Josuwa 2 - Bhibhiliya Nya Guage

Josuwa a ngu rumela vasoli tigoni ga Jeriko

¹ Josuwa, mwamana wa Nuni, a di rumela khu gisihaledza tigoni ga Kitimi vasoli vavili a va embela, khuye: “Indrani mu ya holelela gwadi litigo ni lidhoropa la Jeriko.” Va di hongola vaya bela ndrangani ga nyamayi moyo nya gibhayi, lina laye a ranwago pwani Rahabhi, avbo va nga ya khalago avbo.

² Khavbo avbo, gu di embedwa mufumeli wa Jeriko, pwani: “Wona nya gukhuwe wutshigu wowu gu bede omu tigoni va na Israyeli nya gukari, gasi guta holelela litigo.”

³ Mufumeli a di rumela gu embela Rahabhi, khuye: “Tutumisa vama vovo va dzudego va ta bela ndrangani gwago, kholu avo va gu tela guta holelela litigo leli.”

⁴ Aholu, nyamayi wule a di siha vama vale, a hakha, khuye: “Lisine, va di dzude vama nya gukari ndrangani gwangu; aholu eni nyi di si guti va guta khu hayi.

⁵ Gupfolani nya lidambo, gikhati gu nga segwago malimba nya lidhoropa va dugide; kha nyi guti va bede khu hayi. Khu guralo, va landreni khu guvbiredza mu na va mana nyamba hwela!”

⁶ Khavbo avbo, uye a di va litisa khu vbagikolitunu nya nyumba yaye, aya va siha vbadzinyandratunu nya wughama a nga bani a wu anegede vbatshani nya langwe yaye.

⁷ Khavbo avbo, vama va nga rumedwago khu mufumeli va di va landra khu ndzila nya gutshatuge tsongo wa Joridhani; na va dugide vama va nga bani va va landra khu hwane, gu di segwa lidimba.

⁸ Vasoli na va si gu lali, Rahabhi a di lita a va yela vbatshani nya langwe,

⁹ a va embela, khuye: “Nyi ngu dziti gukheni Pfhumu Nungungulu a mi ningide litigo leli; ethu ni vatshavbo vavbanyi va tigoni momu, hi tade khu hwanga ni gu vbela tshivba khu kotani yanu.

¹⁰ Hi pwide gupwani Pfhumu Nungungulu bangiside mati nya yiphwa nya Gufuvile mbeli gwanu, gikhati mu dugidego khu tigoni ga Egipito, ni edzi a mi sayisidego khidzo khisikheyi nya tsongo wa Joridhani, ga vafumeli vavili nya Vaamori, Seyoni ni Ogi, ava mu va mbembisidego.

¹¹ Avbo hi nga pwago isoso, myonyo yathu yi di vbela tshivba, mwalo na moyo a mi tiyelago, kholu Pfhumu Nungungulu wanu, Nungungulu wa vbatshani ndzadzini, ni vbavbatshi mafuni.

¹² Gasi olu, nyi sambanyeleni khu lina la Pfhumu Nungungulu, kha nga olu nyi giridego wuhindzi avbo gwanu, enu nenu mu nyi girela kharato, mu vbanyisa ndranga ya babe wangu; nyi ningeni giwonegiso nya lisine

¹³ nya gukhenu mu na vbulugisa babe wangu, mayi wangu, vandriyangu nya vanyamayi ni satshavbo si va lumbago, ni gukhenu mu na va vbulugisa va si songwi.”

¹⁴ Avo va di hakha, khavo: “Khu kotani nya womi wathu, hi na vbanyisa uwo wanu wa gumba hi tugudzisa. Avbo Pfhumu Nungungulu a na gu hi ningago litigo leli, ethu nethu hi na mi sayisani khu wuwadi ni gutumbega.”

¹⁵ Khavbo avbo, uye a di va tshigisa khu ngodzi khu vbagihogotunu, kholu nyumba yaye yi di vbahidwe vbandzaritunu nya libhiyo nya lidhoropa.

¹⁶ Uye a di va embela, khuye: “Thavani muya gigomoni gasi mu si manwi khavo va mi lundrago. Sihalani iyoyo mu vbedza matshigu mararu, kala avo va bwelela va wuya; khu hwane mu na phara ndzila yanu.”

¹⁷ Vama vale va di embela nyamayi, khavo: “Wona idzo hi na tadzisago khidzo gisambanyo hi giridego:

¹⁸ Gikhati hi na guta belago tigoni gwanu, tshanganisa ndrangani gwago babe wago, mayi wago, vandriyago ni vatshavbo valongo vababe wago; u na hunga ngodzi yeyi nya gufuvile vbagihogotunu vbavba hi dugidego khavbo.

¹⁹ Gani khu mani uye a na tulago lidimba a duga vbavbandze, uye novba waye wu na thegela hungoni gwaye; ethu hi na bani hiri mwalo nandru; aholu novba wa wule a na bani nari nago nyumbani momu wu na thegele mihungoni gwathu, a gu tshuka a songwa khu muthu.

²⁰ Uwe nuwe wa gu tugudzisa makungo yaya yathu, ethu nethu hi na tshulega ga gifungo gegi hi gi sambanyidego gwago.”

²¹ Nyamayi a di hakha, khuye: “Si na girege kha nga idzo mu ganedego khidzo!” Khavbo avbo, a di va vbangana va hongola. Khu hwane, nyamayi a di dzega ngodzi nya gufuvile a yi hunga vbagihogotunu nya nyumba yaye.

²² Khavbo avbo, vasoli va di hongola mugigomoni; va di ya khala umomo matshigu mararu, kala vale va nga bani va va landra va bwelela va wuya; avo va nga bani va va landra va di va vbweta dzindzilani gwatshavbo, aholu kha va va mana.

²³ Khu kharati, vama vale va vavili, va di tshiga khu mugigomoni va bwelela, va tshatuga tsongo wa Joridhani; va diya vbafuvbi ga Josuwa, mwamana wa Nuni, va ya mu embeledzela satshavbo iso si nga va dugelelago.

²⁴ Avo va di mu embela, khavo: Pfhumu Nungungulu ningede mandzani gwathu latshavbo litigo leli; vavbanyi vaye vatshavbo va gu ndrendremela khu hwanga mbeli gwathu.