Josuwa 17 - Bhibhiliya Nya Guage

Mayigo ya Manasi

¹ Sanana sa Manasi, matiwula ya Josefa; va di hakha navo thomba yawe. Makiri, mwama nya ndrena, matiwula ya Manasi, babe wa Gileyadhi, a di hakha litigo la Gileyadhi ni Bhasani.

² Simbe sanana sa Manasi si di hakha niso thomba yawe, gukhedza khu dzindranga dzawe a gu esi: Sanana sa Abhiyezeri, sa Heleki, sa Asiriyeli, sa Sikemi, sa Heferi ni sa Semidha. Khiso esi sanana sa Manasi, mwamana wa Josefa, gukhedza khu dzindranga dzawe.

³ Khu guralo, Selofeyadi, mwamana wa Heferi, mwamana wa Gileyadhi, mwamana wa Makiri, mwamana wa Manasi, kha nga velega sanana nya sikhwathana, aholu a di velega basi sagadzyana, malina yawe a gu aya: Makila, Nowa, Hogila, Milika ni Tiriza.

⁴ Ava va di hidzimela ga muphasi nya mhamba Eliyazari ni ga Josuwa, mwamana wa Nuni ni ga manganagana va ya ganela, khavo: “Pfhumu Nungungulu a leletede Mosi gukhuye a hi ninge thomba vbakari ga vandriyathu.” Khu guralo, Josuwa a di va ninga thomba vbakari ga vandruye vababe wawe, kha nga guganela ga Pfhumu Nungungulu.

⁵ Gudiga nya litigo la Gileyadhi ni la Bhasani, ma manegelago khisikheyi nya tsongo wa Joridhani, Manasi a di hakha likhumi sipandre,

⁶ kholu vanyamahegyane va Manasi va di hakha thomba vbakari nya sanana sa lihundzu la limwedo. Litigo la Gileyadhi li di hakhwa khu simbe sanana sa Manasi.

⁷ Vbingano wa Manasi wu di khugela Aseri kala Mikimetati, wu khedzana ni Sikemi, vbingano wowu wu di hongola phuvbo ga Marandzi kala ga vavbanyi va Eni-Tapuwa.

⁸ Litigo la Tapuwa, litigo la Manasi; aholu Tapuwa yoyu ambari a manegelago vbinganoni ni va na Manasi, a diri wa va na Efrayimi.

⁹ Khavbo avbo, vbingano wa gu relela kala gitsongwanani gya Khanani. Madhoropa, ma manegelago vbakari ga ayo ya Manasi, khu phuvbo ga Marandzi nya gitsongwana, ma di gu lumba Efrayimi; khu guralo, vbingano wa Manasi wa gu gimbila khu Wuronga nya gitsongwana, wu ya vbelela phwani.

¹⁰ Gipandre gya Marandzi gi di lumba Efrayimi; gipandre gya Wuronga gi lumba Manasi, yiphwa a diri iyo vbingano waye; khu phuvbo ga Wuronga va di girelana vbingano ni Aseri, khu Khugadambo va girelana ni Isakari.

¹¹ Kholu tigoni ga Isakari ni Aseri, Manasi a di ningwa Bheti-Seyani gumogo ni madhoropa yaye; Ibhileyamu gumogo ni madhoropa yaye; vavbanyi va Dhori gumogo ni madhoropa yawe; vavbanyi va Eni-Dhori gumogo ni madhoropa yawe; vavbanyi va Tahanaki gumogo ni madhoropa yawe ni vavbanyi va Megidhu gumogo ni madhoropa yawe; a gu malanga mararu.

¹² Va na Manasi kha va dzi kodza gu tutumisa vavbanyi va madhoropa ni mule; khu guralo, Vakhanani va di tiya gu vbaha tigoni mule.

¹³ Gikhati va na Israyeli va nga manago tshivba, va di gurumedza Vakhanani gu livba gikhaba, aholu kha va va tutumisa vatshavbo.

Ketso ya sanana sa Josefe

¹⁴ Khavbo avbo, sanana sa Josefa si di embela Josuwa, khiso: “Khu ginani u nga hi ningago thomba mweyo, gipandre gimwegyo, olu ethu hi gu vathu nya vangi kharati, ava Pfhumu Nungungulu a va kategisidego kala olu?”

¹⁵ Josuwa a di va hakha, khuye: “Mwa gu bani muri vangi, gwelani khabini mu ya hagata litigo la va na Peresi ni la va na Efrayimi, mu li dzega olu gu gigomo gya Efrayimi gidugwana ngudzu gwanu.”

¹⁶ Khu guralo, sanana sa Josefa si di hakha, khiso: “Gigomo gegi kha gi na hi enelela; ni gu gambe Vakhanani vatshavbo va vavbanyago tigoni momu nya mikova va na ni dzikareta nya dzisimbi, ambari avo va gomogo Bheti-Seyani gumogo ni madhoropa yawe, gumogo gambe ni avo va gomogo kovani ga Jezireyeli.”

¹⁷ Josuwa a di ganela ga ndranga ya Efrayimi ni Manasi, khuye: “Enu mu na ni vathu nya vangi ni tshivba gambe, kha mu na mana basi gipandre gimwegyo.”

¹⁸ Aholu mu na mana litigo latshavbo nya gigomo. Ambari olu gu nagarigo likhabi, mu na li hagata kala mahegiso gakone, latshavbo li na bani liri lanu; kholu mu na tutumisa Vakhanani, ambari va gu ni dzikareta nya dzisimbi ni tshivba.