Josuwa 24 - Bhibhiliya Nya Guage

Josuwa a ngu vbanganana ni vathu

¹ Josuwa a di tombanisa mahundzu yatshavbo ya na Israyeli tigoni ga Sikemi, a ranisa gambe madhota yawe, vathangeli, valamuli gumogo ni dzindruna; vatshavbo va di ya dzi bikela mbeli ga Nungungulu.

² Josuwa a di embela vathu vatshavbo, khuye: Upwani esi Pfhumu Nungungulu wa Israyeli a ganelago, wari, khuye: “Gikhatini gya gale vababe vanu, a gu uye Tera, babe wa Abrahama ni Nahori, va di gu vbanya khisikheyi nya tsongo wa Ewufrate va khozela vambe vanungungulu.”

³ Khu guralo, nyi di dzega babe wanu Abrahama tshatugo nya tsongo wa Joridhani, nyi mu yisa vbakari nya litigo latshavbo la Khanani, nyi mu andrisela gambe livelego laye, khu gu mu ninga Isaki.

⁴ Isaki nyi di mu ninga Jakobe ni Esawu, Esawu nyi mu ninga gigomo gya Seyiri gi khala gyaye; aholu Jakobe ni sanana saye va di relela va hongola Egipito.

⁵ Khavbo avbo, nyi rumede Mosi ni Aroni nyi ya sasela litigo la Egipito, kha nga idzo nyi giridego vbakari gwawe; khu hwane, nyi di va dusa khiyo.

⁶ Avbo nyi nga dusa vababe vanu khu Egipito, mu di gimbila khu yiphwa, Vagipiti va di lundra vababe vanu khu dzikareta gumogo ni vakhileli nya dzikavalu kala va vboha ga yiphwa nya Gufuvile.

⁷ Avbo vababe vanu va nga lila, Pfhumu Nungungulu a di thela gidema vbakari ga Vagipiti, yiphwa yi va fenengedza; mu si wone khu maho yanu esi nyi giridego tigoni ga Vagipiti. Khavbo avbo, mu di khalani giwulani gikhati nya gikhongolo.

⁸ Khu vbale, Eni nyi di mu resa tigoni ga Vaamori, va nga bani va vbahide tshatugo wa Joridhani, avo mu nga dwanani navo; aholu Eni nyi di va ningela mandzani gwanu, nyi va mbembisa mbeli gwanu, enu mu fuma litigo lawe.

⁹ A di khuga nuye, mufumeli wa Mowabhi, Bharaki, mwamana wa Zipori, a ta dwana ni va na Israyeli; a di rumela gu ya ranwa Bhalahama, mwamana wa Bheyori, gasi guta mi hembululani.

¹⁰ Aholu Eni kha nya dzina gu yingisa Bhalahama; khavbo avbo, uye a di mi kategisa, eni nyi mi vbulugisa mandzani gwaye.

¹¹ Avbo mu nga vbindra khu Joridhani muta Jeriko, vavbanyi va Jeriko va di mi dwanisa gumogo ni Vaamori, Vaferezi, Vakhanani, Vahiti, Vagerezi, Vahevhi ni Vajebhusi; aholu Eni nyi di va ningela mandzani gwanu.

¹² Nyi di rumela gambe dzimifi mbeli gwanu, idzo dzi nga va tutumisago mbeli gwanu, gumogo gambe ni vafumeli vavili nya Vaamori, isoso khwa si kodza khu matshari yago ni wulaho wago.

¹³ Nyi mi ningideni litigo mu ngamba li thumela ni madhoropa mu ngamba ma vbaha, mu khalani umo; mwa gu hodzani mihandro nya vhinya niyo nya miolivha mu ngamba yi phaya.

Guwusedzwa nya gidzumeledzwano

¹⁴ Gasi olu, ningani githawo Pfhumu Nungungulu, mu Mu thumela khu gutumbega nya lisine; dzudzugani hwindzo vanungungulu va nga thumedwa khu vababe vanu khisikheyi nya tsongo wa Ewufrate ni Egipito, mu khozela Pfhumu Nungungulu.

¹⁵ Aholu mwa gu si wona siri sadi gu khozela Pfhumu Nungungulu, hathani muhuno khu mani mu yelago gu mu thumela: Vanungungulu va nga khozedwa khu vababe vanu na vari khisikheyi nya tsongo wa Ewufrate, mwendro vanungungulu va Vaamori mu vbanyago tigoni gwawe. Gasi eni ni ndranga yangu hi na khozela Pfhumu Nungungulu.

¹⁶ Khavbo avbo, vathu va di hakha, khavo: “Si na manege hwindzo ni ethu guhambana ni Pfhumu Nungungulu hi ya khozela vambe vanungungulu;

¹⁷ kholu Pfhumu khuye Nungungulu wathu; khuye a hi dusidego gumogo ni vababe vathu, khu tigoni ga Egipito, nyumbani nya wugumbi, khuye a giridego sisamadziso satshavbo sesi mbeli gwathu. A hi hetedzide ndzilani gwatshavbo hi gimbidego khumo ni ga mayigo yatshavbo hi vbindridego khu vbakari gwawe.

¹⁸ Pfhumu Nungungulu tutumiside mbeli gwathu vathu vatshavbo vava, kala ni Vaamori, a gu vavbanyi va tigoni momo; khu guralo, ethu nethu hi na khozela Pfhumu, kholu Uye khuye Nungungulu wathu.”

¹⁹ Khavbo avbo, Josuwa a di embela vathu, khuye: “Enu kha mu dzi kodzi gu thumela Pfhumu Nungungulu, kholu Uye Nungungulu a agidego, ni Nungungulu a khozedwago gikhati gyatshavbo, a si timiseligo sihoso ni sighoho sanu.

²⁰ Mwa gu digani Pfhumu Nungungulu mu khozela vambe vanungungulu nya malipha, Uye a na vbindrugedza a mi girela guvivba, a mi mbembisa, hwane nya gu bani na mu girede silo nya sadi.”

²¹ Khavbo avbo, vathu va di embela Josuwa, khavo: “Kha si giregi, ethu hi na khozela Pfhumu Nungungulu.”

²² Josuwa a di embela vathu khuye: “Enu mwabune mu dzifakazi nya gukhenu mu hathide Pfhumu Nungungulu gu mu khozelani.” Va di ganela, khavo: “Ethu hi dzifakazi.”

²³ Gasi olu, dzudzugani hwindzo vanungungulu nya malipha va guromo vbakari gwanu mu neredza myonyo yanu ga Pfhumu Nungungulu wa Israyeli.

²⁴ Vathu va di embela Josuwa, khavo: “Pfhumu Nungungulu wathu, khuye basi hi yelago gu Mu khozela ni gu yingisa lito Laye.”

²⁵ Khu kharati, litshigu lile Josuwa a di gira gidzumeledzwano ni vathu a gi vega kha nga sileletelo ni fanelo tigoni ga Sikemi.

Giwindri nya wufakazi

²⁶ Josuwa a di lova magana yoyo umo nya Libhuku nya Nayo wa Nungungulu; a dzega giwindri nya gikhongolo a gi emisa vbavbatshi nya nguhu wu nga bani wu romo vbafuvbi ni Wulanga nya Guage wa Pfhumu Nungungulu.

²⁷ Josuwa a di embela vathu vatshavbo, khuye: Wonani nya gukhenu giwindri gegi gi na hi girela wufakazi, kholu gi pwide magana yatshavbo Pfhumu Nungungulu a hi embedego; khu guralo, gi na khala fakazi vbakari gwanu ni ga vambe, gasi mu si lipheli Nungungulu wanu.

²⁸ Khu guralo, Josuwa a di va rumela; muthu ni muthu a hongola thombatunu gwaye.

Gufa ga Josuwa ni Eliyazari

²⁹ Hwane nya satshavbo sesi, Josuwa, mwamana wa Nuni, githumi gya Pfhumu Nungungulu, a difa nari ni tanga nya lizana ni likhumi (110) myaga.

³⁰ Va di mu dzinga mafuni nya thomba yaye, tigoni ga Timinati-Sera, ga gipandre nya gigomo gya Efrayimi, khu phuvbo ga Wuronga nya gigomo gya Gahasi.

³¹ Israyeli a di khozela Pfhumu Nungungulu gikhatini gwatshavbo nya guvbanye ga Josuwa, ni gikhati gya madhota ma vbanyidego hwane nya gufe ga Josuwa; avo va nga bani va yiti mithumo yatshavbo Pfhumu Nungungulu a yi giridego ga va na Israyeli

³² Marambo ya Josefa, ayo va na Israyeli va dzudego nawo khu Egipito, va diya ma dzinga tigoni ga Sikemi, ga gipandre Jakobe a nga rengago ga sanana sa Hamori, babe wa Sikemi, khu lizana (100) singerengere nya parata, gi di khala thomba ya sanana sa Josefe.

³³ Eliyazari, mwamana wa Aroni, a difa, a dzingwa nuye gigomoni gya Gibheya gi nga bani gi lumba Fineya, mwanaye, a nga bani a ningidwe tigoni nya gigomo gya Efrayimi.