Josuwa 23 - Bhibhiliya Nya Guage

Thokhozelo nya guhegise wa Josuwa

¹ Na gu vbindride gikhati nya gulaphe, hwane nya gu Pfhumu Nungungulu na ningide gurula ga va na Israyeli ga valala vawe vatshavbo nya vaakelane, Josuwa na gumbide nari ni matshigu nya gutale,

² Josuwa a di tombanisa vatshavbo va na Israyeli, madhota, vathangeli nya dzinyumba, nya wulamuli ni dzindruna dzawe, a va embela, khuye: Eni olu nyi gumbide, nyi na ni matshigu nya gutale,

³ enu mu wonide satshavbo esi Pfhumu Nungungulu wanu, a giridego ga mayigo yaya yatshavbo khu mahungu yanu, kholu Pfhumu Nungungulu wanu, khuye a mi dwanedego.

⁴ Wonani, nyi mi kavedzede khu mahundzu yanu mayigo yaya ma tshalago khu gulola dzisolo, gumogo ni mayigo yatshavbo nyi ma mbembisidego, gukhugela Joridhani kala Yiphwa nya Yikhongolo, guya Pfoladambo; gasi ma khala thomba nya situgulwana sanu.

⁵ Pfhumu Nungungulu wanu a na va lundra mbeli gwanu avo va khalago tigoni momu, gasi enu mu na fuma litigo lawe kha nga idzo a mu tumbisidego khidzo Pfhumu Nungungulu wanu.

⁶ Gasi olu, dzi garadzeni ngudzu khu gu vegedza ni gu landrisa satshavbo esi si lovidwego umo nya Libhuku nya Nayo wa Mosi, gasi mu si hambani nawo, mu si ndreyi guya nyamudye mwendro nyambade;

⁷ gasi mu si dzi tshanganisi ni mayigo yaya ma tshadego vbakari gwanu. Mu nga khumbugi malina ya vanungungulu vawe, ambari gu sambanya khavo, mu nga va thumeli ambari gu va khozela.

⁸ Aholu namarelani ga Pfhumu Nungungulu wanu, kha nga idzo mu giridego kala na muhuno;

⁹ Kholu mayigo nya makhongolo nya tshivba, ma tutumisidwe khu Pfhumu Nungungulu mbeli gwanu; gasi ga enu vambe mwalo ni moyo a tiyago gu ema mbeli gwanu kala na muhuno.

¹⁰ Muthu moyo basi wa na gyanu a na lundra likhumi mazana (1.000) vama, kholu Pfhumu Nungungulu wanu, khuye a dwanago khu enu, kha nga a mi tumbisidego.

¹¹ Khu guralo, dzi garadzeni khu gu vegedza hefemulo wanu gasi mu fela gu gola Pfhumu Nungungulu wanu.

¹² Kholu mwa gu ndreyani avbo Gwaye, mu namarela ga avo va tshadego ga mayigo yaya, ma guromo vbakari gwanu, ni gu dzegelana navo vanyamayi, mu dzi tshanganisa navo,

¹³ dzitini khu lisine gukhenu Pfhumu Nungungulu wanu, gima kha na lundra gambe mayigo yaya mbeli gwanu, aholu ma na khala nari naphwi wanu ni ligoga ni lipitso hwane gwanu, ni muba mbeli gwanu, kala mu mbembiswa ga litigo leli nya ladi, mu ningidwego khu Pfhumu Nungungulu wanu.

¹⁴ Olu, wonani nya gukhenu, muhuno mu ngu landra ndzila ya vatshavbo va tigoni momu; gasi enu mu ngu dziti khu monyo wanu watshavbo ni hefemulo wanu watshavbo gukhenu gi mwalo ni gimwegyo gitumbiso gi thegidego ga magana yatshavbo nya yadi aya Pfhumu Nungungulu wanu a ganedego khu kotani gwanu ma ngamba girega; aholu yatshavbo ma tadzisegide, gu mwalo ni limwedo basi li tandregidego.

¹⁵ Kha nga olu magana yatshavbo ya Pfhumu Nungungulu ma dzudego avbo gwanu, satshavbo nya sadi esi Pfhumu Nungungulu a mu tumbisidego, kharato gambe Pfhumu Nungungulu a na tiyisa vbatshani gwanu tsayiso watshavbo a mu embedego kala a mi sasela ga litigo leli nya ladi Pfhumu Nungungulu wanu a mi ningidego.

¹⁶ Mwa gu hambanisa gidzumeledzwano gya Pfhumu Nungungulu wanu, a mi leletedego, mu ya thumela vambe vanungungulu ni gu va khozela, khavbo avbo likhulo la Pfhumu Nungungulu li na khondra vbakari gwanu, mu na vbelani nyamba hwela tigoni momu nya gwadi a mi ningidego.