Josuwa 4 - Bhibhiliya Nya Guage

Likhumi na sivili siwindri nya gialakanyiso

¹ Avbo vathu vatshavbo va nga vbelago gu tshatuga tsongo wa Joridhani, Pfhumu Nungungulu a di embela Josuwa, khuye:

² “Dzegani, vbakari nya vathu, likhumi na vavili vama ga lihundzu ni lihundzu, mu va embelani, khenu:

³ Hathani likhumi na sivili siwindri vbakari nya tsongo wa Joridhani, wulangani yi emidego avbo migondro ya vaphasi nya mhamba, mu si dzega, khu hwane mu ya si vegani avbo mu na ya lalago avbo wutshigu wowu.”

⁴ Josuwa a di rana likhumi na vavili vama avo va nga hathwago khu lihundzu ni lihundzu, vbakari ga va na Israyeli, a va embela, khuye:

⁵ “Thangani mbeli nya Ngasa nya Gidzumeledzwano gya Pfhumu Nungungulu wanu, kala vbakari nya tsongo wa Joridhani. Mayelano khu tengo nya mahundzu ya Israyeli, moyo ni moyo nya enu a na rwale giwindri magatani gwaye.

⁶ Esi si na khala kha nga giyeyedzo nya gu mi alakanyiseni; avbo litshigu sanana sanu si na gu mi wudzisago, khiso sa gu tshamusela ginani siwindri sesi,

⁷ mu na si hakhani, khenu: Avbo Ngasa nya Gidzumeledzwano gya Pfhumu Nungungulu yi nga tshatugago tsongo wa Joridhani, mati yaye ma di kabanega khu vbakari Ngasa ya Pfhumu Nungungulu yi tshatuga. Siwindri sesi si na khala gialakanyiso kala gupindruga ga va na Israyeli.”

⁸ Va na Israyeli va di gira kha nga idzo va nga leletedwago khidzo khu Josuwa; va diya vbakari nya tsongo wa Joridhani, va ya hatha likhumi na sivili siwindri kha nga idzo a nga embedwago khidzo Josuwa khu Pfhumu Nungungulu, mayelano khu tengo nya mahundzu ya Israyeli. Va di si dzega va hongola naso, va ya si vega vbawulangatunu va nga hadza gu ghova avbo.

⁹ Josuwa a di emisa gambe simbe likhumi na sivili siwindri tsongoni wa Joridhani, avbo vaphasi nya mhamba va nga gandrago khu migondro yawe na va rwade Ngasa nya Gidzumeledzwano. Siwindri soso si nga romo vbale kala na muhuno.

¹⁰ Vaphasi nya mhamba va nga rwalago Ngasa nya Gidzumeledzwano va di simama va ema vbakari nya tsongo wa Joridhani kala gutadzisega esi Pfhumu Nungungulu a nga bani a rumide Josuwa gu embela vathu, mayelano khu sileletelo a nga ningago Mosi. Vathu va di tshatuga tsongo wa Joridhani khu guvbiredza.

¹¹ Avbo va nga tshatuga vatshavbo, Ngasa nya Gidzumeledzwano gya Nungungulu gumogo ni vaphasi nya mhamba yi di thanga gambe mbeli ga vathu.

¹² Vama nya lihundzu la Rubheni, la Gadhi ni gipandre nya lihundzu la na Manasi va tshatugide na va somide matshari mbeli ga va na Israyeli, mayelano khu gileletelo va ningidwego khu Mosi.

¹³ Tengo wawe wu di gu hidzimela ga sayo nya magumana magumi mazana (40.000) vama va somidego guya dwana nyimbi; vatshavbo va di fode mbeli ga Pfhumu Nungungulu, va thonona panini ga Jeriko.

¹⁴ Khu litshigu lile kamwe, Pfhumu Nungungulu a di khusedza Josuwa mbeli ga va na Israyeli vatshavbo, ni vatshavbo va di mu ninga githawo kha nga idzo va nga bani va ninga khidzo Mosi na nga gu vbanya.

¹⁵ Khavbo avbo, Pfhumu Nungungulu a di embela Josuwa, khuye:

¹⁶ “Leletela vaphasi nya mhamba va rwadego Ngasa nya Wufakazi va duge khu tsongoni wa Joridhani.”

¹⁷ Uye a di va leletela, khuye: “Dugani khu tsongoni wa Joridhani!”

¹⁸ Avbo vaphasi nya mhamba va nga bani va rwade Ngasa nya Gidzumeledzwano gya Pfhumu Nungungulu va nga dugago khu tsongoni wa Joridhani, avbo migondro yawe yi nga gandrago mafuni nya gubange, mati nya tsongo wa Joridhani ma di bwelela ma khulunga gambe wulangani gwaye kha nga gale.

¹⁹ Vathu va tshatugide tsongoni wa Joridhani khu litshigu nya likhumi nya ngima nya guhegule va ya ghova Giligali, vbinganoni wa Khugadambo ga Jeriko.

²⁰ Josuwa a di ya emisa Giligali, likhumi na sivili siwindri si nga dzegwago tsongoni wa Joridhani,

²¹ a embela sanana sa Israyeli, khuye: “Litshigu sanana sanu si na gu wudzisago ga vababe vawe khiso, sa gu tshamusela ginani siwindri sesi,

²² mu na si hakhani, kharati: Israyeli a tshatugide avba tsongoni wa Joridhani khu mawundru nyamba nagana migondro,

²³ kholu Pfhumu Nungungulu wanu bangiside mbeli gwanu nondrwa nya tsongo wa Joridhani, kha nga idzo a nga girago gale omu nya Yiphwa nya Gufuvile, a nga yi bangisago kala ethu hi vbindra,

²⁴ gasi mafumbu yatshavbo ya mafuni ma dziti nya gukhayo gyandza gya Pfhumu Nungungulu gi na ni tshivba, gasi gikhati gyatshavbo mu simama gu ninga githawo Pfhumu Nungungulu wanu.”