Josuwa 21 - Bhibhiliya Nya Guage

Madhoropa ma lumbago lihundzu la na Levhi

¹ Khavbo avbo, vathangeli nya dzindranga dza ya na Levhi, va di vboha ga muphasi nya mhamba Eliyazari, ni ga Josuwa, mwamana wa Nuni, ni ga vathangeli nya dzindranga nya mahundzu ya Israyeli;

² va ganela naye dhoropani ga Silo, tigoni ga Khanani, khavo: “Pfhumu Nungungulu rumede khu ga Mosi, gukhuye hi ningwe madhoropa gasi hi khale umo gumogo ni malanga nya guhavise umo mitshambi yathu.”

³ Khavbo avbo, va na Israyeli, va di ningela ga va na Levhi, madhoropa yaya gumogo ni malanga yakone, gasi gu khala thomba yawe, kha nga idzo a rumidego khidzo Pfhumu Nungungulu.

⁴ Solo yi di thegela dzindranga dza ya na Khowati. Khu guralo, sanana sa Aroni, muphasi nya mhamba, va nga bani vari va na Levhi, va di mana khu gulola solo likhumi na mararu madhoropa umo nya lihundzu la na Judha, nya lihundzu la Simiyoni ni ga lihundzu la Bhejami.

⁵ Vambe va na Khowati va di mana khu gulola solo likhumi madhoropa nya gulumbe dzindranga nya lihundzu la na Efrayimi, ya na Dhani ni ga gipandre nya lihundzu la na Manasi.

⁶ Va na Gerisoni, solo yawe yi di thega yi lola likhumi na mararu madhoropa nya gulumbe dzindranga nya mahundzu ya na Isakari, Aseri, va na Nafitali ni ga gipandre nya lihundzu la Manasi tigoni ga Bhasani.

⁷ Va na Merari, gukhedza khu dzindranga dzawe, va di hakha likhumi na mavili madhoropa nya lihundzu la Rubheni, la na Gadhi ni la na Zebhuloni.

⁸ Va na Israyeli va di ningela va na Levhi madhoropa yoyo gumogo ni malanga nya guhavisele umo, va va kabanisela khu gulola solo, mayelano khidzo a rumidego khidzo Pfhumu Nungungulu khu ga Mosi.

Mayigo nya gulumbe va na Khowati

⁹ Lihundzu la na Judha ni lihundzu la na Simiyoni, va di ningwa madhoropa yaya ma landrelago:

¹⁰ Gu di ningwa ga sanana sa Aroni ni dzindranga dza na Khowati ni sanana sa Levhi, avo va manidego gipandre nya guphele.

¹¹ Khu guralo, va di ningwa Kiriyati-Aribha (Aribha a diri babe wa Anaki), a gu uye Hebroni, gipandre gya gigomoni ga Judha, ni wuhaviselo waye.

¹² Gasi marembwe ni mitalala nya lidhoropa leli, va di ninga Kalebi, mwamana wa Jefoni, gasi gu khala thomba yaye.

¹³ Sanana sa muphasi nya mhamba Aroni, va di ningwa Hebroni ni mayigwana yaye, lidhoropa nya wuthavelo la vale va songago vathu gumogo ni Libhina ni mayigwana yaye;

¹⁴ Jatiri ni mayigwana yaye, Esitemowa ni mayigwana yaye;

¹⁵ Holomi, ni mayigwana yaye, Dhebhiri, ni mayigwana yaye;

¹⁶ Ayimi ni mayigwana yaye, Jutani ni mayigwana yaye ni Bheti-Semesi ni mayigwana yaye; madhoropa yatshavbo nya mahundzu yoyo ya mavili, livbandre na mana.

¹⁷ Lihundzu la Bhejami va di li ninga Gibheyoni, gumogo ni mayigwana yaye, Gabha ni mayigwana yaye;

¹⁸ Anatoti gumogo ni mayigwana yaye ni Alimoni, ni mayigwana yaye; yatshavbo ma enedza madhoropa mana.

¹⁹ Tengo nya madhoropa ya vaphasi nya mhamba, sanana sa Aroni likhumi na mararu madhoropa gumogo ni mayigwana yaye.

²⁰ Gasi ya vambe va na Levhi nya sanana sa Khowati, va di ningwa madhoropa nya lihundzu la na Efrayimi.

²¹ Va di ningwa Sikemi, lidhoropa nya wuthavelo nya sighevenga, ni mayigwana yaye gigomoni ga Efrayimi, ni Gezeri ni mayigwana yaye,

²² Kibizayimi ni mayigwana yaye; yatshavbo ma enedza madhoropa mana.

²³ Lihundzu la na Dhani, li di ningwa madhoropa yaya: Eliteki ni mayigwana yaye, Gibhetoni ni mayigwana yaye;

²⁴ Ayijaloni, ni mayigwana yaye, Gati-Rimoni, ni mayigwana yaye; yatshavbo ma enedza madhoropa mana;

²⁵ ga gipandre nya lihundzu la Manasi, va di mana Tahanaki, ni mayigwana yaye, Gati-Rimoni ni mayigwana yaye, yatshavbo ma enedza madhoropa mavili.

²⁶ Gupata yatshavbo likhumi madhoropa ni mayigwana yaye, ma ningidwego dzindranga dza simbe sanana sa Khowati.

Mayigo nya gulumbe va na Gerisoni

²⁷ Ga lihundzu la na Levhi, a sanana sa Gerisoni, va di ningwa khavbo nya gipandre nya lihundzu la na Manasi, madhoropa ya Golani, lidhoropa nya wuthavelo wa vale va nga songa khu guphazama, tigoni ga Bhasani ni wuhaviselo waye, ni Bheyesitera ni wuhaviselo waye; yatshavbo ma khala madhoropa mavili.

²⁸ Ga lihundzu la na Isakari, va di mana Kisiyamu ni wuhaviselo waye, Dhabherati ni wuhaviselo waye,

²⁹ Jarimuti ni wuhaviselo waye, Eni-Ganimi ni wuhaviselo waye; yatshavbo ma khala madhoropa mana.

³⁰ Ga lihundzu la Aseri, va di ningwa Misali ni wuhaviselo waye, Abhidhomi ni wuhaviselo waye,

³¹ Helikati ni wuhaviselo waye, Reyobhi ni wuhaviselo waye; yatshavbo ma khala madhoropa mana.

³² Ga lihundzu la Nafitali, va di mana madhoropa nya wuthavelo wa vale va nga songa khu guphazama, Kedhesi, tigoni ga Galileya, ni wuhaviselo waye, Hamoti-Dhori, ni wuhaviselo waye, Karitani ni wuhaviselo waye; yatshavbo ma khala madhoropa mararu.

³³ Gupata yatshavbo madhoropa ya na Gerisoni, gukhedza khu dzindranga dzawe, ma gu enedza likhumi na mararu madhoropa ni wuhaviselo wawe.

Madhoropa nya gulumbe va na Merari

³⁴ Dzindranga dza va na Merari, ni vambe vatshadego ga va na Levhi, va ningidwe khu lihundzu la Zebhuloni, madhoropa yaya: Jokineyamu, Karitani ni wuhaviselo wawe;

³⁵ Dhimina ni Nahalali gumogo ni wuhaviselo waye; yatshavbo ma khala madhoropa mana.

³⁶ Gasi lihundzu la Rubheni, va di li ninga Bhezeri gumogo ni wuhaviselo waye, Jaza ni wuhaviselo waye;

³⁷ Kedhemoti gumogo ni wuhaviselo waye, ni Mefahati ni wuhaviselo waye; yatshavbo ma khala madhoropa mana.

³⁸ Ga lihundzu la Gadhi, va di li ninga tigoni ga Gileyadhi, Ramoti, lidhoropa nya wuthavelo ga vale nya gusonge muthu, gumogo ni wuhaviselo waye, Mahanayimi gumogo ni wuhaviselo waye,

³⁹ Hesibhoni gumogo ni wuhaviselo waye, ni Jazeri ni wuhaviselo waye; yatshavbo ma khala madhoropa mana.

⁴⁰ Yatshavbo madhoropa yaya, ma di manwa khu sanana sa Merari khu gulola solo, gukhedza khu dzindranga dzawe, va nga bani na va tshade ga mapango ya va na Levhi; a gu likhumi na mavili madhoropa.

⁴¹ Tengo watshavbo nya madhoropa ya na Levhi vbakari nya thomba ya na Israyeli, ma diri magumana na livbandre na mararu madhoropa ni wuhaviselo wawe;

⁴² lidhoropa ni lidhoropa li diri ni wuhaviselo waye khu wubambe; gu di gira kharato ga madhoropa yatshavbo.

⁴³ Pfhumu Nungungulu a di ningela ga va na Israyeli, litigo latshavbo a nga bani a sambanyide gu ninga vababe vawe; li di khala lawe avo va vbaha umomo.

⁴⁴ Pfhumu Nungungulu a di ninga gurula khu maphuvbo yatshavbo gukhedza khidzo a nga sambanyago khidzo ga vababe vawe; mwalo ni moyo ya valala vawe a nga bani na gu tiya mbeli gwawe; Pfhumu Nungungulu a di va ningela vatshavbo mandzani gwawe.

⁴⁵ Gu di tadzisega magana yatshavbo nya yadi, Pfhumu Nungungulu, a ganedego ga ndranga ya Israyeli.