika khu litshigu nya likhumi na mana nya ngima, vbasilambotunu, panini ga Jeriko.

¹¹ Khu litshigu lolo la limwedo, va di hodza mihandro ya tigoni mule: Sibaba nyambana mela ni sivbila nya guvawudwe.

¹² Ga litshigu li landrelago eli va hodzidego mihandro ya tigoni, manaha ma di hegisa gu thega, va na Israyeli gima kha va mana gambe manaha. Gukhugela mwaga wule, va di hodza mihandro ya tigoni ga Khanani.

Nungungulu a ngu dzi wonegisa ga Josuwa

¹³ Josuwa nari vbafuvbi ni Jeriko, na khuside maho a di wona mwama moyo na emide mbeli gwaye, na pharide litshari mandzani. Josuwa a di hidzimela gwaye aya mu wudzisa, khuye: “U moyo wathu, mwendro moyo ya valala vathu, gani?”

¹⁴ Uye a di hakha, khuye: “Ahihi, eni nyi muthangeli nya nyimbi ya Pfhumu Nungungulu, olu nyi womo avba.” Josuwa a di noga a thega vbavbatshi khu khovbe, a mu wudzisa, khuye: “Ginani u gu nagyo pfhumu yangu gasi gu embela githumi gyago?”

¹⁵ Muthangeli nya nyimbi ya Pfhumu Nungungulu a di hakha, khuye: “Tshula silato migondroni gwago, kholu wulanga u guromo wu agide.” Josuwa a di gira kharato.